«قۇس قاناتتى» جىگىت

قازاقستاندىق تۇعىردان سەكىرۋشىلەر اراسىندا ەڭ جاسى, «ۇش­قىش شاڭعىشى» اتانعان ەۆگەني لەۆكين ك-95 ترامپلينىنەن سەكىرۋدەن التىن مەدالدى جەڭىپ ال­دى!  وتان­داسىمىز  سايىستىڭ ەكى راۋندىندا ۇزدىك ناتيجە كورسەتتى. سپورتشى 252 ۇپاي جينادى. ەكىنشى ورىندا 248,5 ۇپاي جيناعان, ك-125 ترامپلينىنەن سەكىرۋ بو­يىن­شا ازيادا چەمپيونى اتانعان – جاپوندىق كازۋيا يوشيوكا. ءۇشىنشى ورىن 244 ۇپاي العان كەلەسى قازاقستاندىق سپورت­شىنىڭ ەنشىسىندە – راديك جاپاروۆ قولا جۇلدەگەر! بۇل 10 جاستان بەرى سپورتپەن اينالىسىپ جۇرگەن 18 جاستاعى ەۆگەني لەۆكينننىڭ العاشقى ال­تىن جۇلدەسى. ۇلكەن كەلەشەگى بار جاس سپورتشى سايىس كۇندەرىنىڭ با­رى­سىن­دا ۇزدىك ناتيجەلەر كور­سەتىپ, جا­پوندىقتار التىن الا­تى­نىنا سەنىمدى بولعانىنا قا­را­ماستان, ءوزىنىڭ باس جۇلدەگە لا­يىق ەكە­ن­دىگىن ءدا­لەل­دە­گەن ەدى. جارىس بىتكەننەن كەيىن ال­دىمەن باق وكىل­دەرىنىڭ قولپا­شى­نا يە بولعان ەۆگەني جۋرنا­ليس­تەر­دىڭ جابىلا قويعان جالعىز سۇراعىنا: – قۋانىشىم قوينىما سىي­ماي تۇر. جاپون كازۋيا يوشيو­كا­نى باس قارسىلاسىم دەپ سانادىم. الايدا, مەن ودان مىقتى بولىپ شىق­تىم. ازيادا چەمپيونى اتان­عانى­ما ءالى سەنبەي تۇرمىن. جەڭىسىمدى اتا-اناما ارنايمىن! – دەدى. بۇل كەزدە جاپونيا سپورت­شى­لارى جابىرقاۋلى بولاتىن. بار­لىق كەزدە ۇستامدى بولىپ كەلگەن جاپونيا قۇراماسىنىڭ تۇعىردان سەكىرۋ بويىنشا جاتتىق­تىرۋ­شىسى كەندجي سيۋدا ك-95 ترامپلينىندە وتكەن جارىستاردان كەيىن كوڭىلى وتە تومەن بولدى: – مەن ازياداعا ەڭ ۇزدىك سپورت­شىلاردى الىپ كەلگەنمىن. جانە بىزدەر ترامپليننەن سەكىرۋ سا­يىس­تارىنىڭ بارلىق التىن­دارىن جە­ڭىپ الاتىنىمىزعا سەنگەن ەدىك. بولمادى... جارىس الدىندا حالىقارالىق ترامپليندەر كەشەنىن تۇمان با­سىپ, جاڭبىر سىركىرەپ تۇردى. الايدا, قازاقستاننىڭ ترامپليننەن سەكىرۋ فەدەراتسياسى وكىلدەرى  جارىس­تاردى كەيىنگە قالدىرۋدىڭ قاجەتى جوق, سايىس بەكىتىلگەن كەستە بويىن­شا وتەدى, دەپ ءمالىم­دەگەن بولاتىن. شاڭعىمەن تۇعىر­دان سەكىرۋ بو­يىن­شا ازيادانىڭ جارىستار دي­رەك­تسياسى اۋانىڭ جوعارى ىلعال­دى­لىعى مەن تۇمان ك-95 ترامپلينىندە جەكە سەكىرۋشىلەر اراسىنان ءۇز­دىكتەردى تانۋعا كەدەرگى بولماي­دى, دەپ سەندىردى. الاڭداۋلى جۇرتقا قازاقستان قۇ­راماسىنىڭ سەكىرۋشىسى كونستانتين كورولەۆ: «جىلدامدىق الاتىن ايماقتى جاقسى دايىنداپ قويدى. قار جاقسى نىعىزدالعان. ارينە, جاڭبىر جاۋىپ تۇرعان سوڭ كەي جەرلەر باتپاق. بىراق جارىس­تارعا ول كەدەرگى كەلتىرمەيدى. ءبىز سايىستى باس­تاۋعا ءازىرمىز. جاقسى كورسەتكىش­تەرگە قول جەتكىزەمىز دەپ ويلايمىز» دەپ وي ءبو­لىس­كەن ەدى. ترامپلين قىز­مەت­كەرلەرى: –  تورەشىلەر سپورتشىلاردى, ال سپورتشىلار ءترامپليننىڭ بار ايماعىن كورىپ تۇرادى. سون­دىق­تان جارىستار قالىپتى جۇمىس تارتىبىندە وتەدى. سەكىرۋشىلەر اۋا رايىنىڭ بارلىق جاعدايىنا دا­يىن, ولار اناۋ-مىناۋعا تاڭ­عالىپ, ابىرجي قويمايدى, – دەدى. حالىقارالىق ترامپليندەر كەشەنى وسىلايشا  الدىن-الا, ءبىر كۇن بۇرىن ك-95 ترامپلينىنەن سەكىرۋ جارىستارىنا ساقاداي سايلانا باستاعان. «جەرگە قونۋ» اي­ما­عىنا ماماندار 30 سانتيمەتر قول­دان جاسالعان قار شاشىپ ۇلگەردى (حالىقارالىق ستاندارت بويىنشا قار قالىڭدىعى 25 سانتيمەتردەن كەم بولماۋى ءتيىس). جىلدامدىق الاتىن ايماقتى قاتىرىپ جاتتى. جارىستاردىڭ باس تورەشىسى ەد­ۆارد لەۋشين اۋا تەمپەراتۋراسى 8 گرادۋستان كوتەرىلمەسە, ءبارى ويداعىداي بولاتىنىنا سەندىرىپ: «ەگەر اۋا رايى كۇرت وزگەرىپ جاتسا, جارىستاردى كەيىنگە قال­دىرۋ­عا حاقىمىز بار. ءتىپتى, سايىس­تاردى تۇندە دە وتكىزە الامىز. ترامپليندەرگە جارىق ءتۇسىرىپ تۇراتىن شام كوپ. قاتتى جاۋىن-شاشىن بولا قالسا, باسىلعانشا كۇتەمىز. ال جاڭبىر اقىرىن عانا سىركىرەپ نەمەسە قار ازداپ قانا جاۋىپ تۇرسا, وندا جارىسىمىزدى باستاي بەرەمىز. ءبىزدىڭ باستى مىندەتىمىز – ترامپليننەن سەكىرۋشى­لەردىڭ قاۋىپسىزدىگىن قامتاماسىز ەتۋ. تەك حالىقارالىق شاڭعى سپورتى فەدەراتسياسى جارىستار وتكىزۋگە كەلىسىم بەرسە, وندا ترامپلين – سايىستارعا ساقاداي ساي», – دەگەن ەدى. سونىمەن 4 اقپان قازاقستان, جاپونيا, كورەيا جانە قىتايدىڭ ترامپليننەن سەكىرۋ جارىس­تارى­نا قاتىساتىن سپورتشىلارى ءۇشىن سايىستىڭ سوڭعى كۇنى بولاتىن. مىنا قىزىقتى قاراڭىز, جاتتىعۋ جارىستارى كەزىندە ەڭ جاقسى كورسەتكىشتەردى جاپون كازۋيوشي فۋناكي مەن كورەي چوي حيونگ چۋل   كورسەتكەن-ءدى. بۇل كەزدە يۋحەي ساساكي جاپون سە­كىرۋ­شىلەرىنىڭ جەڭەتىندەرىنە سەنىمدى ەدى. بايقاۋ كەزىندەگى العاشقى ەكى سەكىرىستىڭ ناتيجەسى بويىنشا, ك-95 ترامپلينىنەن ەڭ جوعارى كورسەتكىشكە جەتكەن – قازاق­ستان­دىق راديك جاپاروۆ بولاتىن. ناتيجەسىندە, جەرلەسىمىز قولا ءجۇل­دەگەر اتاندى. ايناش ەسالي.