جاپوندىقتار جارقىلداپ, ءبىز ءسال جابىرقاپ قالدىق
سولداتسايىنداعى كەشە تاڭەرتەڭنەن باستاپ, قاباعى اشىلماعان ب ۇلىڭعىر كۇن مۇندا سايىسقا تۇسكەن ءبىزدىڭ سپورتشىلارىمىزدىڭ كوڭىل-كۇيىمەن ءۇيلەسىپ تۇرعانداي بولدى. ەركىن مانەرمەن 10 شاقىرىمعا جۇگىرگەن ايەلدەر بىرىنشىلىگىندە دە, 15 شاقىرىمدا باق سىناسقان ەرلەر جارىسىندا دا قازاقستان شاڭعىشىلارىنىڭ جولى بولماي, ساتسىزدىككە ۇرىنعانىنا جانكۇيەرلەر قاتتى قىنجىلدى. جۇلدەلى ورىنعا تالاسادى دەپ سانالعان ءبىزدىڭ ەلەنا كولومينا مەن سۆەتلانا مالاحوۆا-شيشكينا تيىسىنشە بەسىنشى جانە التىنشى ورىندارعا جايعاستى. سۆەتلانا بۇل ساتسىزدىكتى شاڭعى تابانىن مايلايتىن ماي قۇرامىنىڭ دۇرىس تاڭدالماۋىمەن بايلانىستىردى. «بارىمىزدى سالدىق, امال نە, شاڭعىمىز دۇرىس سىرعاناماي قويدى» دەپ قاپالاندى ول. ءدال وسىنداي ءساتسىزدىك ءبىزدىڭ شاڭعىشىلارىمىزدىڭ باسىندا 1996 جىلى حاربيندە بولعان ەكەن. قىزدارىمىز جىبەرىپ العان ەسەنى جىگىتتەر قايتارادى دەگەن ءۇمىت تە اقتالمادى. 15 شاقىرىمدىق ەرلەر اراسىنداعى ەركىن ءمانەردەگى جارىس جولىندا جاپوندىقتار ويقاستاي جارقىلداپ ەرەكشە كوزگە ءتۇستى. قاشىقتىقتى 49 ءمينوت 31 سەكونتتە ءبىرقالىپتى ءجۇرىپ وتكەن يوسيدا كەيسين التىن القانى يەلەندى. مارەگە 27,5 سەكونت كەيىن كەلگەن ونىڭ وتانداسى نارۋسە نوبۋ جەڭىس تۇعىرىنىڭ ەكىنشى ساتىسىنا كوتەرىلىپ, كۇمىس مەدالدى ولجالادى. وسىدان ەكى كۇن بۇرىن سپرينتەرلىك جارىستا كۇمىس مەدالعا قول جەتكىزگەن, كەلەسى كۇنى الەكسەي پولتورانينمەن بىرگە كوماندالىق سپرينتتە دەس بەرمەگەن ءبىزدىڭ نيكولاي چەبوتكو جارىس جولىن اسا اۋىر ءجۇرىپ ءوتىپ, زوردىڭ كۇشىمەن ءۇشىنشى ورىنعا ىلىكتى. البەتتە, قالىڭ جانكۇيەردىڭ كۇتكەنى قولا مەدال ەمەس ەدى. ونى نيكولايدىڭ ءوزىنىڭ دە ولقىسىنعانى كورىنىپ تۇردى. بىراق, بۇل ارادا «باق شاپپايدى, باپ شابادى» دەگەن ءسوز راسقا شىقتى. ماي قۇرامى دۇرىس تاڭدالماعان قازاقستاندىق سپورتشىلاردىڭ شاڭعىلارى تۇتقىر تارتىپ, ءوز مۇمكىندىكتەرىنەن الدەقايدا ءتومەن دەڭگەيدە ونەر كورسەتۋىنە سەبەپشى بولعانداي. دەي- تۇرساق تا, جارىستاردىڭ الداعى ءۇش كۇنى ءالى دە تالاي تاماشا تابىستار, التىن-كۇمىس مەدالداردى كوپتەپ سىيلايدى دەپ سەنەمىز. * * *سولداتسايداعى قار فابريكاسى
ازيادا كەزىندە الاتاۋ بوكتەرىندەگى اۋا رايى ءتورتىنشى كۇنى سىر بەردى. سىلبىرەي سەبەلەگەن جانبىر باسىلىپ ەدى, قالىڭ تۇمان ءتۇستى. قولايسىزدىقتار وسىدان شىقتى. شىمبۇلاق پەن سولداتسايداعى سۋپەركومبيناتسيا, بياتلون مەن شاڭعىمەن باعدارلاۋدان جارىستار توقتاتىلىپ كەيىنگە قالدىرىلدى. الماتى توڭىرەگىنىڭ اسپانى بيىل قىستا قارعا دا ساراڭدىق تانىتقان. بىراق شاڭعى سپورتىنىڭ بارلىق تۇرلەرىنەن جارىستار وتەتىن شىمبۇلاق پەن تاباعاندا, سولداتساي ستاديوندارى مەن تراسسالارىندا قاردان تارشىلىق بولعان جوق. سەبەبى, بۇل سپورت نىساندارىنىڭ بارىندە دە جاساندى قار جاسايتىن قوندىرعىلار, جالپاق تىلمەن ايتقاندا, قار زەڭبىرەكتەرى الدىن الا ورناتىلىپ, ىسكە قوسىلىپ قويىلعان بولاتىن. ءبىر عانا سولداتسايدى الايىقشى. قاردىڭ سۋدان جاسالاتىنى بەلگىلى. ولاي بولسا, وسى ماقسات ءۇشىن مۇنداعى شاڭعى جانە بياتلون ستاديوندارىنىڭ قاسىنان 7000 شارشى مەتر الاڭدا ارنايى توعان جاسالدى. بۇل جاساندى كول تاۋدىڭ سارقىراپ اققان بۇلاقتارىمەن تولىعىپ, اركەز 15 مىڭ تەكشە مەتر سۋ كەمەرىنە كەلە ءشۇپىلدەپ تۇرادى. كول سۋى قۇبىرلار جەلىسى ارقىلى ستاديوندارعا, شاڭعى تراسسالارىنا جەتكىزىلەدى. ءار تۇسقا قار جاسايتىن گەنەراتورلار, ياعني قار اتقىلايتىن زەڭبىرەكتەر ورناتىلىپ قويىلعان. ازيادا باستالاردان كوپ بۇرىن سولداتساي ستاديوندارىنا جارتى مەترلىك قار قاباتتارى ايقارا توسەلىپ تاستالدى. فينليانديادان اكەلىنگەن وسىزاماندىق «رەتراكت» ماركالى تراكتورلار سول قاردى نىعىزداپ تەگىستەۋمەن اينالىسادى. جاساندى قار جاسالۋى وسىلايشا جولعا قويىلعان بۇل ۇلگىنى سولداتسايداعى قار فابريكاسى دەرسىز. كۇن جىلىمىق تارتقان ءدال قازىرگىدەي شاقتاردا جۇقالتاڭ تارتقان شاڭعى جولدارى دەرەۋ جاڭا قارمەن ەسەلەي تولىقتىرىلۋدا. باسقا-باسقا, ال ەندى ازيادا جارىستارى الاتاۋ بوك- تەرىندە قاردان كەمدىك كورمەيدى دەپ ءبىلىڭىز. * * *اسىقپايتىن اۋعان
ازيا ويىندارىندا نەلەر قىزىقتار بولىپ جاتىر. 15 شاقىرىمدىق ەركىن مانەردەگى شاڭعى جارىسىندا جاپون جىگىتى يوسيدا كەيسين مارەگە جاقىنداعان شاقتا قايتادان كەلەسى اينالىمعا ءتۇسىپ كەتىپ, التىن مەدالدان قاعىلىپ قالا جازدادى. ايتەۋىر, قاتەلىك دەر كەزىندە تۇزەتىلىپ, ونى قاقپايلاپ اكەلىپ مارە جولىنا سالدى-اۋ. ايتپەسە, التىندى كەيسيننىڭ ادىمىن اشىرماي ىزىنە ءتۇسكەن ەكىنشى جاپوندىق نارۋسە نوبۋ الىپ كەتكەندەي ەكەن. ال ەندى ناق وسى جارىس جولىندا جۇرت وزىپ شىعۋعا جانۇشىرىپ جانتالاسسا, اۋعان جىگىتى ومار رونا مارەگە جەتۋگە ونشا اسىعا قويمادى. بىراق ول تامام جۇرتتى تاعى جارتى ساعات كۇتتىرىپ, اقىرعى كەلسە دە, وعان كورسەتىلگەن كورەرمەندەردىڭ قۇرمەت-قوشەمەتى التىن القا ولجالانعاندىكىنەن اسىپ-تۇسپەسە, كەم بولمادى. وماردىڭ وليمپيالىق جايباراقاتتىعى سولداتساي شاڭعى ستاديونىنداعى قىم-قۋىت تىرلىكتى كادىمگىدەي توقتاتىپ, كىدىرتىپ تاستادى. جارىستىڭ سوڭعى قاتىسۋشىسى مارەدەن وتپەيىنشە, جەڭىمپازداردى ماراپاتتاۋ ءراسىمى دە كەيىنگە ىسىرىلا تۇردى. ءارى, بۇعان قوسا, ماراپاتتاۋشىلار مەن جەڭىمپازدار ءجۇرىپ وتەتىن قىزىل كىلەمشە توسەلەتىن جەردەن شاڭعى جولى وتەدى ەكەن. ءسويتىپ, ازيادانىڭ تامام حالقى جالعىز وماردى كۇتۋىنە تۋرا كەلدى. ول بولسا, قاينىنا كەلگەندەي-اق, نە بولماسا الاتاۋ قويناۋلارىنىڭ كوركىن تاماشالاپ سەيىلدەپ جۇرگەندەي-اق, اسىعار ەمەس. بىراق, وماردىڭ سونىسىنا قاباق شىتقان جان بولسايشى. قالاي دەسەك تە, «ەڭ باستىسى – قاتىسۋ» دەگەن سپورتتىق قاعيداتتى قالتقىسىز ۇستانعان اۋعاندىق جىگىت 15 شاقىرىمدىق جارىس جولىن ءجۇرىپ ءوتتى. ءوز وتانىنىڭ بايراعىن جامىلا جەلبىرەتىپ ءمارەنى اقىرعى قيعان ومار رونانى قولپاشتاعان سولداتسايداعى مىڭداعان كورەرمەننىڭ ايقايى تاۋ جاڭعىرىقتىردى. قورعانبەك امانجول.
