قازاق بولعان قانداي باقىت!

مەدەۋ. بەندي. بۇرىنعى تىلمەن ايتساق, دوپتى حوككەي. قازاق­ستان-موڭ­عوليا قۇرامالارىنىڭ ال­عاش­قى ويىنى. “اقجايىقتىڭ” نە­گىزىندە قۇرالعان قازاق سۇرمەر­گەندەرى قارسىلاستار قاقپاسىنا اتويلاپ كىرىپ, جەڭىس دوبىن ءسات سايىن توعىتادى. راۋان مەن ەسكەندىر ويىن الدىندا ەكەۋىمىز كەزەك سوعايىق دەپ كەلىسىپ العانداي موڭعول قاقپاسىنىڭ الدىندا كەزەك-كەزەك ات ويناتادى. قارسى جاق بەتكەيگە كوزىم ءتۇس­تى. ءبىر قاۋىم ايىر قالپاقتى اعا­يىن وتىر. گول سوعىلسا ءدۇر ەتىپ كوتەرىلگەن كوگەرشىندەردەي ورىن­دارىنان تۇرىپ كەتەدى. “قا­زاقستان, قازاقستان” دەپ كۇر­كىرەي­دى. قول­دارىندا “قازاقستان” دەگەن جازۋى بار بەلگىلەر. العاشقى كۇنى موڭعولداردىڭ قولىنا تۇسكەن. 14:2 بولىپ ۇتىل­دى. سودان سوڭ قازاق سايىپ­قىران­دارىمەن جولى توعىستى. ءبىزدىڭ جىگىتتەر 21:0 ەسەبىمەن كەرىپ تاستادى. اشۋلانسا كەرەك ەدى. توڭقىلداپ وتىرعان قىرعىز­دار جوق. “قازاق-قىرعىز ءبىر تۋ­عان”. باردىق. اڭگىمەگە تارتتىق. ءوڭىن جەل قاعىپ, توتىققان جىگىتتەر ىقىلاستى. – قازاق تۋعاندار مىقتى عوي. اسىرەسە, اناۋ راۋان دەگەن جىگىت شوڭ ەكەن. قانشا قاۋمالاساق تا ارامىزدان جول تاۋىپ ءوتىپ كەتىپ, گول سوعا بەردى عوي, – دەيدى سا­عىم­بەك قادىروۆپىن دەپ تانىس­تىرعان جىگىت. – سپورتتىق فورمالارىڭىز سايلى ەكەن؟ – قازاقتار بەردى. سپورتتىق فور­­مانى دا, كونكيدى دە, كليۋش­كانى دا... ءسىزدىڭ جىگىتتەر جاقسى ەكەن. تانىسىپ الدىق. شىركىن, بىزدە دە قازاق سپورتشىلارىنداي جاعداي بولسا عوي... – راس, قىزىعامىز سىزدەرگە, –دەيدى ساعىمبەك. – ءبىزدىڭ ەلدە نۇر­سۇلتان نازارباەۆقا قۇرمەت ەرەك­شە. ءوزىمىز دە كوردىك. سپورت كەشەندەرى بىرىنەن-ءبىرى وتەدى. اناۋ ترام­پ­ليننەن شاڭعىمەن سەكىرەتىن كەشەن قانداي كەرەمەت. ءاي, ءبىز ونداي­دى ءجۇز جىلدا دا سالا المايتىن شىعارمىز. اياعى­مىز جەتكەن ءبىراز جەردى كوردىك. مىناداي سپورت كەشەندەرىمەن ازيا ويىندارىن ەمەس قىسقى وليمپيا ويىندارىن وتكىزۋگە بولادى عوي. – قىزىقتىق تا, ەپتەپ قىزعان­دىق تا, – دەيدى مىرزابەك. –نۇر­سۇلتان نازارباەۆ حالىققا جايلى باسشى ەكەن. بارلىق كەرەكتەرىڭىز بار. قىتاي, جاپون, كورەي ەلدەرى عانا وتكىزە الاتىنداي كورىنەتىن ازيا ويىندارىن تاماشا وتكىزىپ جاتىرسىزدار. شىركىن, وسىنداي بەرەكە ءبىزدىڭ حالىققا قاشان كەلەدى؟! قازاق بولۋ باقىت قوي! تەگى ءبىر اعايىننىڭ اقتارى­لىپ ايتقان اڭگىمەسىنە ءسۇيىنىپ قالدىق. قىزىق-ءاي. وزىمىزدە بىرەۋلەر اۋ­زىنان تۇكىرىگى شاشىراپ “وسىن­داي داڭعازا نەگە كەرەك؟” دەپ داستارقانىمىزدىڭ شەتىن تىلگىلەپ ءجۇر. ءوز ەلىنە ءوزى جاۋلىق پيعىل تانىتىپ. كورشى اعايىن “قازاق بولعان قانداي باقىت” دەپ كۇرسىنەدى. ءوز ىشىمىزدەن شىققان كەسىردىڭ ەمەس, كورشىنىڭ ءسوزى ءتۇزۋ-اۋ... گازەتىمىزدىڭ ارقاسىندا ازيا ويىندارىنا دا, وليمپيا ويىن­دارىنا دا جولىمىز ءتۇسىپ ءجۇر. سەنىم بىلدىرگەن باسىلىم باسشى­لىعىنا دا, گازەت ۇجىمىنا دا مىڭ قايتارا راحمەت. سىرت ەلگە بارعان سوڭ سپورت جارىستارىمەن قاتار باسقا ارتىقشىلىقتارىن دا بايقاي جۇرەسىڭ عوي. ۆولون­تەر-ەرىكتىلەردىڭ قىزمەتى قاتتى قى­زىق­تىرعان. وزىمىزبەن سالىس­تىرا­سىڭ. وسىنداي ءمىنسىز قىزمەت كور­سەتۋگە ءبىزدىڭ جاستار دايىن با دەپ. دايىن ەكەن. كەيبىر ايتۋعا تۇرمايتىن ۇساق-تۇيەك كەمشىلىكتەر بولماسا ەرىكتىلەرىمىز جارا­دى. اياقتارىنىڭ ۇشىمەن قىزمەت ەتتى. شەتەلدىكتەردىڭ ءبىزدىڭ ەل تۋرالى وي ءتۇيىپ كەتۋى وسى قىزمەتتەن باستالادى عوي. جانكۇيەرلەرگە راحمەت. جا­رىس­تىڭ العاشقى كۇندەرى ويىن­دار ايعا سوزىلاتىنداي اسىقپاعا­نى­مەن سوڭىندا ىشقىندى. رەداكتسيا تاپسىرماسىمەن قىزدار اراسىنداعى شايبالى حوككەيگە جاۋاپتى بولعام. بالۋان شولاق اتىنداعى سپورت سارايىنا ەرتەرەك كەلسەك جانكۇيەرلەر اراسىن­دا تانىس تۇلعا ءجۇر. زۋراب. شىم­كەنتتەگى گرۋزين مادەني ورتالى­عى­نىڭ توراعاسى. “بيلەت جوق. قولدا 8 مىڭ تەڭگە ەكەن. ءتورت بيلەتكە اقشام جەتپەي قالىپ, با­لام­دى وسىنداعى تانىسىما جىبەردىم. قازاقستان فينالدا ويناپ جاتقاندا ۇيدە قالاي تىنىش جاتامىن, تەلەديداردان كور­گەننەن سارايدا كورگەننىڭ اراسى جەر مەن كوكتەي”, دەيدى قازاقستان حوككەيىنىڭ جانكۇيەرى ءوزىمىزدىڭ گۇرجى جىگىت. مەدەۋدە دە وسىنداي. زەينەتكەرلەردى دە كورەسىڭ. ىرگەسىندە ءۇل­كەن دودا ءوتىپ جاتقان سوڭ شىداي الماعان. پەريزات حاسەنوۆا اپايىمىز­دىڭ جاسى 61-دە. الماتىداعى №1 قۇلاعىنىڭ مۇكىسى بار بالالار مەكتەبىنىڭ مۇعالىمى. ءبىر توپ شاكىرتتەرىمەن كەلىپتى. – مۇنداي ويىن قازاقستانعا ەندى قاشان ورالادى. ازيادا 45 مەم­لەكەت بار ەكەن. مەن وتكىزەيىن دەپ سۇرايتىندارى بولمايدى دەي­سىڭ بە, بولادى. ادەپكىدە بالالار كورسىن دەپ ەدىم, ءوزىم قىزىعىپ كەتتىم. ءار ويىنىنا كەلىپ ءجۇرمىن,–دەيدى. سپورتشىنى جەڭىسكە جەتكىزە­تىن – جانكۇيەر دەمەۋى. ونى ساڭ­لاق­تارىمىز ايتىپ جاتىر. قازاق­ستان ازيا ويىندارىندا مارەگە شاشا­سىنا شاڭ جۇقپاي كەلسە, وندا جانكۇيەرلەردىڭ دە ەڭبەگى زور. باقتيار تايجان. وڭتۇستىك قازاقستان وبلىسى.