ەكسپو پاۆيلوندارىن تابىستاۋ 31 قازاندا باستالادى

«استانا ەكسپو-2017» ۇك» اق باسقارما توراعاسى احمەتجان ەسىموۆتىڭ برازيليا ۇلتتىق سەكتورىنىڭ كوميسسارى زولتير چياپەتتيمەن جانە برازيليا فەدەراتيۆتىك رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى دەمەترو بۋەنو كارۆالومەن كەزدەسۋى ءوتتى. كەزدەسۋ بارىسىندا احمەتجان ەسىموۆ برازيليالىق تاراپتى كورمەنى دايىنداۋ بويىنشا جۇرگىزىلىپ جاتقان جۇمىستار جايلى حاباردار ەتتى. «دۇيسەنبىدە (31 قازان) ءبىز العاش حالىقارالىق پاۆيلونداردى, سونىمەن قاتار پاتەرلەردى ەكسپو-عا قاتىسۋشى مەملەكەتتەرگە تابىستاۋدى باستايمىز»,- دەپ اتاپ كورسەتتى ۇلتتىق كومپانيا باسقارماسىنىڭ توراعاسى. ءوز كەزەگىندە زولتير چياپەتتي جاڭارتىلاتىن ەنەرگيا كوزدەرى بويىنشا ءوز ازىرلەمەلەرىن استانا قالاسىنداعى ەكسپو-2017 كورمەسىندە كورسەتۋ مۇمكىندىگى ءۇشىن العىس ءبىلدىردى. «ءبىز ءۇشىن بۇل وتە ماڭىزدى وقيعا, ويتكەنى برازيليادا جاڭارتىلاتىن ەنەرگيا كوزدەرىنىڭ ۇلەسى 73,5 پايىز شاماسىن قۇرايدى. بۇل ءبىزدىڭ بولاشاق ەنەرگياسى بويىنشا ازىرلەمەلەرىمىزدى كورسەتۋ مۇمكىندىگى. ەلدە گيدروەنەرگەتيكا, جەل, كۇن جانە باسقا ەنەرگيالار وتە دامىعان. ءبىز وسى كورمەدە سىزدەردىڭ ۇمىتتەرىڭىزدى اقتاۋعا تىرىسامىز», - دەپ مالىمدەدى برازيليا ۇلتتىق سەكتسياسىنىڭ كوميسسارى. بۇگىنگى كۇنگە ەكسپو-2017 كورمەسىنە قاتىسۋدى رەسمي تۇردە 105 ەل راستادى, 101 ەل وزدەرىنىڭ ۇلتتىق كوميسسارلارىن تاعايىندادى. قازىرگى مەزەتتە كومپانيا ەكسپوزيتسيالاردىڭ جوبالارىن قابىلداۋعا كىرىستى.