ەلباسى نۇرسۇلتان نازارباەۆتىڭ باستاماسىمەن قولعا الىنعان اتوم جوباسى اياسىندا پوليگوننان زارداپ شەككەن حالىقتى ساۋىقتىرۋ, كوزدەرى مۇلدە كورمەيتىن زاعيپ جانداردىڭ ءومىرىن بەلسەندى ءارى قىزىقتى ەتىپ وتكىزۋ ماقساتىندا سەمەي وڭىرىندە كوپتەگەن شارالار وتكىزىلىپ كەلەدى. وسىعان وراي, زاعيپ جاندارعا ارنالعان كىتاپحانادا ەرەكشە كورمەنىڭ اشىلۋى بولىپ ءوتتى. كورمەدە سەمەي پوليگونىنىڭ جابىلعانىنا 25 جىل جانە جازۋشى قابدەش ءجۇمادىلوۆتىڭ تۋعانىنا 80 جىل سياقتى مەرەيلى مەرەكە كۇندەرى قامتىلدى. جازۋشىنىڭ شىعارماشىلىق ومىرىنە قىسقاشا شولۋ جاسالىپ ءوتتى.
زاعيپ وقىرماندار گازەتتەردەن جاسالعان سەمەي پوليگونىنىڭ ماكەتىن ۇستاپ كورىپ, جاقسى جاسالعان دەگەن پىكىرلەرىن ايتتى. ولاردىڭ اراسىندا ءارتۇرلى ادەبي ويىندار وتكىزىلدى جانە كوزدەرى كورمەسە دە وقىرماندارىمىزدىڭ بارلىعى جاقسى قاتىسىپ, زال ادەمى كوڭىل كۇيگە تولدى, دەيدى كىتاپحاناشى شىنار ءالياسقاروۆا. ءتۇرلى زاتتارعا تولى, ادەبي «سيقىرلى ساندىق» ويىنى وقىرماندار اراسىندا ەرەكشە قىزىعۋشىلىق تانىتتى. سيقىرلى ساندىقتاعى زاتتى زاعيپ جاندار تاكتيلدى تۇردە قولىمەن سيپاپ سەزۋ ارقىلى ونىڭ قاي كىتاپ, قاي اۆتورعا ارنالعان ەكەنىن جاڭىلماي بىردەن تاپتى. كىتاپتى كوپ وقۋدىڭ ارقاسىندا ءبىزدىڭ وقىرماندار بىلىكتىلىگىمەن جانە تاپقىرلىعىمەن ەرەكشەلەنىپ وسى ءىس-شارادا سونى دالەلدەي تۇسكەندەي. بۇل تاكتيلدى ويىندار زاعيپ جاندار اراسىندا ەرەكشە ورىن الادى جانە وسىنداي ارنايى ويىندار كۇندەلىكتى ورتاعا بەيمدەلۋگە كومەگىن تيگىزەدى. وقىرماندار ارنايى تيفلوماگنيتوللا ارقىلى CD ديسكىدە جانە ءۇنتاسپادا دىبىستاندىرىلعان كىتاپتاردان ءۇزىندى تىڭداپ, كىتاپتىڭ اۆتورى مەن اتىن جىلدام تابۋدان الدارىنا جان سالمايدى جانە دە وسى ينتەللەكتۋالدى ويىندارىمىز قازاق جانە ورىس تىلدەرىندە وتەدى.
ءىس-شاراعا مادەنيەت جانە ءتىلدەردى دامىتۋ ءبولىمىنىڭ باسشىسى بەرىك كوپباي ۇلى قاتىسىپ, ىزگى تىلەگىن ايتتى. كىتاپحاناشىلاردىڭ قولىمەن ۇيىمداستىرىلعان كورمە وقىرمانداردىڭ كوڭىلىنەن شىعىپ, تامساندىردى. ولاردىڭ قاتارىندا برايل كىتاپتارىنان جاسالعان قازاقتىڭ كيىز ءۇيى مەن شاڭىراعى, CD ديسكىلەردەن قۇرالعان بەيبىتشىلىك پەن كەلىسىم سارايىنىڭ سۇلباسى, جالپاق باسىلىمدى كىتاپتار جانە گازەتتەردەن جاسالعان سەمەي پوليگونىنىڭ ماكەتى جوعارى باعالاندى. كورمەگە كىتاپحانا قورىندا تىركەلگەن ەڭ العاشقى جالپاق باسىلىمدى, رۋلوندا دىبىستاندىرىلعان, برايل كىتاپتارى جانە سوڭعى ءتىركەلگەن ەلەكتروندى كىتاپتار, 25 ءۇنتاسپادان تۇراتىن «داراباز» كىتابى قويىلدى. كىتاپحانا ديرەكتورى باحىتجامال رايىمحانوۆا وقىرماندارعا العىسىن ءبىلدىرىپ, ءۇزدىك وقىرماندارعا جانە ويىنعا قاتىسۋشىلارعا سىيلىقتار تاراتتى.
راۋشان نۇعمانبەكوۆا