بەرەكەلى بىرلىگىمىز – بايلىعىمىز
ەلباسى جولداۋىندا ايتىلعان ماقساتتارعا جەتكىزەتىن باستى قۇندىلىعىمىز وسى
* * *
«پرەزيدەنت جولداۋى جىل سايىن ەل بولىپ ەلەڭدەپ كۇتەتىن ماڭىزدى قۇجاتقا اينالدى. بيىلعى جولداۋدىڭ ءجونى دە, جولى دا وزگەشە. نەگىزگى باعىت تا, باسىمدىق تا جاڭا الەۋمەتتىك ساياساتتى ىسكە اسىرۋعا ارنالادى. ەلباسى ەڭ ماڭىزدى 3 مەملەكەتتىك باعدارلاماعا توقتالدى. ول – ءبىلىم بەرۋ, دەنساۋلىق ساقتاۋ ءجانە تىلدەردى دامىتۋ ماسەلەلەرى. بۇلار ءبىزدىڭ قالامىز ءۇشىن دە ايرىقشا ماڭىزعا يە ەكەندىگى بەلگىلى. ال جولداۋ ولاردىڭ دامىپ, وركەندەۋى ءۇشىن بارلىق جاعدايدى جاساپ وتىر. دەمەك, الدىمىزدا مەملەكەتتىڭ تۇعىرىن بيىك ۇستاۋعا باعىتتالعان مەجەلى مىندەتتەر تۇر. ەندىگى جەردە ەلباسى جولداۋىنىڭ ءار تارماعىن تارقاتىپ, تاپسىرمالاردى تىڭعىلىقتى جۇزەگە اسىرۋ – بارشامىزعا ورتاق مىندەت». قازاقستان پرەزيدەنتى نۇرسۇلتان نازارباەۆتىڭ جولداۋىن تالقىلاۋعا ارنالعان اكتيۆ وتىرىسىندا استانا قالاسىنىڭ اكىمى يمانعالي تاسماعامبەتوۆ وسىلاي دەپ جينالعان قاۋىمعا ءسوز ارنادى. شاھار باسشىسى ءوز بايانداماسىندا ەلباسى جولداۋىن جۇزەگە اسىرۋ جونىندەگى وڭىرلىك جوسپار قابىلدانعانىن مالىمدەپ, ونىڭ ءار تارماعىن ۋاقتىلى ورىنداۋ قاجەتتىگىن باسا ايتتى. وتىرىستا مەملەكەتتىك ءتىلدى پايدالانۋدى ساپالى, جاڭا دەڭگەيگە كوتەرۋ ماسەلەسىنە ايرىقشا نازار اۋدارىلدى. قالا اكىمى 2017 جىلى قازاق ءتىلىن مەڭگەرگەن قالا تۇرعىندارىنىڭ ۇلەسىن 80 پايىزعا, 2020 جىلى بۇل كورسەتكىشتى 95 پايىزعا دەيىن ءوسىرۋ مەجەسىنە ابىرويمەن جەتۋ قاجەتتىگىن اتاپ ايتتى. ال ەكىنشى كەزەكتە 2013 جىلى دەنساۋلىق ساقتاۋ سالاسىنا بىرىڭعاي ۇلتتىق دەنساۋلىق ساقتاۋ جۇيەسىن ەنگىزۋ ناتيجەلى اياقتالۋعا ءتيىس ەكەندىگى, سەبەبى, بۇل حالىققا كورسەتىلەتىن قىزمەتتىڭ, اسىرەسە, العاشقى مەديتسينا-سانيتارلىق كومەكتىڭ جوعارى ساپالى بولۋىن قامتاماسىز ەتەتىنى تىلگە تيەك بولدى. وسىعان بايلانىستى ي.تاسماعامبەتوۆ قالانىڭ دەنساۋلىق ساقتاۋ باسقارماسىنا حالىقتىڭ, ەڭ الدىمەن بالالار مەن جاسوسپىرىمدەردىڭ, بالا تۋ جاسىنداعى ايەلدەردىڭ دەنساۋلىق جاعدايىن قاداعالاۋدىڭ جاڭا تەتىكتەرىن ازىرلەۋدى تاپسىردى. سونداي-اق, يمانعالي نۇرعالي ۇلى ءوزىنىڭ ورىنباسارلارى ۆاسيلي كرىلوۆ پەن ايدا بالاەۆاعا جانە قانات سۇلتانبەكوۆكە استانانىڭ الەۋمەتتىك دامۋ باعدارلاماسىن باقىلاۋعا الۋ, قالا ەكونوميكاسىنىڭ ناقتى سەكتورىن جانداندىرۋ باعدارلاماسىن دايىنداۋ, قىسقا مەرزىمدە سالالىق جوسپار ازىرلەۋ جونىندە تاپسىرما بەردى. ءلايلا ەدىلقىزى. استانا.
