ماسەلەنى نازارباەۆشا شەشۋدىڭ ۇلگىسى

پارلامەنتتىڭ قوس پالاتاسىنىڭ دەپۋ­تاتتارى كونستيتۋتسياعا تولىقتىرۋ ەنگىزۋدى ءبىراۋىزدان قولداپ داۋىس بەردى. ال نەگىزى, كەزىندە ءبىزدىڭ كونستيتۋتسيامىزدا پرەزيدەنتتىڭ كەزەكتەن تىس سايلاۋ وتكىزۋ قۇقىعى تۋرالى باپ بولاتىن, بىراق ول الىنىپ تاستالعان ەدى. بىراق زامان, ۋاقىت دەگەن ءبىر ورنىندا تۇرمايدى, سوندىقتان زاڭ دەگەننىڭ ءوزى ادامعا قىزمەت ەتۋ ءۇشىن جاسالاتىندىقتان, وعان قاجەت ۋاقىتىندا وزگەرىس ەنگىزىلەدى. قازىرگى جاعداي وسىنداي بولدى. ءبىز دەموكراتيالىق قۇندىلىقتاردى قادىر تۇتا­تىن مەملەكەت بولامىز دەگەن سوڭ, بارلىعىن دا زاڭ اياسىندا اتقارۋعا ءتيىسپىز. بۇل ورايدا ەلباسىنىڭ وسى قادامىن زاڭدى بۇزبايىق, كەلەسى بيلىككە كەلەتىن ساياساتكەر زاڭدى ءوز تاراپىنا لايىقتاپ بۇر­ما­سىن, بۇزباسىن, كونستيتۋتسياعا وزگەرىستەر ەنگىزبەسىن دەگەن نيەتى دەپ ۇعىنۋ دۇرىس. پرەزيدەنت ءوزىن عانا ويلاپ وتىرعان جوق, بارلىعى زاڭ تارتىبىمەن ءجۇرسىن دەيدى. ياعني كەزەكتەن تىس سايلاۋ وتكىزۋ قاجەت بولعاندىقتان, وسىنداي وزگەرىس قاجەتتىگىن ايتىپ وتىر. ال ەلباسىنا ءوزىنىڭ وكىلەتتىگىن سايلانعان مەرزىمىنىڭ شەگىنە دەيىن, ياعني 2012 جىلعا دەيىن دە اتقارۋىنا بولار ەدى, بىراق پرەزيدەنت بۇل جەردە حالىقتىڭ, 5 ملن. قازاقستاندىقتىڭ تىلەگىن ەسكەردى. ارينە, ەگەر دە ەلباسى 2012 جىلى ساي­لاۋعا تۇسسە دە جەڭەتىنى ءسوزسىز, ول ەشقانداي داۋ تۋدىرمايدى. بىراق ەلباسى قولدارىن قويعان, وزىنە ءۇمىت ارتقان 5 ملن. ادامعا نە دەپ جاۋاپ بەرەدى؟ حالىقتىڭ وزىنەن شىققان ۇسىنىس قوي, وسىعان بايلانىستى پرەزيدەنت پارلامەنتتى تاراتپاي, ءوزى كەزەكتەن تىس سايلاۋعا تۇسەتىنىن ايتتى. بۇل, مەنىڭ ويىمشا, وتە دۇرىس شەشىم. مەملەكەت ءۇشىن پارلامەنتسىز ءبىر كۇن تىرشىلىك ەتۋگە بولمايدى, مىسالى, ءبىر كۇن سوت بولماسىنشى, نە بولادى ەكەن؟ سول سياقتى پارلامەنت بولۋ كەرەك. يراك ەلەكەەۆ, پارلامەنت ءماجىلىسىنىڭ دەپۋتاتى.