استانا-داكار: ساياسي راللي جالعاسۋدا

بۇدان بۇرىن حابارلاعانىمىزداي, استاناعا سەنەگال رەس­پۋبليكاسىنىڭ مەملەكەتتىك ءمينيسترى – سىرتقى ىستەر ءمينيسترى مادينە نيانگتىڭ كەلگەنى ءمالىم. ەلوردادا وتكەن بۇل قۇرمەتتى قوناقپەن كەزدەسۋلەر بارىسىندا تالقىعا سالىنعان ەڭ باستى ماسەلەلەردىڭ ءبىرى ەكى ەلدىڭ حالىقارالىق ۇيىمدار شەڭبەرىندەگى ءوزارا ىقپالداستىعى بولدى. اتاپ ايتقاندا, مۇندا بۇۇ جانە اعىمداعى جىلدىڭ جازىندا توراعالىعى قازاقستانعا وتەتىن يكۇ اياسىنداعى ىنتىماقتاستىق ماسەلەلەرى قاراستىرىلدى. قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ ءوز ارىپتەسىن قازاقستاندىق توراعالىقتىڭ الدىن-الا كۇن تارتىبىمەن تانىستىردى. قازىرگى تاڭدا يكۇ ءسامميتىنىڭ توراعاسى بولىپ سانالاتىن سەنەگال سىرتقى ىستەر ءمينيسترى, ءوز كەزەگىندە, قازاقستاندى وتكەن جىلعى ەقىۇ-داعى جەمىستى توراعالىعىمەن قۇتتىقتاي وتىرىپ, پرەزيدەنت ن. نازارباەۆ يكۇ جانە ونىڭ ينستيتۋتتارىنىڭ دامۋىنا ەلەۋلى ۇلەس قوسا­تى­نىنا سەنىمىن ءبىلدىردى. داكار استانانى يكۇ سىرتقى ىستەر مينيسترلەر كەڭەسىندە توراعالىق ەتۋدى تولىق قولدايتىندىعىن جەتكىزدى. تاراپتار سونىمەن قاتار, حالىقارالىق جانە ايماقتىق قاۋىپ­سىز­دىككە قاتىستى وزەكتى ماسەلەلەر جونىندە دە پىكىر الماستى. قا­زاق­ستاننىڭ ورتالىق ازياداعى ءرولىن, سونداي-اق سەنەگالدىڭ باتىس افريكاداعى بىتىمگەرشىلىك ارەكەتتەرگە بەلسەندى اتسالىسۋىن ەسكەرە وتىرىپ, م.نيانگ پەن ق.ساۋداباەۆ ايماقتىق قاۋىپسىزدىك پەن الەم­دەگى تۇراقتىلىقتى قولداۋدىڭ ماڭىزدىلىعىن اتاپ ءوتتى. وسى ورايدا مينيسترلەر ەگيپەتتە جالعاسىپ وتىرعان داعدارىستى تالقىعا سالىپ, اتالمىش ەلدەگى جاعداي جاقىن ارادا تۇراقتالادى دەپ سەنىم ارتتى. كەلىسسوزدەر سوڭىندا ق.ساۋداباەۆ جانە م.نيانگ ەكى ەلدىڭ سىرتقى ساياسات ۆەدومستۆولارى اراسىنداعى كەڭەستەر جونىندە ءوزارا تۇسىنىستىك تۋرالى مەموراندۋمعا قول قويدى. بۇل ءراسىم اياقتال­عاننان كەيىن جۋرناليستەر الدىندا ءسوز سويلەگەن سەنەگال ءمينيسترى: «ءبىز جاڭا عانا قول قويعان قۇجات تەك قازاقستان مەن سەنەگال اراسىنداعى عانا ەمەس, سونىمەن قاتار باتىس افريكا جانە ورتالىق ازيا اراسىندا ورناتىلعان ديپلوماتيالىق قاتىناستاردىڭ جارقىن كورىنىسى», دەپ اتاپ ءوتتى.