پەتروپاۆل. 3 مامىر. م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى عيماراتىنىڭ قابىرعاسىنا بەلگىلى قوعام قايراتكەرى, ايتۋلى عالىم, تەحنيكا عىلىمدارىنىڭ دوكتورى قايىربەك ورازوۆتىڭ قۇرمەتىنە ەسكەرتكىش تاقتا قويىلىپ, ونىڭ اشىلۋ سالتاناتىنا وبلىس اكىمى ەرىك سۇلتانوۆ پەن مارقۇمنىڭ تۋعان-تۋىستارى قاتىستى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساعار egemen.kz ءتىلشىسى حابارلادى.
ەل تاۋەلسىزدىگىنىڭ وڭىردە ورنىعۋىنا, قالىپتاسۋىنا قايىربەك ورازوۆتىڭ سىڭىرگەن ەڭبەگى ولشەۋسىز. ول قاراعاندى پوليتەحنيكالىق ينستيتۋتىنىڭ پەتروپاۆلداعى فيليالىنا جەتەكشىلىك ەتە ءجۇرىپ, عىلىمي-تەحنيكالىق سالا ءۇشىن ءبىلىمدى شاكىرتتەر دايارلادى. ونىڭ قالالىق «قازاق ءتىلى» قوعامىنىڭ توراعاسى رەتىندە انا ءتىلىمىزدىڭ وركەن جايۋىنا, قازاق مەكتەپتەرى مەن سىنىپتارىنىڭ اشىلۋىنا قوسقان زور ۇلەسىن جەرلەستەرى ۇمىتپاق ەمەس. ءبىرىنشى سايلانعان جوعارعى كەڭەس دەپۋتاتى رەتىندە دە قوعامدىق جۇمىستاردىڭ الىڭعى لەگىنەن كورىندى. پرەمەر-ءمينيستردىڭ كەڭسەسىندە قىزمەت اتقارا ءجۇرىپ, ومىردەن ەرتە وزدى.
ول جايلى زايىبى ساپۋرا ورازوۆا, شاكىرتى ل.گۋميلەۆ اتىنداعى ەۋرازيا ۋنيۆەرسيتەتىنىڭ پروفەسسورى باقىتجان باكەنوۆ, تاعى باسقالارى ەستەلىكتەر ايتىپ, ادامگەرشىلىك قىرلارى جايلى اڭگىمەلەدى.
ايتا كەتەيىك, بۇگىندە ۇلى بەرىك اكە جولىن ابىرويمەن جالعاستىرىپ كەلەدى.
ءومىر ەسقالي.
دەرەك, فوتو: سولتۇستىك قازاقستان وبلىسى اكىمىنىڭ ءباسپاسوز قىزمەتى.