«استانا» ءۇش دۇركىن قازاقستان چەمپيونى اتاندى

فۋتبولدان ەلوردانىڭ «استانا» كومانداسى ءۇشىنشى جىل قاتارىنان قازاقستان چەمپيونى اتاندى. بۇگىن كوكشەتاۋدا قازاقستان پرەمەر-ليگاسى 25-تۋرىنىڭ كەيىنگە شەگەرىلگەن ءبىر ويىنىنا بايلانىستى «وقجەتپەس» پەن «استانا» كەزدەستى. سولتۇستىكتە كۇننىڭ سۋىتۋىنا بايلانىستى كوكشەتاۋداعى ستاديوندى قار باسىپ قالعان. الاڭ سىزىقتارى دۇرىس كورىنبەيدى. سوعان قاراماستان ويىن ءدال وسى ستاديوندا ءوتتى. قولايسىز جاعدايعا قاراماستان ەكى كوماندا ويىنشىلارى الاڭدا 90 مينۋت ونەر كورسەتىپ شىقتى. بىراق, ماتچتا ەسەپ اشىلمادى.  ءبىرىنشى كەزەڭنىڭ سوڭعى مينۋتتارىندا «استانانىڭ» گول سوعاتىن مۇمكىندىگى بولعان ەدى. الايدا, 11 مەترلىك پەنالتيدەن كولۋمبيالىق لەگيونەر روحەر كانياس ءمۇلت كەتتى. ءسويتىپ, ەكى كوماندا تەڭ ءتۇستى. دەگەنمەن, ءبىر ۇپاي «استانانىڭ» چەمپيون اتانۋىنا جەتكىلىكتى بولدى. ءسويتىپ, ستانيمير ستويلوۆ شاكىرتتەرى چەمپيوناتتىڭ اياقتالۋىنا ءبىر تۋر قالعاندا جەڭىسكە جەتتى. وسىلايشا, «استانا» ءۇشىنشى جىل قاتارىنان ەل چەمپيونى اتانىپ وتىر. سوڭعى تۋرداعى ناتيجەگە قاراماستان «قايرات» كۇمىس جۇلدەگە يەلىك ەتەدى. ال ءۇشىنشى ورىننىڭ تاعدىرى سوڭعى تۋردا شەشىلمەك. قولا جۇلدەگە, نەگىزىنەن, «ەرتىس» پەن «ورداباسى» ءۇمىتتى.