الماتى. 1 مامىر. الماتى قالاسىنداعى ۇلتتىق كىتاپحانادا سوپىلىق پوەزيانىڭ نەگىزىن قالاۋشى, اقىن, فيلوسوف قوجا احمەت ءياساۋيدىڭ 850 جىلدىق مەرەيتويى اياسىندا «ازىرەت سۇلتان» مەملەكەتتىك تاريحي-مادەني قورىق-مۇراجايىنىڭ ۇيىمداستىرۋىمەن «ياساۋي مۇراسى – ماڭگىلىك مۇرا» اتتى كورمە اشىلدى. بۇل تۋرالى egemen.kz ءتىلشىسى حابارلادى.
كورمە ءۇش بولىمگە توپتاستىرىلدى. ءبىرىنشى بولىمگە ق.ا.ياساۋي ءنار العان قۇران, حاديس, تافسيرلەر كىتابى قويىلدى. قازان, تاشكەنت, بۇقارا, سامارقاند باسپالارىنان شىققان قوجا احمەت ياساۋي مۇراسى مەن ىلىمىنە قاتىستى «ديۋاني حيكمەت» كىتابىنىڭ كونە قولجازبا نۇسقالارى, «ميرات-ۋل قۋلۋب», «فاقىرناما» ەڭبەكتەرى ەكىنىش بولىمنەن ورىن الدى.
كورمەنىڭ ءۇشىنشى بولىمىنەن – قوجا احمەت ءياساۋيدىڭ شاكىرتى سۇلەيمەن باقىرعانيدىڭ «ديۋان» كىتابى, شەيح حۋدايداد تاش-مۇحاممەد ءال-ءبۋحاريدىڭ «بۋستان ۋل-مۋحيببين» قولجازباسى, يمام ماعرۋدي, حوجا حافيز, قۇل ازيم شىعارمالارى, سوپى اللاياردىڭ اراب, تۇركى تىلدەرىندە جارىق كورگەن ەڭبەكتەرى, ءحىح عاسىردان جەتكەن كيەلى كەسەنە مەن تۇركىستان قالاسىنىڭ كورىنىستەرى جايلى سىر شەرتەر فوتوسۋرەتتەرمەن تانىسۋعا بولادى.
كورمەنىڭ اشىلۋىنا وتاندىق ياساۋيتانۋشى, اقىن مۇرالارىن جيناق ەتىپ شىعارۋشى عالىمدار, بۇقارالىق اقپارات قۇرالدارى وكىلدەرى جانە قالا قوناقتارى قاتىستى. «ازىرەت سۇلتان» قورىق-مۇراجايىنىڭ ديرەكتورى ج.اۋباكىر بيىل ەلىمىز ءۇشىن ايتۋلى مەرەكە ەكەندىگىن, ياساۋي مۇراسىنا قاتىستى شارانى دا وسى كيەلى شاڭىراقتا وتكىزۋدىڭ وزىندىك مانىنە توقتالىپ, قازاقستان رەسپۋبليكاسىنىڭ ۇلتتىق كىتاپحاناسىنا ارنايى سىي-سياپات جاسادى.
كورمە ەكسكۋرسياسى اياقتالعان سوڭ كەلگەن قوناقتار ياساۋي مۇرالارىنا قاتىستى وي-تولعامدارى مەن ۇسىنىس پىكىرلەرىن ورتاعا سالدى. «دوڭگەلەك ۇستەلدى» بەلگىلى عالىم ءابساتتار قاجى دەربىسالى جۇرگىزدى. ياساۋيتانۋعا سۇبەلى ۇلەس قوسقان «ديۋاني حيكمەت» كىتابىن ەلىمىزدە العاش رەت قازاق تىلىنە اۋدارعان م.شافيعي, س.داۋلەت ۇلى مەن سوپى ءىلىمىن زەرتتەۋشىلەر ا.سماقوۆا, ع.قامباربەكوۆا, ۇلتتىق كىتاپحانانىڭ سيرەك قولجازبالار ءبولىمىن ۇزاق جىل باسقارعان گ.كارىلەر ءسوز سويلەپ پىكىر الاستى. كورمە كەلۋشىلەرگە ءبىر اي بويى قىزمەت كورسەتەدى.
تالعات ءسۇيىنباي.
دەرەك, فوتو: egemen.kz.