«اۆتوبۋس كۇتكەن ارعىماقتار»

بۇگىندە الەۋمەتتىك جەلىلەردى ايالدامادا ۇيەزدەپ تۇرعان ءبىر ءۇيىر جىلقىنىڭ سۋرەتى كەزىپ ءجۇر. ءبىر قاراعاندا, مۇنىڭىز – ساپارلارعا ءجيى شىعىپ جۇرگەن قازاقستاندىقتاردىڭ كۇندەلىكتى ومىردە ءجيى كۋا بولىپ جۇرگەن كورىنىستەرىنىڭ ءبىرى عانا. دە­گەنمەن, ماسەلە بۇل سۋرەتتى كىمنىڭ ءتۇ­سىرىپ, جەلىگە جۇكتەگەنىندە بولىپ تۇر. باقساق, بۇل سۋرەتتىڭ اۆتورى ۇلىبريتانيانىڭ قازاقستانداعى توتەنشە جانە وكىلەتتى ەلشىسى كەرولين براۋن ەكەن. جالپى, جەكە بلوگ جۇرگىزىپ, وندا ءوزىنىڭ وقىرمان­دارىنا قازاق تىلىندە ءۇن قاتىپ وتىرۋ ەلشى حانىمنىڭ سۇيىكتى ىستەرىنىڭ ءبىرى بولسا كەرەك. سونىمەن قاتار, رەسمي تۇلعا بلوگقا بەينەكورىنىستەر مەن فوتوسۋرەتتەر سالىپ, ءبىزدىڭ ەل تۋرالى ءوزىنىڭ كورىپ-بىلگەندەرىن جازىپ وتىرۋدى دا ادەتكە اينالدىرعان. تاياۋدا كەرولين براۋن ارقانىڭ ۇشقان قۇستىڭ قاناتى تالاتىن دالاسىن كوكتەي وتەتىن كۇرەجولدىڭ بويىنداعى اۆتوبۋس ايالداماسىندا كولەڭكەلەپ تۇرعان جىلقىلاردى فوتوعا ءتۇسىرىپ الىپ, facebook الەۋمەتتىك جەلىسىندە ءبىزدىڭ ەلدەگى ۇلىبريتانيا ديپلوماتيالىق وكىلدىگىنىڭ رەسمي اككاۋنتىنا جا­ريالاعان. ەلشى حانىم سۋرەتتىڭ استىنا «اۆتوبۋس كۇتكەن «ار­عىماق­تار» دەپ ازىلدەي ات قويىپ, جازبا قالدىرىپتى. جەلى قولدانۋشىلار بۇل سۋ­رەتتەگى ايالدامانى بىردەن تانىعان. ول – ۇلىتاۋ اۋدانىنداعى جەزدى ەلدى مەكەنىنە كىرەبەرىستەگى اۆتوبۋس ايالداماسى ەكەن. ينتەرنەتتى كەزىپ كەتكەن سۋرەتكە قازاقستاندىقتار عانا ەمەس, ۇلىبريتانيالىق ازاماتتار دا پىكىر ءبىلدىرىپ, ەلشى حانىمنىڭ ازىلىنە قالجىڭمەن ءۇن قوسقان. قايرات ءابىلدينوۆ, «ەگەمەن قازاقستان» قاراعاندى