شاپپاي بايگە الاتىن كوماندا

اسپانمەن امانداسقان اق باس الاتاۋدىڭ الاقانىندا وتىرعان اتاقتى مەدەۋ مۇز ايدىنى. بەندي. مۇز ايدىنىندا قازاقستان-موڭ­عو­ليا قۇرامالارى. العاش رەت قىسقى ازيا ويىندارىنا «سايگ ۇلىگىن» ۇكى­لەپ قوسقان دوپتى حوككەيدەن جا­رىسقا ءۇش قۇراما عانا قاتىسىپ جا­تىر. قىرعىزستاننىڭ ءبىرىنشى رەت قاتىسۋى. ولار العاشقى ماتچىندا موڭعوليا قۇراماسىنان 17:2 ەسەبىمەن ۇتىلعان. سودان سوڭ الەمدەگى تورتتىكتىڭ ىشىنە كىرىپ جۇرگەن قا­زاق­­ستاننىڭ قولىنا ءتۇستى. ەسەپ – 21:0. وسى ناتيجەلەرگە قاراپ قازاق­ستان-موڭعوليا كەزدەسۋىندە قاي قۇرامانىڭ جەڭىسكە جەتەتىندىگى بەسەنەدەن بەلگىلى ەدى. سولاي بولدى. ماتچ باستالى­سىمەن جىگىتتەرىمىز قارسى قاقپاعا اتوي سالدى. قىرعىزداردى جەڭىپ, ءسال دە بولسا كوڭىلدەرى كوتەرىلىپ قالعان موڭعولدار باستاپقىدا ەكى-ءۇش شابۋىلدى تويتارعا­نىمەن, قاي­قى تاياقشانى قايقى قىلىشتاي سەر­مەيتىن باعلاندارىمىزدىڭ تەزىنە توتەپ بەرە المادى. موڭعول­دار­دىڭ قاقپاسىنىڭ تىعىنىن ءوت­كەن­دە عانا قىرعىزدار قاقپاسىنا 8 رەت ات ويناتىپ كىرگەن سۇرمەرگەن راۋان ەساليەۆ ويىننىڭ بەسىنشى ءمينو­تىن­دە اشىپ بەردى. قاندى باسىڭ بەرى تارت دەپ. وسىدان كەيىن-اق موڭعولداردان دەگبىر كەتتى. اراعا ەكى ءمينوت سالىپ, سۇر جەبەدەي سۋى­رىلعان ەسكەندىر نۇع­مانوۆ گول سوق­تى. تاۋدان ءتۇيىلىپ كەلگەن تۇمان ايدىندى باسىپ قالسا دا جىگىتتەرىمىز قيمىلدارىن باسەڭدەتپەدى. ويىندى كەيىنگە شەگەرە مە دەگەن قاۋىپتى تابيعاتتىڭ ءوزى سەيىلتتى. تۇ­مان ەتەگى ءتۇرىلدى. ونىنشى مي­نو­تتە راۋان تاعى دا قاقپانى قان­دا­دى. 15-مينوتتە اسقار تەمىراليەۆ سۋى­رىلدى. سودان سوڭ راۋان مەن ەسكەندىر اتقا قايتا ءمىندى. كەزەك-كەزەك گول سوعا­دى. ويىننىڭ 40-شى مينوتىندە ۆلاديمير نوۆوشيلوۆ­قا كەزەك زورعا ءتيدى. ءبىرىنشى كەزەڭ – 9:0. موڭعول حوككەيشىلەرى ەسىنەن تانعانداي كۇي كەشىپ, ۇزىلىسكە كەتتى. ەكىنشى كەزەڭنىڭ 48-ءشى مينوتىندە تاعى دا ەسكەندىر نۇعمانوۆ ەسەپ اشتى. ودان كەيىن ارينە جاي وعىن­داي جارقىلداعان راۋان ەساليەۆ. تەك 78-ءشى مينوتتە عانا ارىس­تان قا­زى­باەۆتىڭ قاقپا كىلتىن تاپقانى بولماسا, بۇل ماتچ راۋان­نىڭ جەكە باسىمدىعىمەن ءوتتى. راۋان بۇل جولى 10 گول سوقتى. ارينە, كومان­دالىق سەرىكتەرىنىڭ جاردەمىمەن. – بۇدان دا كوپ گول سوعۋعا مۇمكىندىگىمىز بولدى, – دەيدى ول. – بىراق فينالدىق ويىنعا كۇش ساق­تاۋىمىز كەرەك. موڭعولدار وسال دەپ ايتا المايمىن. تەگەۋرىن بار. ناشار كوماندا الەم چەمپيو­ناتى­نا قاتىسپايدى. ولار اقتىق سىندا بارىن سالاتىن شىعار. باقتيار تايجان.