اسكەري وقۋ ورىندارىنداعى جاڭا ماماندىقتار

العاش رەت قازاقستان رەسپۋبليكاسىنىڭ اسكەري جوعارى وقۋ ورىندارىندا كۋرسانتتار ءۇشىن جاڭا ماماندىقتار ەنگىزىلدى.  ال بۇگىندە جىل سايىن اسكەري جوعارى وقۋ ورىندارىنا 1 000-عا جۋىق ازامات وقۋعا تۇسەدى.  كادەت كورپۋسىندا نەمەسە جوعا­رى وقۋ ورىندارىندا بولسىن اسكەري وقۋ ورىندارىنداعى ماماندىقتاردىڭ تىزبەسى قايتا ازىرلەندى.  العاش رەت 2016-2017 وقۋ جىلىندا اۋە قور­عا­نىسى كۇشتەرى اسكەري ينستي­تۋتى­نىڭ بازاسىندا اسكەري-مەدي­تسينالىق فاكۋلتەتتە وقىتۋ باستالادى. قۇرلىق اسكەرلەرىنىڭ اسكەري ينس­تيتۋتىندا «اسكەري ىستەگى مەنەدج­مەنت», «اسكەري ىستەگى لوگيستيكا», «اسكەري ىستەگى يۋريسپرۋدەنتسيا» سەكىلدى ماماندىقتار اشىلدى. راديوەلەكترونيكا جانە بايلانىس اسكەري-ينجەنەرلىك ينستيتۋتىندا «اسكەري ىستەگى راديوەلەكترونيكا جانە بايلانىس» ماماندىعى پايدا بولدى.  ول ماماندىق بويىنشا ءبىلىم العاننان كەيىن تۇلەكتەر اسكەري سالادا عانا ەمەس, سونىمەن بىرگە, ازاماتتىق قىزمەتتە دە جۇمىس ىستەي الادى. بۇگىندە اسكەري ءبىلىم قارقىندى دامۋدا.  وقىتۋ باعدارلاماسىنا اسكەري ادەپ, كوشباسشىلىق جانە ءاس­كەري ىستەگى باسقارۋ ءستيلى سياق­تى پاندەر ەنگىزىلدى. بۇل  كۋر­سانت­تاردىڭ جەكە تۇلعاسىن, كوش­باسشىلىق قاسيەتتەرى مەن مىنەز-قۇل­قىن قالىپتاستىراتىن فاكتورلار بولىپ تابىلادى. جىل سايىن قازاقستاننىڭ اسكەري جوعارى وقۋ ورىندارىنىڭ كۋرسانتتارى شەتەلدەردە تاعىلىمدامادان وتەدى. تاجىريبە جيناقتاپ, وزدەرىنىڭ بىلىكتىلىگىن ارتتىرادى. بۇگىنگى تاڭدا 2016 جىلدىڭ 15 ماۋسىمىنا دەيىن جالعاساتىن وقۋعا ءتۇسۋ ءۇشىن قۇجاتتاردى قابىلداۋ ءجۇرىپ جاتىر. اسكەري جوعارى وقۋ ورىندارىنىڭ كۋرسانتتارى ءۇشىن وقۋعا ارنالعان بارلىق جاعداي, ياعني تولىق الەۋمەتتىك جيىنتىق, تەگىن وقۋ جانە تۇرۋ قاراستىرىلعان. بارلىق تۇلەك وقۋدى اياقتاعاننان كەيىن 100 پايىز جۇمىسپەن قامتىلادى.   «ەگەمەن-اقپارات»