جاسىراتىنى جوق, جامبىل وڭىرىنە كەڭىنەن تانىمال «كناۋفگيپستاراز» جشس وتكەن جىلى 383,3 ملن. تەڭگەنىڭ گيپس ونىمدەرىن شىعارىپ, ءوندىرىس كولەمىن ءبىرشاما تومەندەتىپ الدى. بۇل سەمەي جانە بۇقتىرما تسەمەنت زاۋىتتارىنىڭ گيپس الۋدان باس تارتۋ سالدارىنان ورىن الدى. الايدا كاسىپورىن وسى وڭىردەگى حانتاۋ تسەمەنت زاۋىتىمەن كەلىسىمشارتقا وتىرىپ, 6,2 مىڭ توننا گيپس جونەلتتى جانە باسقا دا ءونىم وتكىزۋ مۇمكىندىكتەرىن ىزدەستىرۋدە.
ءوندىرىستىڭ بۇل سالاسىندا تىڭنان تۇرەن سالۋ قاجەت ەكەنىن تۇسىنگەن «كازۋپاكترەيد» جشس جامبىل اۋدانىنىڭ بەكتوبە اۋىلىندا گيپس زاۋىتىن سالۋ جوباسىن قولعا الدى. زاۋىتتىڭ جوبالىق قۇنى – 1 ملرد. 022 ملن. تەڭگەنى قۇرايدى. جىلدىق قۋاتى – 180 مىڭ توننا نەمەسە تاۋلىگىنە 450-500 توننا قۇرىلىس گيپسىن جانە 100 مىڭ تەكشە مەتر گيپسوكارتون وندىرەدى. بۇگىندە زاۋىت قۇرىلىسىنىڭ جوبالىق-سمەتالىق قۇجاتتارى ازىرلەنىپ, مەملەكەتتىك ساراپتاماسى ەكىنشى كەزەڭنەن ءوتتى. زاۋىتتىڭ ىرگەتاسى قالانىپ, مەتالل قۇرىلىمدارىن قۇراستىرۋ جۇمىستارى جۇرگىزىلۋدە.
قازىر تابىس كىلتى وندىرىسكە جاڭا تەحنولوگيا ەنگىزۋدە بولسا كەرەك. وبلىس ورتالىعىمەن ىرگەلەس جاتقان جامبىل اۋدانىندا «Aسا-DAMU» جشس زاماناۋي قۇس فابريكاسىن سالىپ, جۇمىستارىن وسى باعىتتا ۇيلەستىرىپ جاتىر. كولقاينار اۋىلدىق وكرۋگى اۋماعىندا ورنالاسقان بۇل كاسىپورىن ءبىر مەزەتتە 316 مىڭ باس تاۋىق جانە 84 مىڭ باس بالاپان ءوسىرىپ, جىلىنا 90 ملن. داناعا دەيىن جۇمىرتقا شىعارىپ, 280 تونناعا دەيىن قۇس ەتىن ءوندىرۋدى كوزدەۋدە.
– وسىنىڭ ارقاسىندا «كازۋپاكترەيد» جشس – 70, ال, Aسا-DAMU» جشس 95 جاڭا جۇمىس ورنىن اشادى, – دەيدى جامبىل اۋدانىنىڭ اكىمى مادەن مۇساەۆ. – «بيزنەستىڭ جول كارتاسى-2020» باعدارلاماسى شەڭبەرىندە ءوندىرىس ينفراقۇرىلىمىنا قۇنى 574,4 ملن. تەڭگەنىڭ جوبالىق-سمەتالىق قۇجاتتارى مەن مەملەكەتتىك ساراپتاماسى ازىرلەنىپ, وبلىستىق اۋماقتىق ۇيلەستىرۋ كەڭەسىنىڭ قاراۋىنا ۇسىنىلدى. وتكەن جىلى اۋداندا جالپى تىركەلگەن 4581 كاسىپكەرلىك نىساندارىندا 6652 ادام جۇمىسپەن قامتىلعان. بارلىق شاعىن كاسىپكەرلىك سالاسى بويىنشا وندىرىلگەن ءونىم كولەمى 22 ملرد. 905,3 ملن. تەڭگەنى قۇرادى.
سونداي-اق, «جاسىل ەكونوميكانى دامىتۋ» تۇجىرىمداماسى شەڭبەرىندە تۇركسىب اۋىلىندا «كوگەنحان» جشس 100 مۆت-لىق كۇن ەلەكتر ستانساسىنىڭ قۇرىلىسىن باستاپ كەتتى. قازىرگى تاڭدا ينۆەستور تاراپىنان ەلەكتر ەنەرگياسىن وندىرۋگە كۆوتا الىنعان. جوبانىڭ قۇنى 153,0 ملن. ەۋرونى قۇرايدى. كەلەسى جىلدىڭ مامىر ايىندا پايدالانۋعا بەرىلەتىن بۇل ستانسادا 70 جاڭا جۇمىس ورنى اشىلاتىن بولادى.
ورالحان ءداۋىت,
«ەگەمەن قازاقستان»
جامبىل وبلىسى