قۇرىلىس كومپانيالارىنىڭ تابىسى بەس ەسە ءوستى

قۇرىلىس كومپانيالارى وتكەن جىلعا قاراعاندا 5 ەسەگە كوپ تازا پايدا تاپتى. بيىل ەڭبەك ونىمدىلىگى رەكورد ورناتۋدا - كورسەتكىش ءبىر ادامعا 5,6 ميلليونعا دەيىن ارتتى. بۇل تۋرالى finprom.kz-كە سىلتەمە جاساي وتىرىپ قازاقپارات حابارلادى. مامانداردىڭ ايتۋىنشا, وسى جىلعى قاڭتار-ماۋسىمدا قۇرىلىس كومپانيالارىنىڭ ءوندىرىس كولەمى 2,2 تريلليون تەڭگەگە جەتتى. بۇل وتكەن جىلمەن سالىستىرعاندا 32 پايىزعا كوپ. ءبىرىنشى جارتىجىلدىقتا 21 مىڭنان استام قۇرىلىس نىساندارى  (وتكەن جىلمەن سالىستىرعاندا +6%) ەنگىزىلدى. ءىرى جانە ورتا قۇرىلىس كومپانيالارى وزدەرىن بارىنشا بەلسەندى كورسەتۋدە - ءبىر جىلدا ءوندىرىس ونىمدىلىگى 51 پايىزعا - 1,5 تريلليون تەڭگەگە دەيىن ءوستى. ەڭبەك ونىمدىلىگىنىڭ ورتاشا دەڭگەيى (ينفلياتسيانى ەسەپكە العاندا) بيىل 7,7 ميلليون تەڭگەنى قۇرادى. بۇل وتكەن جىلعى قاڭتار-ماۋسىمداعى كورسەتكىشكە قاراعاندا 45 پايىزعا كوپ. شاعىن كاسىپورىندار كەرىسىنشە, داعدارىس جاعدايىندا ەڭبەك ونىمدىلىگىن 23 پايىزعا تومەندەتكەن. جالپى سەكتوردا ناقتى ەڭبەك ونىمدىلىگى 2016 جىلعى 1 جارتىجىلدىقتا  ءبىر ادامعا 5,6 ميلليون تەڭگەنى قۇرادى. بۇل رەتتە جىل ىشىندە كاسىپورىندارداعى قىزمەتكەرلەر سانى 3 پايىزعا, 334 مىڭ ادامعا وسكەن. اعىمداعى جىلى قۇرىلىس كومپانيالارىنىڭ ارتقان بەلسەندىلىگى اياسىندا - 1-جارتىجىلدىقتا سالا كاسىپورىندارى 5 ەسە كوپ تازا تابىس العان. بارلىعى 812 ميلليارد تەڭگە.