قازاقستان تاريحىنىڭ جارقىن بەتى

جەكسەنبى كۇنى الماتىداعى بالۋان شولاق اتىنداعى سپورت سارايىندا 7-ءشى قىسقى ازيا وي­ىن­دارى سالتاناتتى تۇردە جابىلدى. وندا ەلباسى نۇرسۇلتان ءابىش ۇلى نازارباەۆ ءسوز سويلەدى. قۇرمەتتى مەيماندار! قىمباتتى سپورتشىلار! قادىرلى وتانداستار! بۇگىن استانا مەن الماتىنىڭ اراسىن سپورتتىق دۋمانعا بولە­گەن 7-ءشى قىسقى ازيا ويىندارى ءوز مارەسىنە جەتتى. جارىس جەڭىمپازدارى مەن ءجۇل­دەگەرلەردى وسى مەرەيلى ساتپەن قۇتتىقتايمىن! ادىلدىك پەن شەبەرلىك استاس­قان ءدۇبىرلى دودا ناعىز مىقتى­لاردى انىقتاپ بەردى. ازيادا بارىسىندا دوستىقتىڭ ىزگى جالاۋى جەلبىرەپ, قۇرلىق ەل­دەرىنىڭ ءانۇراندارى شىرقالدى. بۇل سپورت مەرەكەسى تاۋەلسىز قازاقستان تاري­حىنىڭ جارقىن بەتتەرىنە اينالادى دەپ سەنەمىن. ازيادانى جوعارى دەڭگەيدە ءوت­كىزۋگە ۇلەس قوسقان بارشا ما­مان­دارعا, سپورتشىلارعا ريزاشى­لىعىمدى بىلدىرەمىن. بايراقتى باسەكەدە قازاقستان نامىسىن قورعاعان سپورتشىلارعا دا ايرىقشا العىس ايتامىن. ءبىزدىڭ اتلەتتەرىمىز جوعارى جە­تىستىكتەرىنە قول جەتكىزىپ, ەل تاۋەلسىزدىگىنىڭ 20 جىلدىعىنا تاماشا تارتۋ جاسادى. استانادا جاعىلعان ازيادا الاۋ­ىنىڭ جىلۋى ءار جۇرەكتە ۇزاق ساقتالادى دەپ سەنەمىن. بارشاڭىزعا قازاقستانعا دەگەن ىستىق ىقىلاس­تارىڭىز ءۇشىن شىنايى العىسىمدى بىلدىرەمىن. كەلەسى قىسقى ازيادانى ءوت­كى­زۋ مارتەبەسى جا­پونياعا بەرىلىپ وتىر. ازيا سپورتىنىڭ جۇلدىزى جارقىراي بەرسىن! قىمباتتى ويىنعا قاتىسۋ­شى­لار! قىمباتتى قازاقستاندىقتار, شەتەلدىك قوناقتار! 7-ءشى قىسقى ازيا ويىندا­رى­نىڭ سوڭعى كۇنى تاريحقا ەنىپ بارا جاتىر! ولار حالىقارالىق ءومىردىڭ اۋ­قىمدى وقيعالا­رىنا اينالدى. استانا مەن الماتىنىڭ سپورت الاڭدارىندا جيىرما جەتى مەملەكەتتەن كەلگەن ۇزدىك اتلەتتەر ءادىل كۇرەستە باس قوستى. العاش رەت 69 مەدالدار جي­ىن­تىعى ساراپقا سا­لىندى. بۇل – قىسقى ازيادا ءۇشىن رەكورد. كوماندالىق ەسەپتە ءبىزدىڭ سپورتشىلار تاماشا ناتيجەلەرگە جەتكەنىنە مەن قۋانىشتىمىن. قازاقستان وسىنداي جوعارى دەڭگەيدەگى جارىس­تاردى وتكىزۋگە قابىلەتتى قۇرلىقتىق دەرجاۆالار قاتارىنا قوسىلدى. ازيادا كۇشتىڭ, ادەمىلىكتىڭ جانە قايىرىم­دى­لىقتىڭ ناعىز سالتاناتىنا اينالدى. ءبىز سپورت مەرەكەسىن بەيبىتشىلىك پەن دوس­تىقتىڭ دا مەرەكەسىنە اينالدىرا الدىق. وسىناۋ كۇندەردە ءار ەلدەن كەل­گەن مىڭداعان ادام ءبىر-ءبىرى­مەن كەزدەسىپ, اڭگىمەلەستى, ءوزارا ءبىلىستى. كوپتەگەن ادامدار قازاق­ستان­دا جاڭا دوستار تاپتى. ءبىزدىڭ بارلىعىمىز دا, ءار ءتۇرلى حالىقتاردىڭ وكىلدەرى رۋحاني تۇرعىدا باي تۇستىك, جانىمىز جومارتتانا ءتۇستى. ءبىز ءبىر-ءبىرىمىزدى جاقسىراق تاني تۇستىك. ازيادانىڭ ەڭ باستى جەتىستىگى دەپ شىن مانىندە وسىنى ايتۋ كەرەكتىگىنە سەنىمدىمىن. قىمباتتى دوستار! قازىر ءبىز 7-ءشى قىسقى ازيا وي­ىندارىمەن ريزا­شىلىقپەن قوش­تاسىپ وتىرمىز. ولار بىزگە كەرەمەت تە ۇمى­تىلماس ساتتەر سىيلادى. بۇل ەرەكشە ويىندار بولدى. اشىلۋى استانادا, ازيادا­نىڭ ەڭ ءسولتۇس­تىكتەگى ەلوردا­سىن­دا ءوتتى. ءبىزدىڭ قوناقتارىمىز الەمدەگى ەڭ بيىك تاۋداعى مۇز ايدىنى – «مەدەۋدى» كوردى. ءبىزدىڭ ويىندارىمىزدا العاش رەت قازاق­ستاننىڭ 20 قالاسىن اينالىپ وتكەن وليمپيا­لىق الاۋ ەستافەتاسى بولدى. ازيانىڭ وليمپيالىق كەڭەسى ەستافەتانى جۇيەلى ەتۋگە شەشىم قابىلدادى. ازيادانىڭ قايىرىمدى سيم­ۆو­لى – ءبىزدىڭ قازاقستاندىق با­رىس – جۇرتتىڭ بارىنە جاقىن ءارى بىرگە تۋعانداي بولدى. بارلىقتارىڭىزدى 7-ءشى قىس­قى ازيا ويىندا­رىنىڭ اياق­تا­لۋى­مەن قۇتتىقتايمىن, مەن سىزدەرگە: «جاڭا كەزدەسۋلەرگە دەيىن!» دەيمىن. قادىرلى مەيماندار! قىمباتتى وتانداستار! وسىمەن 7-ءشى قىسقى ازيا وي­ىندارىن سالتانات­تى تۇردە جا­بىق دەپ جاريالايمىن!