اۋدان اكىمى جانگەلدى راحمەتقاليەۆتىڭ ايتۋىنشا, وتكەن جىلى يندەردە 1 ميلليارد 326 ميلليون تەڭگەنىڭ ونەركاسىپتىك ءونىمى ءوندىرىلىپتى. بۇل الدىڭعى جىلمەن سالىستىرعاندا, 217 ميلليون تەڭگەگە ارتىق. «BIAS TECH» جشس كاسىپورنىندا 500 توننا گيپس, 2192 توننا گيپس سىلاعى, 517 توننا گيپس نەگىزىندە جىككە ارنالعان قۇرام جانە 97 توننا گيپستەن الىنعان جەلى ونىمدەرى وندىرىلگەن. قازىر زاۋىتتا 78 ادام تۇراقتى جۇمىسپەن قامتىلىپ وتىر ەكەن.
جولداسبەك شوپەعۇل, اتىراۋ وبلىسى.
2718 وڭىردە ءبىر دارىگەر وسىنشاما بالانىڭ دەنساۋلىعىنا جاۋاپتى. سوڭعى 10 جىلدا قىزىلوردا وبلىسىندا دەموگرافيالىق ءوسىم جوعارىلاعان. ماسەلەن, 2000 جىلى تۋ كورسەتكىشى 20,1 پايىز بولسا, 2010 جىلى 28,9 پايىزدى قۇراعان. وبلىستا دەموگرافيالىق كورسەتكىش جوعارى بولعانىمەن, مەديتسينا ماماندارىنىڭ جەتىسپەۋشىلىگى بايقالادى. بۇگىندە ايماقتا 129 اكۋشەر-گينەكولوگ جۇمىس ىستەيدى. بۇل – ءبىر بالا دارىگەرى 2718 نارەستەنىڭ دەنساۋلىعىنا جاۋاپتى دەگەن ءسوز. ال زاڭ بويىنشا ءبىر دارىگەر تەك 800 بالانى عانا ەمدەۋى كەرەك. دەسەك تە, انا مەن بالا ءولىمىن بولدىرماۋ ماقساتىندا كوپتەگەن ىستەر قولعا الىندى. 2009 جىلى اۋرۋحانالارعا 163,0 ملن. تەڭگەگە مەديتسينالىق جابدىقتار جەتكىزىلسە, 2010 جىلى ءتورت ولشەمدى ۋزي اپپاراتتارى, تاعى دا باسقا قۇرال-جابدىقتارمەن تولىققان.
ەرجان بايتىلەس, قىزىلوردا وبلىسى.
350 بۇل – باتىس قازاقستان وبلىسىندا تىركەلگەن ۇكىمەتتىك ەمەس ۇيىمدار سانى. ونىڭ جۇزدەن استامى 13 الەۋمەتتىك باعىت بويىنشا بەلسەندى قىزمەت اتقارىپ كەلەدى. وبلىستاعى ۇكىمەتتىك ەمەس سەكتور بيلىك پەن حالىق اراسىنداعى بايلانىس قىزمەتىن اتقاراتىن, ءارى كوپشىلىكتىڭ تالاپ-تىلەكتەرىن جوعارىعا جەتكىزە الاتىن ىرگەلى ۇيىمعا اينالىپ وتىر. اقجايىق اۋماعىندا جۇرگىزىلگەن ساۋالداما قورىتىندىسىنا سۇيەنەر بولساق, رەسپوندەنتتەردىڭ 63,6 پايىزى مەن تۇرعىنداردىڭ 48,2 پايىزى ۇەۇ قىزمەتى قاجەت دەپ سانايدى. مۇنى بيلىك تە انىق سەزىنەدى. ايتالىق, وسىدان ءتورت جىل بۇرىن وبلىستا ۇەۇ-نى دامىتۋعا بولىنگەن قارجى تەك 4 ميلليون تەڭگەنى عانا قۇراسا, بيىل 22 ميلليون 500 مىڭ تەڭگەگە جەتىپ وتىر.
تەمىر قۇسايىن, ورال.
