اقمولادا بۋاز بۇلان اتىپ العان براكونەرلەر ۇستالدى

اقمولا وبلىسىندا زاڭسىز بۇلان اۋلاعاندار ۇستالدى, دەپ حابارلادى قر اشم-نىڭ ءباسپاسوز قىزمەتى. «2016 جىلى 23 قازاندا كۇندىزگى ساعات 12-دە اقمولا وبلىسى ارشالى اۋدانىنىڭ بولياركا اۋىلىنان سولتۇستىككە قاراي ون شاقىرىم جەردە «ساپسان» اڭ اۋلاۋ شارۋاشىلىعىنىڭ قورىقشى قىزمەتكەرلەرى Toyota Land Cruzer ماركالى اۆتوكولىگى جانە ۇرعاشى بۇلاننىڭ ەتىن مۇشەلەپ وتىرعان ءۇش ادامدى تاپتى. براكونەردىڭ جانىندا Browning ماركالى قارۋ بولعان, سونىمەن قاتار, بۇعىنىڭ ۇرعاشىسىندا بولجامدى ەكى ەمبريون بولعان», دەلىنگەن حابارلامادا. اتالمىش فاكتى اقمولا وبلىسىنىڭ ارشالى اۋداندىق ىشكى ىستەر بولىمىندە  قر قك-ءنىڭ 337 بابىنىڭ 1 ءبولىمى بويىنشا (زاڭسىز اڭ اۋلاۋ) تىركەلدى. زالال سوماسى 636 300 تەڭگە دەپ بەلگىلەندى. ءتيىستى ساراپتامالار وتكىزىلىپ, ەكى ەمبريون دەرەگى انىقتالعان جاعدايدا زالال سوماسى 1 272 600 تەڭگەگە جەتۋى مۇمكىن.