بيىلعى جىلى ەلىمىزدەگى باسقا دا بۇقارالىق اقپارات قۇرالدارىمەن بىرگە, «حابار» تەلەارناسىنىڭ رەسۋرستارىن جاڭعىرتۋ ۇدەرىسى بەلسەندى تۇردە جۇرگىزىلە باستادى. بۇل باعىتتاعى جۇمىستار ەلباسىنىڭ وتاندىق بۇقارالىق اقپارات قۇرالدارىنىڭ ساپاسىن ارتتىرۋ جونىندەگى تىكەلەي تاپسىرماسى بويىنشا ىسكە اسىرىلۋدا.
مەديا سالادا تاعى ءبىر جاعىمدى جاڭالىق بار. ول – اقپارات كەڭىستىگىندە وزىندىك ورنى بار «Kazakh TV» تەلەارناسىنىڭ جاڭا فورماتقا كوشۋى. بۇل تۋرالى قازاقستاننىڭ اقپارات جانە كوممۋنيكاتسيالار ءمينيسترى داۋرەن اباەۆ ايتتى.
– بۇگىنگى تاڭدا الدىمىزدا تۇرعان ماڭىزدى مىندەتتەر بار. ولاردىڭ ءبىرى – ەلىمىزدى حالىقارالىق دەڭگەيدە ناسيحاتتاۋ. وسىعان وراي, شەتەلدىك اۋديتوريانى قامتىعان تۇڭعىش وتاندىق «Kazakh TV» تەلەارناسى «ءبىلىم جانە مادەنيەت» تەلەارناسىمەن بىرىكتىرىلىپ, جاڭارعان فورماتتا حابار تاراتۋعا كىرىستى. وسىلايشا, ەلىمىزدىڭ ساياسي-ەكونوميكالىق جانە مادەني جاڭالىقتارى الەم نازارىنا كەڭىنەن ۇسىنىلماق. «ءبىلىم جانە مادەنيەت» تەلەارناسىنداعى ساپالى كونتەنت مىنە, وسى ءۇشىن قولدانىلادى. جالپى, بۇقارالىق اقپارات قۇرالدارىنىڭ ىشىندە تەلەارنانىڭ اسا قۋاتتى قۇرال ەكەنى بەلگىلى. وسىنى ەل ماقساتى مەن ۇلت مۇددەسىنە ۇتىمدى پايدالانا ءبىلۋ اسا ماڭىزدى. جاڭارعان ارنانىڭ ۇجىمى بۇل مىندەتتى ويداعىداي اتقارادى دەپ سەنەمىن, – دەدى داۋرەن اسكەربەك ۇلى.
سونىمەن قاتار, ول مەملەكەتتىك تەلەارنالار باسەكەلەستىك جاعدايىندا ءومىر ءسۇرىپ كەلە جاتقانىن, ماسەلەن, تەلەارنالار نارىعىندا حابار تاراتۋدىڭ جاڭا ءادىس-تاسىلدەرىن, پيار-ستراتەگياسىن يەلەنگەن «جاڭا ويىنشىلار» پايدا بولعانىن, باسەكەلەستىكتىڭ جاندانۋىندا ءتۇرلى ونلاين-سەرۆيستەر مەن بەينە-حوستينگتەر دە ۇلكەن ءرول اتقاراتىنىن اتاپ ءوتتى. مۇنداي جاعدايدا ماسس-مەديانى دامىتۋعا ىقپال ەتەتىن نەگىزگى ترەندتەردەن قالىپ قويماۋ قاجەت. وزگەرۋگە بەيىل بولىپ, اۋديتوريامەن بايلانىس ورناتۋدىڭ جاڭا تاسىلدەرىن ويلاپ تاپقان ءجون. بالكىم, كورەرمەندەرگە قىزىعۋشىلىق تۋعىزبايتىن «ەسكىرگەن قاعيداتتاردى» ىسىرىپ تاستاۋ دا قاجەت شىعار. ياعني, ءبىز وزگەرۋىمىز كەرەك. ول ءۇشىن اۋديتورياعا قانداي اقپارات رەسۋرستارى قاجەتتىگىن سەزىنىپ, كرەاتيۆتى باستامالاردى ىلگەرىلەتەتىن ءتيىمدى مەنەدجمەنتتى قالىپتاستىرۋىمىز كەرەك. ءبىر سوزبەن ايتقاندا, اقپاراتتىق سالادا ءجۇرىپ جاتقان وزگەرىستەر ءاردايىم ءجىتى نازاردا تۇرعانى ءجون, – دەدى مينيستر.
بۇل ورايدا, ول «Kazakh TV» تەلەارناسى ەلىمىزدى اقپاراتتىق جاعىنان العا جىلجىتاتىن فلاگمان بولىپ وتىرعانىن جەتكىزدى. الەمنىڭ 118 ەلىنە حابار تاراتا وتىرىپ, بۇل تەلەارنا مەملەكەت باسشىسىنىڭ عالامدىق سىرتقى ساياسي باستامالارىن, «ەكسپو-2017», «ۋنيۆەرسيادا-2017» سەكىلدى اۋقىمدى ءىس-شارالاردى ناسيحاتتاۋدا ماڭىزدى ستراتەگيالىق ءرول اتقارادى. ەندەشە, تەلەارنانىڭ جاڭا فورماتى وتاندىق تەلەارنا ونىمدەرىنىڭ ساپاسىن كوتەرۋگە, سول ارقىلى كورەرمەندەر اۋديتورياسىن كەڭەيتۋگە سەپ بولادى دەپ ويلايمىن, – دەدى ۆەدومستۆو باسشىسى.
داۋرەن اسكەربەك ۇلىنىڭ ايتۋىنشا, تەلەارنا ەفيرىنەن تاراتىلاتىن اقپاراتتىق باعدارلامالار 15 پايىزعا دەيىن قىسقارماق. ياعني, ەل تۇرعىندارى قانداي دا ءبىر جاڭالىقتى نەگىزىنەن ينتەرنەت پەن اقپارات اگەنتتىكتەرى ارقىلى ءبىلىپ وتىراتىندىقتان, بۇل ارنا ارقىلى قازاقستاننىڭ مادەنيەتىنە, تاريحىنا, سالت-داستۇرىنە, ەكونوميكاسىنا جانە تاڭعاجايىپ تابيعاتىنا ارنالعان تانىمدىق باعدارلامالار جارىققا شىعارىلماق. بۇل ءوز كەزەگىندە قازاقستاننىڭ تۋريستىك جانە ينۆەستيتسيالىق تارتىمدىلىعىن ارتتىرۋعا دا ىقپال ەتپەك, – دەيدى داۋرەن اباەۆ.
جاڭا فورماتقا كوشىرىلگەن, جالپى اۋديتورياسى 300 ميلليون ادامدى قامتيتىن تەلەارنانىڭ ءتىل ساياساتى دا وزگەرىسكە ۇشىراعان. ياعني, ىشكى اۋديتوريا ءۇشىن ەفير قازاق جانە ورىس تىلدەرىندە, ال شەتەلدىك اۋديتوريا ءۇشىن قازاق جانە اعىلشىن تىلدەرىندە تاراتىلماق.
ءسوزىنىڭ سوڭىندا مينيستر: «مۇنداي وزگەرىستەر, ءسوزسىز, قازاقستان تۇرعىندارىنىڭ عانا ەمەس, شەتەلدىكتەر تاراپىنان دا جوعارى باعاعا يە بولادى دەپ ويلايمىن», – دەي كەلە, «Kazakh TV»-نىڭ ۇجىمىنا ساتتىلىك پەن شىعارماشىلىق تابىس تىلەدى.
ءلايلا ەدىلقىزى,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
«ەگەمەن قازاقستان»
