العاشقى قوڭىراۋ الدىندا

ورتالىق كوممۋنيكاتسيالار قىزمەتىندە جاڭا وقۋ جىلىنا ازىرلىك بارىسىنا ارنالعان ءباسپاسوز ءماسليحاتى بولىپ ءوتتى. جيىنعا ءبىلىم جانە عىلىم ۆيتسە-ءمينيسترى ەلميرا سۋحان­بەر­ديەۆا, مينيسترلىكتىڭ بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى مانشۇك ابدىكارىم, ءبىلىم جانە عىلىم سالاسىن باقىلاۋ كوميتەتى توراعاسىنىڭ ورىنباسارى ءلاززات بولەباەۆا, «كۇندەلىك.kz» جشس-ءنىڭ ديرەكتورى الەكساندر گريگوريان, «Bilim Media Group» جشس-ءنىڭ اتقارۋشى ديرەكتورى سانجار كەنجەحان ۇلى قاتىسىپ, ءبىلىم بەرۋ سالاسىنا بايلانىستى ورامدى ويلارىن ورتاعا سالدى. بريفينگ بارىسىندا ءبىلىم بەرۋ مەكەمەلەرىنىڭ جاڭا وقۋ جىلىنا دايىندىعى جان-جاقتى ءسوز بولدى. «بيىلعى وقۋ جىلىنا دايىندىق ءبىلىم جانە عىلىم مينيسترلىگى مەن جەرگىلىكتى اكىمشىلىكتەردىڭ تى­عىز قارىم-قاتىناسى نەگىزىندە جۇزەگە اسىپ جاتىر. مەكتەپكە دەيىن­گى وقىتۋ مەن تاربيە بويىنشا ءبۇ­گىندە 817,8 مىڭ بالا قامتىلعان. سونداي-اق, بيىل جاڭادان 538 مەكتەپكە دەيىنگى تاربيە مەكەمەسى اشىلدى, ونىڭ ىشىندە 49 بالا­باق­شا بار. جانە دە جىلدىڭ سوڭى­نا دەيىن 82 مەكتەپكە دەيىنگى ۇيىم مەن ۇلتتىق قور ەسەبىنەن 11 بالاباقشا اشۋ جوسپارلانۋدا. ءناتي­جەسىندە, 3-6 جاستاعى بالالار­دى مەكتەپكە دەيىنگى بىلىممەن قام­تۋ 82,7 پايىزعا جەتەدى. بۇل كور­سەتكىش بىلتىر 81,6 پايىزدى قۇراعانىن ەستەرىڭىزگە سالامىز. سونىمەن قاتار, بيىل 1 قىركۇيەكتە مەكتەپ تابالدىرىعىن 2,8 ميلليوننان استام وقۋشى اتتايدى. بولجامدى دەرەكتەر بويىنشا ءبىرىنشى سىنىپقا باراتىن وقۋشىلاردىڭ سانى 370,0 مىڭنان اسادى», – دەدى ۆيتسە-مينيستر. سونىمەن قاتار, جيىن بارىسىندا ەلىمىزدەگى ساپاسى سىن كو­تەر­مەيتىن مەكتەپتەر مەن تاجىريبەلى كادرلاردىڭ جەتىسپەۋشىلىگى دە تىلگە تيەك ەتىلدى. قوعامداعى قىزۋ تالقىعا تۇسكەن ماسەلەلەردىڭ ءبىرى وقۋشىلاردىڭ مەكتەپتە ۇيالى تەلەفوندى قولدانۋى دا نازاردان تىس قالمادى. راۋان قايدار, «ەگەمەن قازاقستان»