ۇكىمەت «ەگەمەن قازاقستاننىڭ» اپتالىق قوسىمشاسى
دانا حالقىمىز قاشاندا ۇتىمدى ءسوزدەن ۇتىلماعان. ماسەلەن, «قۇس باعۋ دا ءبىر قىزىق, قۇس سالۋ دا ءبىر قىزىق» دەيدى. بۇعان بودەنە باعىپ, ودان كۇنكورىسىن اجىراتقان جانداردى كورگەندە كوز جەتتى. قوعامعا بەرىك ەنگەن نارىقتىق قاتىناس كىمنىڭ بولسا دا جىگەرىن جانىدى, ەڭبەككە دەگەن قۇلشىنىسىن ارتتىردى. ويتكەنى, يەن دالانى مەكەندەپ, تاۋ مەن تاستا جۇرەتىن قۇس ەكەش, قۇستى دا قولعا قوندىرعان, تابىسىنىڭ, كۇنكورىسىنىڭ كوزىنە اينالدىرعان جامبىل اۋدانى, ۇزىناعاش اۋىلىنداعى سەرگەي فەدوروۆيچ كوۆالەۆتىڭ بالا جۇدىرىعىنداي بودەنە باعىپ, قىرعاۋىلدى قولعا ۇيرەتكەنى ءبىر عانيبەت. بۇرىن قۇرىلىس سالاسىنىڭ مامانى سەرگەي توقسانىنشى جىلدارداعى جەكەشەلەندىرۋ, جاپپاي قىسقارتۋ كەزىندە العاش ابدىراپ قالعان ەكەن. وتباسىن اسىراۋ ءۇشىن جۇمىس ىزدەۋگە ءماجبۇر بولىپتى. وسىلايشا 2001 جىلى بىشكەكتەن بودەنەنىڭ جۇمىرتقالارىن اكەلىپ, ينكۋباتوردان بالاپان شىعارادى. العاشىندا بىلمەگەن ءىستىڭ وي-شۇقىرى كوپ بولىپ, بالاپانداردى كوبەيتۋ قيىندىق تۋعىزادى. قۇس ءوسىرۋ جونىندەگى عىلىمي كىتاپتاردى پاراقتاپ, قورەكتەندىرۋ جولدارىن, ەمدەۋ شارالارىن ۇيرەنۋىنە تۋرا كەلگەن. كاسىپكەردىڭ جۇمىس ورنىنا كەلگەنىمىزدە زايىبى تاتيانا ۆيكتوروۆنا ۇيرەك-قاز, تاۋىق پەن تۇيەقۇسقا, قىرعاۋىلعا جەم بەرىپ, شارۋاسىن جالعاستىرۋ ۇستىندە ەكەن. ادام جاتىرقامايتىن مىنەزىمەن جادىراي قارسى الدى. شارۋا جايىن سۇراعانىمىزدا ونىڭ بار سىرىن جۇبايى سەرگەي فەدوروۆيچ بىلەتىنىن ايتتى. سەرگەي دە شەشىلە سويلەدى. – اكەم مەن انام ەڭبەكقور بولدى. اعايىندى ۇشەۋمىزدى ەڭبەككە باۋلىدى. العاش ءۇي سالدىق, قۇرىلىستىڭ سىرىنا قانىقتىق. اكەم سوعىس ارداگەرى, مال ۇستايتىن, قويان, نۋتري وسىرەتىن. ولاردىڭ تەرىسىنەن باس كيىم تىگىپ, اۋىلداعى بازاردا ساۋدالايتىن. قولىنان شىققان باس كيىمدەردى اۋىلدا الماعان جان جوق دەسەم دە بولادى. اكەمنىڭ جۇمىسسىز وتىرعان كەزى بولعان ەمەس. ءبىزدى دە وسىعان ۇيرەتتى. ايەلدەرىمىز دە اقكوڭىل, ەڭبەكقور بولىپ كەزدەستى, – دەيدى سەرگەي. سودان بولار اكە شاڭىراعىنان الىستاماي ءبارى جاپسارلاسا ءۇي سالعان. قۇرىلىس جۇمىسى سايابىرسىعان سول جىلدارى وزىنە تانىس كاسىپتى جالعاستىرعان. العاشقى ۇيىمداستىرۋ بارىسىندا كوپ قيىنشىلىققا كەزدەسىپتى. بودەنەنىڭ جەمىن تابۋ قيىنعا تۇسكەن. وعان تاۋىق پەن قازعا ارنالعان قوسپاجەم جارامايتىن بولىپ شىعادى. ءوندىرىستىڭ ماقساتى جۇمىرتقا ءوندىرۋ بولعاندىقتان ون ەكى ءتۇرلى قوسپادان تۇراتىن جەم قاجەت. ولاي بولماعاندا ول تولىققاندى جۇمىرتقا دەپ تانىلمايدى. وسىلايشا سەرگەيدىڭ ساپالى جەم ىزدەپ, ىزدەنۋىنە, قۇس ءوسىرۋدىڭ زووتەحنيكالىق تالاپتارىنا جۇگىنۋىنە تۋرا كەلگەن. بودەنە جۇمىرتقاسى كىشكەنتاي بولعانىمەن دارۋمەندەرگە باي, جۇعىمدى. وندا امين قىشقىلى, ميكروەلەمەنتتەر جەتكىلىكتى بولعاندىقتان اسقازاننىڭ, ىشەكتىڭ جۇمىسىن جاقسارتاتىن قاسيەتتەرى مول. سونىمەن قاتار ادام جۇرەگى مەن اعزاسىنداعى تەمىر, راديونۋكليدتەردى شىعارىپ, يممۋنيتەتتى كۇشەيتەتىن اسەرى بار. سوندىقتان دا سوڭعى كەزدەرى بودەنە جۇمىرتقاسىنا دەگەن تۇتىنۋشى سۇرانىسى وسە تۇسكەن. ارنايى پاراقشالاردا بودەنەنىڭ ءبۇلدىرشىن جۇدىرىعىنداي جۇمىرتقاسىنىڭ وزگە قۇس جۇمىرتقالارىنان ەرەكشەلىگى دارۋمەندەرگە ءۇش ەسە باي, ءارى پايدالى ەكەندىگى جازىلعان. سونىمەن قاتار تاۋىق جۇمىرتقاسىنان قۋاتتىلىعى ەداۋىر كوپ سانالادى. كىشكەنتاي تارعىل ءتۇستى قۇستار ارنايى ورىندارعا ورنالاستىرىلىپ, جەمى مەن سۋى الدىنا قويىلعان. توپ-توپقا ءبولىنىپ, يەن دالادا ەركىن جۇرەتىن ەركە قۇستىڭ قاسيەتىن بىلگەن كوۆالەۆتەر اي سايىن قوماقتى قارجى تاۋىپ, ونى ءوندىرىستى كەڭەيتۋگە جۇمسايدى. بۇگىن دە ولاردىڭ ونىمدەرىن ۇزىناعاشتىقتارمەن قاتار الماتىلىقتار دا دەنساۋلىقتارىن تۇزەۋگە ەم رەتىندە قولدانىپ, العىستارىن ايتادى. شارۋاگەر وتباسى قىرعاۋىل مەن تاۋىق, تاعى باسقا قۇس وسىرەدى. قىرعاۋىلدىڭ ەتىن ينتەرنەتپەن ساۋداعا سالسا, تاۋىق جۇمىرتقاسى مەن ەتىن مەيرامحانالارعا تاپسىرىس بويىنشا وتكىزەدى. سەرگەي فەدوروۆيچ الداعى ۋاقىتتا شارۋاشىلىعىن دامىتۋدى ويلاستىرۋدا. ول ءۇشىن بودەنە سانىن كوبەيتىپ, ارنايى قوسىمشا ورىن جابدىقتاۋدى جوسپارلاۋدا. قازىرگى كەزدە شارۋاشىلىقتا ءۇش ادام جۇمىسپەن قامتىلسا, ونىڭ اۋقىمى كەڭەيگەندە جۇمىسشى سانىن ءوسىرۋدى ويلاستىرۋدا. شۇبارالا جۇمىرتقالار سالىنعان قوراپشالار كوۆالەۆتەر اۋلەتىنىڭ بۇگىنگى ەڭبەگىنىڭ جەمىسى. ال, قاۋىرسىنى تۇرلەنگەن قىرعاۋىلدى كورگەندە, دالا سۇلۋلارىنىڭ قولعا ۇيرەنىپ, ولارمەن بىرگە تىرشىلىك كەشكەنى تاڭدانىس تۋدىردى. – قۇس ءوسىرۋ ارقىلى وتباسىما قاجەتتى كىرىس كوزىن تاپتىم. سونداي-اق اۋدان ەكونوميكاسىنا قوساتىن ەلەۋلى ۇلەسىم بار. قازاقستان مەنىڭ – وتانىم. ەلباسىنىڭ ساياساتى بارشا ۇلتتاردىڭ تاتۋ-ءتاتتى ءومىر ءسۇرۋىن كوزدەيدى. ول ءۇشىن العىس ايتامىن. ۇزىناعاشتا ءوستىم, ومىرگە كەلدىم. مىنە, ءوز شارۋامدى اشىپ, ونىڭ يگىلىگىن كورۋدەمىن. باسقا بىزگە نە كەرەك, – دەيدى سەرگەي شىن پەيىلمەن. ءيا, قاراپايىم ازاماتتىڭ نيەتىنە قوسىلدىق. قۇس ءۇنى كوپكە دەيىن قۇلاقتا تۇنىپ تۇردى.كۇمىسجان بايجان.
الماتى وبلىسى.* * *
اتىمەن بىرگە, زاتىندا دا وزگەرىس كوپ
ءۇرجار وڭىرىندە بولعانىمىزدا اۋدان اكىمى باۋىرجان جاناقوۆ وسىنداعى ءار اۋىل دەرلىك وزگەرىس, جاڭالىقتان كەندە ەمەس ەكەندىگىن تىلگە تيەك ەتكەن-ءدى. ىلە اۋدان اكىمىنىڭ ورىنباسارى قابدىسادىق بايسىنوۆپەن بىرگە اۋداننىڭ ءبىر تۇكپىرىندەگى بلاگودارنىي – كەلدىمۇرات اۋىلىن بەتكە الىپ جولعا شىققانبىز.
بۇل اۋىلدىڭ اتىن قوساقتاپ ايتىپ جاتقانىمىز سول, بۇرىن ول بلاگودارنىي اتالىپ كەلسە, ەندى اۋىل, اۋدان ۇيعارىمىمەن ونى كەلدىمۇراتقا اينالدىرۋ تۋرالى ۇسىنىس ۇكىمەتكە كەتىپتى. ال كەلدىمۇرات ىرگەدەگى وزەن اتى ەكەن. وسى وزگەرىس بۇدان دا ەرتەرەك جاسالۋى ءتيىس ەكەن, قىزىق بولعاندا, سوعان وراي وتكىزىلگەن جالپى جيىندا ءوز قانداستارىمىزدىڭ ءبىرى بلاگودارنىي دەگەن ءسوز دە جامان ەمەس قوي دەپ بىتەيىن دەپ تۇرعان ىسكە بوگەت جاساپتى. ايتەۋىر, ەشتەن كەش جاقسى دەمەكشى, بۇل ءماسەلەگە دە نۇكتە قويىلعان سەكىلدى.
ايتتى-ايتپادى, زامان وزگەرىسىن ءبىر عانا وسى اۋىل ومىرىنەن بايقاۋعا بولادى. بارقىتبەل باۋرايىنداعى شوقتىعى ەڭسەلى نايزاعارا بيىگىنىڭ ەتەگىندەگى تابيعاتى اسەم بۇل وڭىردە ەرتەرەكتە قانداستارىمىز وتە از بولىپتى. ماسەلەن, وسىنداعى «كراسنىي پارتيزان» كولحوزىندا ورىس تىلدىلەر 90 پايىز بولسا, ودان قالعانى عانا ءبىزدىڭ اعايىندار ۇلەسىندە ەكەن. تاۋەلسىزدىككە قول جەتكىزگەننەن بەرگى جەردە ەندى باسقاشا جاعداي قالىپتاسىپ, جەرگىلىكتى تۇرعىنداردىڭ پايىزى 80-گە جەتىپتى. بۇل وڭىرگە قىتاي مەن موڭعوليادان كوشىپ كەلىپ ورنىعىپ جاتقان قانداستارىمىز دا بارشىلىق كورىنەدى. سول وزگەرىستەردىڭ ءبارى ەش ىڭ-شىڭسىز تابيعي تۇردە جۇزەگە اسىرىلىپ جاتقانى دا قۋانتادى.
ءسىرا, جولباسشىمىز ايتىپ قويعان بولۋى كەرەك اۋىل ازاماتتارى ءبىزدى اۋىل شەتىندە, كەلدىمۇرات وزەنىنىڭ جاعاسىندا قارسى الدى. سوڭىنان اڭعارساق, ونىڭ دا سەبەبى جوق ەمەس ەكەن. ياعني, ولار كەلدىمۇرات وزەنى ۇستىنە سوڭعى ەكى جارىم اي ىشىندە سالىنىپ بىتكەن جاڭا كوپىردى كورسەتكىسى كەلگەن عوي. ول دا ورىندى ماقتانىش پا دەدىك. ويتكەنى, بۇلاردىڭ كوپىردىڭ زارىن تارتقاندارىنا جيىرما شاقتى جىل بولىپ قالىپتى. جەرگىلىكتى تۇرعىندار وسىعان دەيىن اۋىلعا كىرىپ, شىعۋ ءۇشىن الپىس شاقىرىم اينالما جولمەن جۇرۋگە ءماجبۇر بولىپتى. ەندى, مىنە ۇزىندىعى – 30, ەنى – 6, بيىكتىگى 1,60 مەتر جاڭا كوپىر پايدالانۋعا بەرىلدى. ساپالى كوپىردىڭ جالپى قۇنى 12 ميلليون تەڭگەگە ءتۇسىپتى.
اۋىل اكىمى قابىل قاسەنوۆپەن جانە مەكتەپ ديرەكتورى جايىق جۇماعۇلوۆپەن وسى ارادا تانىسىپ جاتىرمىز. ەكەۋى دە بۇل جۇمىسقا جاڭادان كەلىپتى. راس, جايىق باۋىرىمىز بۇعان دەيىن دە وسىنداعى مەكتەپتە ديرەكتوردىڭ ورىنباسارى بولىپ قىزمەت ىستەگەن كورىنەدى. ءوزى اۋداندىق ءماسليحاتتىڭ دەپۋتاتى. ونىڭ جاڭا قىزمەتكە تاعايىندالعان بەتتە جاڭا قونىسقا جايعاسىپ جاتقاندارىنا ەرەكشە قۋانىشتى ەكەندىگى بايقالىپ-اق تۇردى. شىندىعىندا, ول قۋانسا قۋانعانداي, جاڭا مەكتەپ بارلىق تالاپقا ساي ما دەدىك. 320 ورىندىق ەڭسەلى دە ءساندى عيماراتتا 23 سىنىپ, 29 كابينەت بار ەكەن. سۋرەت, اسپازدىق بولمەلەرى جاڭادان اشىلىپتى. شەبەرحانانىڭ ءوزى ۇشەۋ. ونىڭ ءبىرى – اعاش, ەكىنشىسى – تەمىر, ال ءۇشىنشىسى ماتا ونىمدەرىن وڭدەپ, تىگۋگە ارنالعان.
مۇندا سپورت زالى دا ەكەۋ. ەكىنشىسى گيمناستيكا زالى رەتىندە جەكە پايدالانۋعا ارنالعان. ال كىتاپحانا قورى 8 مىڭنىڭ ۇستىندە. جاڭا مەكتەپتە ءتىپتى ءتىس دارىگەرىنىڭ بولمەسىنە دەيىن ءوز الدىنا. جالپى قۇنى 800 ميلليون تەڭگە بۇل مەكتەپ قۇرىلىسىن «قۇماروۆ ي ك» قۇرىلىس مەكەمەسى سالىپتى. ماناربەك قۇماروۆتىڭ يەلىگىندەگى بۇل قۇرىلىس مەكەمەسى وسىعان دەيىن وبلىس كولەمىندە 7-8 مەكتەپتى قاتارعا قوسقان ەكەن. وسى ورايدا جاڭا مەكتەپ قۇرىلىسىنا ءجۇز شاقتى جەرگىلىكتى تۇرعىن تارتىلعانىن دا ايتا كەتكەنىمىز ءجون بولار.
مەكتەپ وقۋشىلارى بۇعان دەيىن نەبارى 150 ورىندىق بۇرىنعى بالاباقشاسىندا ءۇش اۋىسىممەن وقىپ كەلىپتى. ەندى ول بالاباقشاسى رەتىندە جۇمىس ىستەمەك. ال بۇرىنعى دۇكەن ءۇيىن «جاستار ۇيىنە» اينالدىرماقپىز دەيدى اۋىل اكىمى. مۇنىڭ سىرتىندا مەكتەپ جانىنان ۇلكەندەرگە ارناپ – سپورت, ال اۋىل شەتىندە كوكپار الاڭدارىن سالۋدى ويلاستىرۋدامىز. جاڭا اۋرۋحانا بىلتىر پايدالانۋعا بەرىلگەن بولاتىن.
قابىل اكىم بۇدان كەيىن الداعى جىلى «اقبۇلاق» باعدارلاماسى بويىنشا اۋىلعا سۋ قۇبىرىن تارتۋ جۇمىسى, «جول كارتاسى» باعدارلاماسى بويىنشا جوندەۋ جۇمىستارى جۇرگىزىلمەكشى.
بۇل ءوڭىر نەگىزىنەن ەگىن, كۇنباعىس ەگۋمەن, باۋ-باقشا ءوسىرۋمەن اينالىسادى. سوعان وراي جەردىڭ توزا باستاعانى دا شىندىق. سوندىقتان اۋىل ماڭىنداعى ەگىستىك كولەمىن قىسقارتىپ, جەرگىلىكتى تۇرعىنداردىڭ مال وسىرۋىنە قولايلى جاعداي جاساماقپىز دەيدى اكىم.
داۋلەت سەيسەن ۇلى.
شىعىس قازاقستان وبلىسى, ءۇرجار اۋدانى. –––––––––– سۋرەتتە: جاڭا مەكتەپتەگى ەڭبەككە باۋلۋ كابينەتى.* * *
قوبدالىقتار قىستان قىسىلمايدى
بىرىڭعاي اۋىل شارۋاشىلىعىمەن اينالىساتىن وڭىرلەردىڭ بارلىق قام-قارەكەتى قىراۋلى قىستىڭ قيىندىقتارىنان قينالماي وتۋگە باعىتتالاتىنى شىندىق. بارلىق كۇش-جىگەر الا جازداي الدىمەن اۋىلدىقتاردىڭ الەۋمەتتىك جاعدايىن تياناقتاپ, قولدارىنداعى ءتورت ت ۇلىگىن شىعىنعا ۇشىراتپاي كوكتەمگە ىلىكتىرۋگە جۇمسالاتىنى دا سوندىقتان. سوڭعى ءۇش-ءتورت جىل بويى وڭىردە بولعان قۋاڭشىلىق اۋىلدىقتاردىڭ ەتەك-جەڭىن جيناقى ۇستاۋعا ۇيرەتتى. الا جازداي تامشى تامباعاندىقتان اۋدان شارۋشىلىقتارى كوكتەمدە ءدان سەپكەن 60 مىڭ گەكتاردان استام القاپتان ءونىم الا المادى. ءتىپتى قىسقا تۇسەتىن مالعا قاجەتتى جەم-ءشوپتى دە جيناپ الا الماۋدىڭ قاۋپى تۋدى. الايدا, ءوڭىردىڭ شارۋاشىلىق جانە تابيعي جاعدايىن جەتىك بىلەتىن اۋدان اكىمى ليۋبوۆ يسماعامبەتوۆا قىسقا تۇسەتىن مالعا قاجەتتى جەمشوپتى ءوز اۋماقتارىنان دايىنداپ الۋدىڭ بارلىق مۇمكىندىكتەرىن قاراستىردى. اۋداندا قۇرىلعان مال ازىعىن دايىنداۋ جونىندەگى شتاب جۇيەلى جۇمىس ىستەدى. پىشەننىڭ باعاسىن قىمباتتاتپاۋدىڭ جولدارى قاراستىرىلدى. جەمشوپ دايىنداۋشىلارعا وبلىستىق بيۋدجەتتەن 260 توننا ارزانداتىلعان جانارماي ءبولىندى. ءناتيجەسىندە اۋدان بويىنشا قىسقا ءتۇسەتىن 16596 ءىرى قاراعا, 88340 قوي-ەشكىگە, 6295 جىلقىعا, 14650 شوشقاعا 111,0 مىڭ توننادان استام پىشەن دايىندالدى, ءسويتىپ جوسپار 130 پايىز ورىندالدى, جەتكىلىكتى جەم قورى جاسالدى. اۋىلدىقتار اۋا رايىنىڭ اشىق-جارىعىن پايدالانىپ مالدى قىس قاتايعانشا جايىپ كەلدى. مۇنىڭ ءوزى ءبىراز جەم-ءشوپ ۇنەمدەۋگە قول جەتكىزدى. مال ۇستايتىن 4282 وتباسى جەتكىلىكتى جەمشوپەن قامتاماسىز ەتىلگەن.سونىڭ ىشىندە 895 زەينەتكەر مەن از قامتىلعان 126 وتباسىنا پىشەن 30-40 پايىز ارزانداتىلىپ بەرىلگەن. جوق-جىتىك 30 وتباسىنا مال ازىعى تەگىن ءتۇسىرىلىپتى. – ءبىزدىڭ اۋدان بىرىڭعاي اۋىل شارۋاشىلىعىمەن اينالىسادى. سوڭعى جىلداردىڭ تاجىريبەسى ەگىنشىلىكتىڭ تاۋەكەل ايماعىنا ورنالاسقان اۋدان شارۋاشىلىقتارىندا ونىڭ قايتارىم بەرمەيتىنىن كورسەتتى. سوندىقتان مال ءوسىرۋگە باسىمدىق بەرىلۋدە. ءارينە, جەمدىك داقىلدار ەگە وتىرىپ, ەگىنشىلىكتىڭ كولەمىن ۇلعايتۋدان باس تارتاتىن بولامىز. مال ءوسىرگەندە دە ونىڭ ونىمدىلىگى جوعارى, ءبىزدىڭ ءوڭىردىڭ تابيعي جاعدايىنا ءتوزىمدى تۇقىمدارىن وسىرۋگە باعىت ۇستالۋدا. وتكەن جىلى جاڭادان قۇرىلعان شارۋاشىلىق قۇرىلىمدارى اسىل تۇقىمدى 2068 قوي, 40 جىلقى, 70 ءىرى قارا ساتىپ الۋعا 35 ملن. تەڭگە ينۆەستيتسيا سالدى. جالپى سوڭعى كەزدەرى جەر الىپ, شارۋاسىن ءجۇرگىزۋگە تالاپتانۋشىلار قاتارى كوبەيىپ كەلەدى. مۇنىڭ ءوزى اۋداندا مال ونىمدەرىن وڭدەۋ كاسىپورىندارىن اشۋدى العا تارتىپ وتىر. بۇل ازىرگە الداعى كۇندەردىڭ ەنشىسىندەگى شارۋا. قازىر ەلدى مەكەندەردەن مال سويۋ پۋنكتتەرىن اشىپ جاتىرمىز, – دەيدى ليۋبوۆ قابليعوجاقىزى. اۋدانداعى ون سەگىز اۋىلدىق وكرۋگتە 23 مىڭنان استام حالىق تۇرادى. بارلىق ەلدى مەكەندەردە مەكتەپتەر بار, فەلدشەرلىك-امبۋلاتوريالىق پۋنكتتەر جۇمىس ىستەيدى. ولارعا جىل سايىن جاس ماماندار كوپتەپ كەلە باستاپتى. وتكەن جىلى ءبىلىم جانە دەنساۋلىق سالاسىنا كەلگەن 21 جاس مامانعا كوتەرمە جاردەماقى ءتولەۋگە 2050,0 ملن. تەڭگە بولىنگەن. – اۋداندا بۇلدىرشىندەردى مەكتەپكە دەيىنگى بالالار مەكەمەلەرىمەن قامتاماسىز ەتۋدە ءبىراز ىلگەرىلەۋشىلىك بار. وتكەن جىلى بەس بالاباقشا پايدالانۋعا بەرىلدى. قازىر بالدىرعاندار بالاباقشامەن 97 پايىز قامتاماسىز ەتىلىپ وتىر. بۇل وبلىس بويىنشا اناعۇرلىم جوعارى كورسەتكىش. اۋدان مەن وبلىس ورتالىعى اراسىنداعى كۇرەجولدى كۇردەلى جوندەۋ باستالدى, گاز قۇبىرى تارتىلۋدا. ەندى اينالدىرعان ءبىر-ەكى جىلدا مۇندا تۇرمىستىق يگىلىكتىڭ بارىنە قول جەتكىزىلەدى. وعان سەنىمىمىز مول. قازىر قوبدالىقتار قىستان قىسىلمايدى. الەۋمەتتىك سالا مەكەمەلەرى, تۇرعىندار قىستىق وتىن-سۋمەن تولىق قامتاماسىز ەتىلدى,– دەيدى اۋدان اكىمى. قوبدا وڭىرىندە قوياننىڭ قىسى دا ازىرگە اشىق-جارىق بولىپ تۇر. جەلتوقساننىڭ اياعىنا تامان تۇسكەن قىربىق قار جۇقا. مۇنىڭ ءوزى جىلقى مەن قويدى جايىپ باعۋعا قولايلى بولۋدا. وبلىس اۋداندارى اراسىندا قىسقا تۇسەتىن مالعا قاجەتتى جەم-ءشوپتى ۋاقىتىلى مول دايىنداپ, قورا-قوپسىسىن دا جۇتىنتىپ جوندەپ العان قوبدالىقتاردىڭ ءتۇتىنى ءتۇزۋ شىعۋدا.ساتىبالدى ءساۋىرباي.
اقتوبە وبلىسى.
