تۇلكىباس اۋدانىندا بەكىرە باسسەيندە ءوسىرىلىپ جاتىر

شىمكەنت. 4 مامىر. تۇلكىباس اۋدانى كەرەيت اۋىلىندا باسسەيندە بەكىرە ءوسىرىلىپ جاتىر. بۇل تۋرالى egemen.kz ءتىلشىسى حابارلادى. زاۋىت جىلىنا 100 توننا بالىق ەتى مەن 1200 كيلو قارا ۋىلدىرىق دايىندايدى. «بىزدە بەكىرە تۇقىمداس 5 ءتۇرلى بالىق وسىرىلەدى. ارقان بالىقتىڭ ءۇش ءتۇرى جانە سۇيرىك بالىقتىڭ 5 ءتۇرى بار. ءتىپتى, وتە سيرەك كەزدەسەتىن البينوس بەكىرەسى دە بار. ول بەكىرە 3 جىلدا ءبىر رەت ۋىلدىرىق شاشادى. بيىل 1 كەلى ۋىلدىرىعىن 3,5 ميليون تەڭگەگە ساتتىق», دەدى بالىق زاۋىتىنىڭ مەڭگەرۋشىسى نيكولاي تسارەۆ. بالىق وسىرىلەتىن سۋ ارتەزيان قۇدىعى مەن بۇلاق باستاۋلارىنان الىنادى. وسىندا ارنايى وڭدەۋدەن ءوتىپ, باسسەيندەرگە قۇيىلادى. مۇندا جەرگىلىكتى 20 تۇرعىن جۇمىسپەن قامتىلدى. باقتيار تايجان. دەرەك, فوتو: egemen.kz