بالانى قۋانتۋ – باقىت

«...بالادان قايىر بولماسا, با­لانى نەگە سۇرايدى», دەپ ىبىراي التىنسارين اتامىز ايتقانداي, ءار ادامنىڭ باقىتتى باستاۋى ءار بالانىڭ باقىتتى بولا­شاعىندا عوي. ءار وتباسىنىڭ دا, ەلدىڭ دە بولاشاعى – بالا. ال بالانىڭ جاستايىنان جاقسى تاربيە الىپ, جان-جاقتى ءبىلىم جيىپ, وزىق ونەگەلى بولعانىن قاي اتا-انا قالامايدى دەيسىز. جاق­سىلىق جاساۋ – جانعا نۇر قۇيادى دەيدى. راس ءسوز, جاقسىلىققا جانى قۇمار جانداردىڭ ءبارى وسى ايتىلعانداردان سىرت قالماعاندار. سوندىقتان اتا-اناعا, ەلىنە, وتا­نىنا قايىرى بولاتىنداي بالانى و باستا جان-جاقتى تاربيەلەپ, كومەك كورسەتۋ وتباسىنىڭ عانا جەكە مىندەتى بولماسا كەرەك. بۇل ارادا قوعامنىڭ, مەكتەپتىڭ الار ورنى بولەك. مىنە, مۇنى جاقسى تۇسىنە بىلگەن ادامدار عانا بالالارعا ءاردايىم كومەك قولىن سوزۋدا ايانىپ قالمايدى. سولاردىڭ قاتارىنا ەلىمىزدىڭ پوليتسيا قىزمەتكەرلەرىن قوسۋعا ابدەن لايىق. ويتكەنى, ولاردىڭ ءسوزى مەن ءىسى دە ۇيلەسىم تاۋىپ, ىزگىلىكتى ىستەرگە بارا الاتىن­دىعىن تەك ۇلكەندەر عانا ەمەس, بالالار دا جەتە سەزىنىپ وتىر دەسەك ارتىق ايتقاندىق بولماس. وسىعان دالەل, ەلوردالىق پوليتسيا قىزمەتكەرلەرى ءبىلىم كۇنى قارساڭىندا «مەكتەپكە جول» جالپى رەسپۋبليكالىق قايىرىمدىلىق اكتسياسىن ۇيىمداستىردى. ولار جاڭا وقۋ جىلىندا بالالارعا كومەك كورسەتۋ ماقساتىندا الەۋ­مەتتىك جاعىنان از قامتىلعان جانە كوپ بالالى وتباسىلارعا اتباسىن تىرەدى. ويتكەنى, جوعارىدا ايتقانىمىزداي, بۇل اكتسيانى ۇيىمداستىرۋداعى باستى ماقسات – بالالاردىڭ باقىتتى بولاشاعىن ويلاۋ. ول ءۇشىن بىردە-ءبىر بالا ءبىلىم الۋدان كەندە قالماۋعا ءتيىس دەپ شەشتى پوليتسەيلەر. ماسەلەن, پريگورودنىي اۋىلىندا تۇراتىن ءبىر وتباسىندا 8 بالا بار ەكەن. سونىڭ 7-ءۋى كامەلەتتىك جاسقا تولماعاندار. ال, راسى كەرەك, بۇل وتباسىنداعى اتا-انانىڭ بالالاردى وزدىگىنەن مەكتەپكە دايىنداۋعا مۇمكىندىكتەرى جوق. سەبەبى, ولاردىڭ اتا-انالارى مۇمكىندىگى شەكتەۋلى جاندار. كوزدەرى جاۋدىرەگەن بالالاردىڭ كىشىلەرى 3 جانە 5 جاستا بولسا, قالعان 5-ءۋى مەكتەپ جاسىنداعىلار. اكتسيا بارىسىندا بالالارعا سومكەلەر, مەكتەپكە قاجەتتى بارلىق وقۋ قۇرالدارى: پەنال, داپتەر, قالام, قارىنداش, اكۆارەلدى بوياۋ­لار, ەرمەكسازدار جانە كيىم-كەشەكتەر مەن تاتتىلەر ت.ب. مولىنان بەرىلدى. بۇلدىرشىندەر قۋا­نىشىندا شەك بولمادى. بالانى قۋانتا ءبىلۋدىڭ ءوزى باقىت ەمەس پە. سوعان ساي بالالاردىڭ اناسى جەڭىسگۇل ەلوردالىق پوليتسەيلەرگە جۇرەكجاردى العىسىن ءبىلدىردى. ءتارتىپ ساقشىلارىنىڭ بۇل وراسان كومەگى بالالاردى مەكتەپتە وقىتۋعا ايتارلىقتاي ۇلەس قوسقانىن اتاپ ءوتتى. اقيقاتىندا كومەككە ءزارۋ با­لالارعا كومەك قولىن سوزۋدىڭ ءتيىم­دىلىگى مەن قايىرىمدىلىعىنىڭ وراساندىعىندا تالاس جوق. سون­دىق­­تان پوليتسەيلەر بۇل اكتسيا­نى «با­قىتتى بالالىق مەكەنى» دەگەن ۇران­مەن ەل تاۋەلسىزدىگىنىڭ 25 جىل­­­دىعىنا ارناپ وتىر. الەكساندر تاسبولاتوۆ, «ەگەمەن قازاقستان»