جاستار جانە جۋرناليستيكا

كەشە قازاقستان رەسپۋبليكاسىنىڭ تۇڭعىش پرەزيدەنتى — ەلباسى كىتاپحاناسىندا تاۋەلسىزدىكتىڭ 25 جىلدىعى مەن اقپارات جانە بايلانىس قىزمەتكەرلەرى كۇنىنە ارنالعان «جاس مەديا. اقپاراتتىق تەحنولوگيالار مەن قازاقستان مەديا سالاسىنىڭ زاماناۋي تۇجىرىمداماسى» تاقىرىبىندا فورۋم ءوتتى. بۇگىنگى تاڭدا جۋرناليستيكا سالاسىنا قۇلشىنىس تانىتىپ كەلەتىن جاستارعا قولداۋ كورسەتۋ جانە ولاردىڭ قوعام اراسىن­دا اقپارات الماسۋ جۇيەسىن دامى­تۋعا ۇلەس قوسۋ, سونداي-اق, اقپا­رات­تىق تەحنولوگيالاردى دامىتۋ جانە IT-ماماندىقتاردىڭ بەدەلىن ارتتىرىپ باق جانە ءباسپاسوز قىزمەتتەرىنىڭ بىلىك­تىلىگىن كوتەرۋ ماقساتى كو­ز­دەلگەن فورۋمدى «پرەسس-تسەنتر ازيا» قوعامدىق قورى مەن «Samruk-Kazyna Trust» الەۋ­مەتتىك جوبالاردى دامىتۋ قورى ۇيىمداستىردى. سونىمەن قاتار, قازاقستان جاستار كونگرەسىنىڭ قاتىسۋى­مەن وتكەن ءىس-شارادا جاس جۋر­ناليس­تەر­دىڭ كادرلىق الەۋەتىن ارتتىرۋ, وقيعالاردى حالىققا وبەك­تيۆتى ءارى ساپالى جەتكىزۋ تاقى­رىپتارى جان-جاقتى قام­تىلدى. بۇل رەتتە ءسوز ال­عان ءبىلىم جانە عىلىم مي­نيسترى ەرلان ساعاديەۆ جالپى العان­دا, ەلىمىزدىڭ جاستارىنا مول ءۇمىت ارتاتىنىن جانە وسىن­دا بولا­شاق مينيسترلەر مەن مەديا باسشىلارى وتىرعانىنا سەنە­تى­نىن جەتكىزدى. بۇگىن­گى كۇن­نىڭ ءبىلىم سالاسىنداعى وزەك­تى تاقىرىپقا اينالعان ءۇشتىلدى­لىك ماسەلەسىنە توقتالعان ول, وسى ماسەلە كوتەرىلسە بولعانى, جۇرت­­شىلىقتىڭ ءبىرىنشى كەزەكتە اعىل­شىن ءتىلىن ويعا الاتىنىن ايتتى. بۇل رەتتە ول ۇشتىلدىلىك – ەڭ ءبىرىنشى قازاق ءتىلى تۋرالى باعدارلاما ەكەندىگىن ەسكەرتە وتىرىپ, اۋەلگىدە قازاق تىلىنە ءمان بەرىلۋى تيىستىگىن نازارعا الدى. ونىڭ ايتۋىنا قاراعاندا, قازاق ءتىلىنىڭ جاعدايى قازىرگى تاڭدا جامان ەمەس, ياعني بۇگىندە وقۋ­شىلاردىڭ 70 پايىزى قازاق ءتىلىن­دە وقيدى. وعان دالەل, كۇنى كەشە وتكەن ۇلتتىق بىرىڭعاي تەستىلەۋدى 72 پايىزعا جۋىق وقۋ­شى قازاق تىلىندە تاپسىرعان. دەگەنمەن, ورىس مەكتەپتەرىن­دە وقيتىن 500 مىڭ بالانىڭ قازاق­شا سويلەمەيتىندىگى باستى ماسە­لەلەردىڭ ءبىرى ەكەندىگىن ايتا كەلە, مينيسترلىك الدىندا الداعى 3-4 جىلدا وسى بالالاردى قازاق­شا سويلەتۋ مىندەتى تۇرعاندىعىن كولدەنەڭ تارتتى. «تۇسىنىكتى جاع­داي. ادىستەمە دۇرىس ەمەس. ەڭ الدىمەن دۇرىس ادىستەمە جاساۋ كەرەك. بىرنەشە زياتكەرلىك ينس­تيتۋت بىرلەسىپ وسى باعىتتا جۇمىس­تار جۇرگىزىپ جاتىر. جاڭا ادىستەمە دايىن بولسا, 2017 جىلدان باستاپ ورىس مەكتەپتەرىندە قازاق تىلىندە وتەتىن ساباقتار وزگەرە باستايدى. زاماناۋي عىلىمي نەگىزدە جاسالعان, كومپيۋتەرلىك مودەلدەۋدەن وتكەن, التى ايدا ءتىل ۇيرەتەتىن ادىستەمە جاساپ جاتىرمىز. ءۇش جىلدىڭ ىشىندە بالالاردىڭ بارلىعى قازاقشا سويلەيدى. مەن وعان سەنىپ وتىر­مىن», دەدى مينيستر ءوز سوزىندە. سونداي-اق, الەمدە ەكى تىلدە بىردەي ويلايتىن جاستارى بار ەلدىڭ از ەكەندىگىن, وسى ورايدا ەكى ءتىلدى ەركىن مەڭگەرگەن ازا­ماتتاردىڭ باسقا دا تىلدەردى ءبىلۋى ءتىپتى وڭاي بولاتىنىن اتاپ ايتتى. كورشى ەلدەرمەن سالىستىرىپ كورىڭىز, كىمدەر بار ورىس ءتىلىن ءمىنسىز سويلەيتىن؟ ءبىز وسى جەردە ۇلت رەتىندە قانشالىقتى ەرەكشە ەكەندىگىمىزدى, ءتىلدى تەز ۋاقىتتا مەڭگەرۋدە قازاقتاردىڭ قابىلەتىن بىلەمىز.تەك دۇرىس ادىستەمە مەن وقىتۋ جۇيەسىن جانداندىرۋ قاجەت», دەدى مينيستر. ەلميرا ماتىباەۆا, «ەگەمەن قازاقستان»