بياتلوننان قازاقستان قۇراماسىنىڭ كوشباسشىسى ەلەنا حرۋستالەۆانىڭ اكەسى ۆلاديمير فەدوروۆيچ قىزىنىڭ قىتايلىق چۋنلي ۆانگتان ۇتىلىپ قالعانىن بىلاي ءتۇسىندىردى:
– جارىس قارساڭىندا قىزىم كوڭىل-كۇيىنىڭ ونشا ەمەس ەكەنىن ايتقان. مۇنى ءبىز باسەكە الدىنداعى قوبالجۋلىق قوي دەپ ويلاعانبىز. الايدا, مەن مۇنى تاماقتان ۋلاندى-اۋ دەپ تە بولجايمىن. كوڭىلىنىڭ جابىرقاۋ بولۋى, ءسوز جوق, ەلەنانىڭ كورسەتكىشىنە اسەر ەتتى. ول بار كۇشىن سالدى. نىسانانى ءدال كوزدەدى. بىراق, قىتايلىق قىز وتە جاقسى دايىندىقپەن كەلگەنىن اڭعارتى. ءۇشىنشى ورىن العان مارينا لەبەدەۆانىڭ دا تابىسى جامان ەمەس. ول وتكەن ماۋسىمدى جوعارى دەڭگەيدە باستاعان ەدى. الەم كۋبوگىندا لەنادان وزعان بولاتىن. اتاپ ايتار ءنارسە, الەم كۋبوگىنىڭ جارىستارى بيىلعى جىلى ەلەنا ءۇشىن باستى مەجە بولعان جوق. ءبىز ازيا ويىندارىنا جوسپارلى تۇردە دايىندالدىق. جاقىن قاشىقتىققا ءجۇگىرۋدە كمىس مەدال الۋ – ازيادا جارىسىنىڭ بيىك شىڭىنا جەتۋدەگى العاشقى تابىس سياقتى كورىنەدى ماعان.
– ءسىز ءوز قىزىڭىزدىڭ تەك جاتتىقتىرۋشىسى عانا ەمەس, ءارى ونىڭ دارىگەرىسىز. ءسىزدىڭ ۇيرەتۋ ادىستەرىڭىز داستۇردەن تىس تاسىلدەرگە نەگىزدەلەتىنى راس پا؟
– مەنىڭشە, قالىپقا ءتۇسۋدىڭ ءداستۇرلى ءادىسى – ءبىزدىڭ اتا-بابالارىمىزدىڭ تاجىريبەسىنەن وتكەن. دايىندىق پروتسەسىندە ءبىز ينە شانشۋ ءتاسىلىن, ەلەكتر اپپاراتى ارقىلى قالىپقا ءتۇسۋ, فوتوديناميكالىق تەراپيانى دا قولدانامىز. ەلەنا كوپ جىلدان بەرى تابيعي قوسپاسى بار تاعامداردى پايدالانادى. بۇل ۆيتامين مەن پروتەيننەن گورى تيىمدىرەك. نەگە دەسەڭىز, ول – تابيعي ءونىم. جاساندى بيوقوسپاعا قاراعاندا, ونىڭ پايداسى مول.
– ەلەنا سوچيدە وتەتىن قىسقى وليمپيا ويىندارىنا قاتىسادى دەپ ويلايسىز با؟
– ءيا, مۇنداي جوسپارىمىز بار. سوچيگە بارۋدى ماقسات ەتىپ ءجۇرمىز. ودان كەيىن نە بولارىن ايتۋ قيىن. اسا الىستى الدىن الا بولجاماي-اق قويالىق.
ايناش ەسالي.
الماتى.
