دايىندىق جوعارى دەڭگەيدە

الدا ۇلكەن سپورت ءدۇبىرى كەلە جاتقانى كۇن وتكەن سايىن بىلىنۋدە. الماتى اۋقىمدى شارانى وتكى­زۋگە بارىن سالىپ وتىر. وسى ءتىر­لىك­تىڭ اياسىندا 2017 جىلعى قىسقى ۋنيۆەرسياداعا وراي جۇمىس ساپا­رى­مەن كەلگەن شەتەلدىك دەلەگاتتار قالا اۋرۋحانالارىن ارالاپ شىقتى. قازىر قالاداعى بارلىق ەمدەۋ مەكەمەلەرى ستۋدەنتتەردىڭ الەمدىك قىسقى ويىندارىنا تىڭعىلىقتى دايىند­الىپ جاتىر. ارنايى دەلەگا­تسيا الدىمەن الماتى قالاسىنداعى №4 قالالىق اۋرۋحاناعا, جەدەل جاردەم اۋرۋحاناسىنا باس سۇقتى. اتالمىش مەكەمەلەر الماتىلىق­تارعا عانا ەمەس, ەلدىڭ ءار شالعايىنان شيپا ىزدەپ كەلگەندەرگە شۇعىل جانە جوسپارلى تۇردە مەديتسينالىق كومەك كورسەتەدى. ولار وزىق مەديتسينالىق تەحنولوگيالارمەن جابدىقتالعان. مۇندا شەتەلدەردە تاجىريبەدەن وتكەن بىلىكتى ماماندار قىزمەت ات­قارا­دى. بولىمشەلەر كۇردەلى وپەرا­تسيالار جاساۋمەن, سيرەك كەزدەسەتىن اۋرۋلاردى ەمدەۋمەن اينالىسادى. ەمدەۋ ورىندارىنداعى جابدىق­تار­دى كورگەن ۇلىبريتانيا ۇلتتىق ستۋدەنتتەر سپورتى فەدەراتسياسى مەديتسينالىق كوميتەتىنىڭ جەتەكشىسى ەدجەي ابوسيدە ولۋگبوينۆا: «ءبىز قالاداعى اۋرۋحانالاردى كورىپ, جاق­سى ويدا قالدىق. بار­لىق پالا­تالار وزىق ۇلگىدەگى تەحنيكا­لارمەن جابدىقتالىپتى. ال مامانداردىڭ بىلىكتىلىگى جوعارى ەكەنىنە كوز جەت­كىزدىك. جارىس كەزىندە سپورتشىلار ءۇشىن بارلىق كومەك كورسەتىلەتىنىنە سەنىمدىمىن», – دەدى. سونىمەن قاتار, شەتەلدىكتەرگە جەدەل مەديتسينالىق كومەك كورسەتۋ ستانسالارى دا كورسەتىلدى. ولار اۆتوماتتاندىرىلعان جۇيە مەن جاڭا جەدەل جاردەم ماشينالارىمەن تانىستى. اقش ستۋدەنتتەر سپورتى فەدە­راتسياسى مەديتسينالىق كوميتەتى­نىڭ جەتەكشىسى رونالد ولسون ۋنيۆەرسيادا كەزىندە شۇعىل كومەكتىڭ اسا قاجەت ەكەنىن ايتا كەلە: «ۇلكەن جارىستاردا سپورتشى كەز كەلگەن ساتتە قۇلاپ, جاراقات الۋى مۇمكىن. ال وعان شۇعىل كومەك كورسەتۋ اسا ماڭىزدى. مەديتسينا قىزمەتكەرلەرىن كورىپ, ولاردىڭ اقجارقىن جاندار ەكەنىنە كوزىم جەتتى. بۇل دا اسا قاجەت. مەنىڭشە, ءبارى ويداعىداي بولادى», دەگەندى ايتتى. ۋنيۆەرسيادا كەزىندە الماتى قالاسى اكىمدىگىنىڭ شەشىمىمەن 40 جەدەل جاردەم كولىكتەرى قاتار تۇرماق. ونىڭ 8-ءى – رەانيموبيل كولىكتەرى. مەديتسينالىق كومەك كور­سەتۋ ءۇشىن الماتىنىڭ 8 ستاتسيونارى جۇمىلدىرىلادى. قالالىق دەنساۋلىق ساقتاۋ باسقارماسىنىڭ باسشىسى ءۋاليحان احمەتوۆ مەديتسينا قىزمەتكەرلەرى ۋنيۆەرسياداعا ساقاداي-ساي دايىن ەكەندىگىن ايتىپ وتىر. ويىندار كەزىندە سپورتشىلار مەن تىركەلگەن تۇلعالارعا امبۋلاتورلىق كومەك كورسەتۋ ءۇشىن مەديتسينالىق ورتالىق پەن ساۋىقتىرۋ-وڭالتۋ ءىس-شارالارى جۇمىس ىستەيدى. شۇعىل ناۋقاستار ءۇشىن ۋنيۆەرسيادانىڭ رەسمي اۋرۋحانالارىنا كەدەرگىسىز قابىلدانادى. قازىرگى تاڭدا 130-دان استام مەدي­تسينالىق قىزمەتكەر اعىلشىن ءتىلىن وقىپ ۇيرەنىپ جاتىر. ۇيىمداستىرۋ ءتارتىبى بويىنشا ءاربىر سپورتتىق جارىس نىسانىندا جانە اتلەتيكالىق اۋىلدا دوپينگ-باقىلاۋ ستانسالارى بولادى. دوپينگ باقىلاۋ راسىمدەرى تەستىلەۋگە ارنال­عان دۇنيەجۇزىلىك دوپينگكە قارسى كۇرەس كودەكستىڭ جانە حالىقارالىق ستاندارتتىڭ ەرەجەلەرىنە سايكەس جۇرگىزىلەدى. ايناش ەسالي, «ەگەمەن قازاقستان» الماتى