زەرە اجە – زەردەمىزدە

تاياۋدا تاريحي سەمەي قالاسى مەن جارما اۋدانىنىڭ ورتالىعى قالباتاۋدا ەكى كۇنگە سوزىلعان ايتۋلى ەلدىك شارا ءوتتى. شاكارىم اتىنداعى سەمەي مەملەكەتتىك ۋنيۆەرسيتەتى مەن اتالعان اۋدان اكىمدىگى بىرىگىپ, « ۇلى دالانىڭ ۇلى انالارى» اتتى رەسپۋبليكالىق عىلىمي-تاجىريبەلىك كونفەرەنتسيا ۇيىمداستىردى. عىلىمي جيىنعا استانا مەن الماتى قالاسىنان جانە ەلىمىزدىڭ بارلىق وبلىستارىنان كەلگەن بەلگىلى عالىمدار, اقىن-جازۋشىلار, قوعام قايراتكەرلەرى قاتىستى. كونفەرەنتسيا مىنبەرىنە ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, قر ۇعا كوررەسپوندەنت-مۇشەسى حانگەلدى ءابجانوۆ, ەتنوگراف, پروفەسسور, تاريح عىلىمدارىنىڭ دوكتورى احمەت توقتاباي, فيلولوگيا عىلىمدارىنىڭ دوكتورى, پروفەسسور اراپ ەسپەمبەتوۆ, قازاقستاننىڭ حالىق ءارتىسى, «ءبىرجان سال», «قۇنانباي» سىندى كوركەم فيلمدەردىڭ رەجيسسەرى ءارى باستى رولدەردى سومداۋشى دوسقان جولجاقسىنوۆ, مادەنيەت قايراتكەرى, زەرە ءرولىن ءساتتى ويناعان نۇرسيپات سالىقوۆا, تاريح عىلىمدارىنىڭ دوكتورى, پروفەسسور الىمعازى داۋلەتحان, شىعىس قازاقستان ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى, پروفەسسور باۋىرجان ەردەمبەكوۆ, تاعى دا باسقا تۇلعالار كوتەرىلىپ, مازمۇندى بايانداما جاسادى, شىعارماشىلىق تاجىريبەلەرىن ورتاعا سالدى. ۋنيۆەرسيتەت رەكتورى مەيىر ەسكەن­دىروۆ پەن اۋدان اكىمى نۇرلان سىدى­قوۆ كونفەرەنتسيا جۇمىسىن جۇيەلى ءۇي­لەس­تىردى. قۇندى پىكىرلەر جارىسسوزگە شىعۋشىلار تاراپىنان دا ايتىلدى. وسى كۇنى تۇستەن كەيىن سەمەي قالا­سى­نىڭ جۇرتشىلىعى ۋنيۆەرسيتەتتە «قۇنانباي» كوركەم ءفيلمىنىڭ رەجيسسەرى دوسقان جولجاقسىنوۆپەن جانە جام­بىل وبلىستىق دراما تەاترىنىڭ ءارتىسى نۇر­سيپات سالىقوۆامەن كەزدەسىپ, تۋىندىنىڭ جاسالۋ ەرەكشەلىكتەرىمەن تانىستى. تار­تىمدى سۇراقتار قويىلىپ, تۇشىمدى جاۋ­اپتار الىندى. كەشكىسىن «ەڭلىك – كەبەك» كينوتەاترىندا «قۇنانباي» ءفيلمى كورسەتىلدى. كەلەسى كۇنى جارما اۋدانىنىڭ ورتالىعى – قالباتاۋدا زەرە اجە ەسكەرت­كىشىن اشۋ سالتاناتى ءوتتى. ءمۇسىن ۇستىندەگى اق جامىلعى سىپىرىلعاندا, جۇرتشىلىق جاقسىلىققا قۇشتار نەمەرەسىن الدىنا الىپ وتىرعان ابىز اجە بەينەسىن كورىپ, قۋانىپ قالدى. اجە – زەرە  بەكتەمىرقىزى, بالا – جاسىنان ۇعىمتال بالاقاي اباي سۇلباسى ەكەنىنە قانىقتى. ەسكەرتكىش اۆتورلارى – اكەلى-بالالى ەرتىس جانە ەركەبۇلان ءتاتي. ەكەۋى دە – ۇستاز. اباي اۋدانىنىڭ ازاماتى. سەمەي ءوڭىرى بۇلاردى ىزدەنگىش, شىعارماشىل پەداگوگتار رەتىندە جاقسى تانيدى. اسىرەسە, اكە ءتاتي تەمىردەن ءتۇيىن تۇيەدى. زەرە اجە ەسكەرتكىشى – ۇلت اناسىنىڭ, ەل اجەسىنىڭ جيىنتىق بەينەسى. ءرامىزدى ەس­كەرتكىش. زەرە – رۋحاني تولقۇجاتىمىزعا اي­نالعان ابايدىڭ اجەسى رەتىندە دە ۇلت دانالىعىنىڭ باستاۋى. «اباي جو­لى» رومان-ەپوپەياسى ارقىلى زەرە بەي­نەسىن – ۇلت بەرەكەسى مەن ءداستۇرى كەي­پىندە سومداپ شىققان دارا جازۋشى مۇح­تار اۋەزوۆ تاعىلىمى ەندى قولادان قۇي­ىل­عان تۋىندى تۇرىندە جالعاسىن تاپتى. جامبىل تىلەپ