بىرىگىپ قولعا العان تىرلىك

قازىرگى تاڭدا وبلىستىڭ اۋىل شارۋا­شىلىعى سالاسىنىڭ وركەندەۋىنە شارۋا­شى­لىقتاردىڭ ۇساقتىعى كەرى اسەرىن تيگىزۋدە. جامبىل وبلىسىندا 100 گەكتارعا دەيىنگى جەر تەلىمى بار شارۋاشىلىقتاردىڭ ۇلەسى 70 پايىزدى قۇرايدى. ارينە, وڭىردە شارۋا­شىلىقتاردى بىرىكتىرۋ, ىرىلەندىرۋ جۇمىسى نازاردان تىس قالعان ەمەس. مايدا بولعان سوڭ بۇل شارۋاشىلىقتاردىڭ شارۋاسى دا, ماشاقاتى دە شاش-ەتەكتەن. نە نەسيە الا المايدى, نە مەملەكەت تاراپىنان بەرىلەتىن جەڭىلدىكتەردى پايدالانا المايدى. جاقىندا جامبىل وبلىسىندا ءسۇت كلاس­تەرىن دامىتۋ, سونداي-اق كووپەراتيۆتەرگە شاعىن شارۋاشىلىقتاردى بىرىكتىرۋ ماق­ساتىندا جاڭازەلانديالىق «Fonterra» جانە دانيالىق «Arla» باعدارلامالارى بويىنشا مەركى اۋدانىن­دا قۇرامىنا 42 شارۋاشىلىق بىرىككەن «مەركى ونىمدەرى» وندىرىستىك كوو­پە­راتيۆى قۇرىلدى. وبلىستىق اۋىل شارۋاشىلىعى باس­قار­­­ماسى باسشىسىنىڭ ورىنباسارى ەركە­بۇلان انا­بەكوۆتىڭ ايتۋىنا قاراعاندا, الداعى ۋاقىتتا بۇل وندىرىستىك كووپەراتيۆ توڭىرەگىندە 70-200 باسقا دەيىن اسىل تۇقىمدى ساۋىن سيى­رى بار تاۋارلى-ءسۇت فەرمالارى قۇرىلاتىن بولادى. كووپەراتيۆ ولاردىڭ توڭىرەگىندەگى ءسۇت وندىرۋشىلەردى, مال ازىعىن دايىنداۋشىلاردى ۇيىمداستىرا وتىرىپ, دايىن ءونىمدى وتكەرۋ جۇمىستارىمەن اينالىسادى. بۇل ماقساتتا ءسۇت باعىتىنداعى 1000 باس اسىل تۇقىمدى ءىرى قارا مالىن ساتىپ الۋدى قارجىلاندىراتىن شاعىن نەسيە مەكەمەسى دە جۇمىسىن باستادى. ورالحان ءداۋىت, «ەگەمەن قازاقستان» جامبىل وبلىسى