الەۋمەتتىك جوبا قولداۋ تاپتى

اقمولا وبلىستىق جۇمىسپەن قامتۋدى جانە الەۋمەتتىك باعدار­لامالاردى ۇيلەستىرۋ باسقارماسىنىڭ ۇيىمداستىرۋىمەن كوكشەتاۋ­داعى دوستىق ۇيىندە ۇزدىك الەۋمەتتىك جوبالار كورمەسى بولىپ ءوتتى. اتالمىش كورمە وبلىسىمىزدا وسىمەن ءۇشىنشى جىل قاتارىنان وتكىزىلىپ وتىر. وتكەن جىلى «مەن ءبارىن ىستەي الامىن! مەنىڭ قولىمنان ءبارى كەلەدى!» اتتى جوبانى ۇسىنعان كوكشەتاۋ قالاسىنداعى پسيحونەۆرولوگيالىق اۋىتقۋلارى بار جانە تىرەك-قيمىل جۇيەلەرى بۇزىلعان مۇگەدەك بالالارعا مەديتسينالىق الەۋ­مەتتىك كومەك كورسەتەتىن مەكەمە بايقاۋ جەڭىمپازى اتان­عان بولاتىن. بيىلعى جىلى بايقاۋعا جەتى جوبا قاتىستىرىلىپ وتىر. ولاردىڭ باسىم كوپشىلىگى ومىردە قيىن جاعدايعا تاپ بولعان مۇگەدەك بالالاردى وڭالتۋدى, قوعامدا ءوز ورىندارىن تابۋعا كومەكتەسۋدى ماقسات ەتكەن جوبالار. جينالعاندار الدىندا قۇتتىقتاۋ ءسوز سويلەگەن وبلىستىق جۇمىسپەن قامتۋدى جانە الەۋمەتتىك باعدارلامالار­دى ءۇي­لەستىرۋ باسقارماسى باسشىسىنىڭ ورىن­باسارى شولپان راحماتۋللينا مۇمكىندىگى شەكتەۋلى جانداردى وڭالتۋ ماقساتىندا جىل سايىن وبلىستىق بيۋدجەتتەن قوماقتى قارجى ءبولىنىپ كەلە جاتقانىن ايتا كەلە, بۇگىنگى كۇنى وبلىس اۋماعىندا 20 مىڭ مۇگەدەك تىركەلگەنىن جانە وسى سالادا ەڭبەكتەرىمەن كوزگە تۇسكەن بىرقاتار ۇكىمەتتىك ەمەس ۇيىم­دار­دىڭ بەلسەندىلىگىنە ريزاشىلىق ءبىلدىردى. ولاردىڭ اراسىندا «اقكولدەگى №1 بالا­لار ءۇيى» مەملەكەتتىك مەكەمەسى, كوك­شە­­تاۋداعى «شانس» مۇگەدەكتەردى وڭالتۋ ورتالىعى» قوعامدىق بىرلەستىگى, ستەپ­نوگورداعى «ەرلىك» تىرەك-قيمىل اپپاراتى زاقىمدانعان مۇگەدەكتەردىڭ قوعامى, «بالاپان» مۇگەدەك بالالاردى تاربيەلەپ وتىرعان اتا-انالار قوعامى, اتباسار قالاسىنداعى «تسەلينا» قوعامدىق قورى جانە جار­قايىڭ اۋدانىن­داعى «اقمولا وبلىسى مۇگەدەك بالالاردى قول­داۋ قاۋىم­داستىعى» قوعامدىق بىرلەستىگى بار. قازىلار القاسى قىزۋ تالقىلاۋدان كەيىن «كوكشەتاۋ قالاسى مەن كراسنويار كەنتىندە ءى توپتاعى مۇگەدەكتەرگە جانە 18 جاسقا تولماعان قوزعالىپ ءجۇرۋى قيىن بالالارعا ۇيلەرىنە بارىپ, ءپاللياتيۆتى كومەك كورسەتۋ ورتالىعىن ۇيىمداستىرۋ» جوباسىن ۇسىنعان كوكشەتاۋ قالاسىنداعى «شانس» مۇگەدەكتەردى وڭالتۋ ورتالىعى» قوعامدىق بىرلەستىگىن جەڭىمپاز دەپ تانىدى. ەندى بۇل ۇجىم الداعى ۋاقىتتا ىرىكتەۋدەن وتسە, شىمكەنت قالاسىندا وتەتىن رەسپۋبليكالىق كورمەدە وبلىس نامىسىن قورعايتىن بولادى. باقبەرگەن امالبەك, «ەگەمەن قازاقستان» اقمولا وبلىسى