جەر قويناۋىن پايدالانۋشىلار ءۇشىن جاڭا سالىقتىق جەڭىلدىكتەر ۇسىنىلۋدا

قر ۇلتتىق ەكونوميكا مينيسترلىگى جەر قويناۋىن پايدالانۋشىلار ءۇشىن جاڭا سالىقتىق جەڭىلدىكتەردى ەنگىزۋدى ۇسىندى. بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا بايانداما جاساعان قر ۇلتتىق ەكونوميكا ءمينيسترى قۋاندىق بيشىمباەۆ ءمالىم ەتتى. «زاڭ جوباسىمەن ينۆەستيتسيالىق قارجىلاندىرۋ بويىنشا كوممەرتسيالىق كورىنىس بولماعان جاعدايدا بەرەشەكتى ەسەپتەن شىعارۋ كەزىندە كورپوراتيۆتى تابىس سالىعىنان بوساتۋ قاراستىرىلعان. اتالعان زاڭ جوباسىندا تۇزەتۋلەردىڭ تۇتاس بلوگى جەر قويناۋىن پايدالانۋ ماسەلەسىنە بايلانىستى جانە ءوندىرۋشى, سونداي-اق رەسۋرستاردى قايتا وڭدەۋشى كومپانيالاردىڭ دامۋىنا كەدەرگى بولىپ وتىرعان سالىق كودەكسىندەگى شارالاردى جويۋعا باعىتتالعان»,-دەدى مينيستر. بۇدان بۇرىن حابارلانعانداي, «قازمۇنايگاز» اق-مەن ستراتەگيالىق سەرىكتەستەردى تارتۋ جولىمەن جەر قويناۋىن پايدالانۋ جوبالارى ىسكە اسىرىلۋدا. ستراتەگيالىق سەرىكتەس ءۇشىن تالاپتاردىڭ ءبىرى بارلاۋ كەزەڭىندە «قازمۇنايگاز» اق شىعىستارى ۇلەسىن قارجىلاندىرۋعا نەگىزدەلگەن. جۇزەگە اسىرىلاتىن جوبا بويىنشا كوممەرتسيالىق ءوندىرۋ بولعان كەزدە ستراتەگيالىق سەرىكتەس شىعىندارىنىڭ ۇلەسىن قايتارۋ ىسكە اسىرىلادى. كوممەرتسيالىق انىقتاۋ بولماعان كەزدە «قازمۇنايگاز» اق سومانى قايتارۋدى ەسكەرمەيدى. وسى رەتتە ستراتەگيالىق سەرىكتەس «قازمۇنايگاز» اق-نىڭ قارىزىن كەشىرەدى. بۇل جاعدايدا «قازمۇنايگاز» اق-دا بەرەشەكتى ەسەپتەن شىعارۋدان كىرىس پايدا بولادى جانە ول سالىق كودەكسىنە سايكەس 20 پايىز مولشەرىندە كورپوراتيۆتى تابىس سالىعىمەن قامتۋعا جاتادى. وسى ماسەلەنى شەشۋ ماقساتىندا ءتيىستى تۇزەتۋلەر ەنگىزۋ ۇسىنىلىپ وتىر.