يپوتەكالىق قارىزدار قايتا قارجىلاندىرىلادى

يپوتەكا بويىنشا بورىشكەرلەردىڭ قارىزدارىن قايتا قارجىلاندىرۋ شاراسى كۇتىپ تۇر. بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا بايانداما جاساعان قر ۇلتتىق ەكونوميكا ءمينيسترى قۋاندىق بيشىمباەۆ ءمالىم ەتتى. «سونىمەن قاتار قارجىلىق سەكتورعا سالىق سالۋ بويىنشا 16 تۇزەتۋدەن تۇراتىن تۇتاس بلوك قامتىلعان. ونىڭ ىشىندە «قايتا قارجىلاندىرۋ باعدارلاماسى» اياسىندا يپوتەكالىق تۇرعىن ءۇي زايمدارى بويىنشا بانكتەر الدىندا مەرزىمى وتكەن بەرەشەگى بار قارىز الۋشىلارعا كومەك كورسەتۋگە باعىتتالعان شارالار ەسكەرىلگەن. بۇل ءوز كەزەگىندە اتالعان باعدارلامانى جۇزەگە اسىرۋدى تەجەپ وتىرعان پروبلەمالاردى شەشۋگە جانە حالىقتىڭ الەۋمەتتىك ءالسىز توپتارىندا جالعىز باسپاناسىن ساقتاپ قالۋعا مۇمكىندىك بەرەدى»,-دەدى بيشىمباەۆ. مۇنىمەن قوسا, وسى بلوكتا بانكتەردىڭ سسۋدالىق پورتفەلىندە سەنىمسىز قارىز دەڭگەيىن تومەندەتۋگە باعىتتالعان تۇزەتۋلەر قاراستىرىلعان. سونداي-اق قارجىلىق قىزمەتتەردىڭ تۇتىنۋشىلارىن قورعاۋ شاراسىن كۇشەيتۋ ەسكەرىلىپ وتىر. بۇدان بولەك, دەپوزيتورلاردىڭ مۇددەلەرىن قورعاۋ دەڭگەيىن ارتتىرۋعا باعىتتالعان تۇزەتۋلەر دە بار. جالپى وتىرىس بارىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى.