ەلباسىمىزدىڭ ساياسي شەشىمىن قولدايمىز

ەلباسىنىڭ مەرزىمىنەن بۇرىن سايلاۋ وتكىزۋ تۋرالى ۇسىنىسىن قازاقستان رەس­پۋبليكاسى پارلامەنتى پالاتالارىنىڭ 2 اقپانداعى بىرلەسكەن وتىرىسىندا تالقى­لاپ, «قازاقستان رەسپۋبليكاسىنىڭ كونس­تيتۋتسياسىنا تولىقتىرۋ ەنگىزۋ تۋرالى» زاڭ ءبىراۋىزدان ماقۇلدانىپ, قابىل­دان­دى. زاڭعا سايكەس پرەزيدەنتتىڭ كەزەكتەن تىس سايلاۋى ەلباسى شەشىمىمەن تا­عاي­ىن­دالادى جانە كونستيتۋتسيالىق زاڭدا كورسەتىلگەن تارتىپپەن بەلگىلەنگەن مەرزىمدە وتكىزىلەتىن بولادى. پرەزيدەنت اپتا باسىنداعى حالىققا ۇندەۋىندە ءوزىنىڭ ناقتى كوزقاراسىن بىلدىرگەن بولاتىن. ءوزىن قولداعان حالقىنا, دەپۋتاتتارعا, ەلباسىمىزدىڭ پرەزيدەنتتىك وكىلەتتىگىن 2020 جىلعا دەيىن ۇزارتۋ جونىندەگى باستاماشى توپتىڭ مۇشەلەرىنە, «نۇر وتان» حدپ باستاعان ساياسي پارتيالاردىڭ وكىلدە­رىنە ريزاشىلىعىن بىلدىرە وتىرىپ, دەموكراتيالىق جولمەن جۇرەتىنىمىزدى جاريا ەتكەن ەدى. قازاقستاندا دەموكراتيانى دامىتۋ باعىتىندا تاريحي قادام جاسالدى. پرەزيدەنت بولاشاق ۇرپاقتىڭ كەلەشەگىن ويلادى, كەلەشەكتە قازاقستاندا قۋاتتى ساياسي ورلەۋ بولۋىن قالادى. بۇل ەلباسىمىزدىڭ بولاشاق ءۇشىن جاسالعان تاريحي شەشىمى ارقىلى قازاقستاننىڭ حالىقارالىق ارەناداعى بەدەلىن تاعى ءبىر بەلەسكە كوتەردى. ەلباسىمىز ەلىمىزدىڭ دەموكراتيالىق قۇندىلىقتاردى باعالايتىنىن بۇكىل الەمگە پاش ەتىپ, كەمەڭگەر باسشىسى بار ەل ەكەنىمىزدى تاعى دا دالەلدەپ بەردى. وسى سەبەپتى, حالىق ەلباسىمىزعا سەنەدى, ونىڭ ءوز جۇمىسىن ارى قاراي جالعاستىرا بەرۋىنە شىن كوڭىلدەن تىلەكتەس. بۇگىنگى كۇننىڭ تاريحي شىندىعى – قانداي سايلاۋ بولماسىن, ەلباسى حالىقتىڭ ۇلكەن قولداۋىنا يە بولاتىنى انىق. ويتكەنى, ەلدىڭ سەنىمىن اقتاعان ادام قاي ۋاقىتتا بولسا دا شىنايى قولداۋعا لايىق. ءوز باسىم قاشان دا پرەزيدەنتىمىزدىڭ جۇرگىزىپ وتىرعان سارابدال ساياساتىن قولدايمىن. قىلىشباي بيسەنوۆ, پارلامەنت ءماجىلىسىنىڭ دەپۋتاتى.