21 ءساۋىر كۇنگى «ەگەمەندە» «كەڭەسىپ پىشپەگەن تون كەلتە بولار...» دەگەن سىن ماقالا جاريالاندى. وندا: «وبلىس ورتالىعىنىڭ كوشەلەرىنەن جاڭادان پايدالانۋعا بەرىلدى دەگەن 36 اۆتوبۋس باعىتتاردان الىنىپ تاستالدى. وتكەن جىلدىڭ جەلتوقسان ايىندا وبلىس ورتالىعىنداعى №1 اۆتوبۋس پاركى جشس جەكەشەلەندىرىلدى. 2015 جىلى جاز ايلارىندا «پاۆلودار قالاسىنداعى قوعامدىق كولىك قوزعالىسى كەشەنىن جاڭعىرتۋ» ماقساتىندا الماتى كولىك جانە كوممۋنيكاتسيا عىلىمي-زەرتتەۋ ينستيتۋتىنىڭ ماماندارى كەلىپ, جوبانى قولعا الادى.
الماتىلىق عالىمداردىڭ تولىق, دۇرىس زەرتتەۋ جۇرگىزبەگەنىنە, ولاردىڭ جاساعان نەگىزسىز وڭتايلاندىرۋ جۇيەسىنە قازىر حالىق نارازى. اكىمدەردىڭ تاپسىرىستارىن ورىنداپ, ولاردى تىڭداپ اسىعىس جۇمىس ءجۇرگىزدى. قوعامدىق كولىكتەرمەن قاراپايىم حالىق جۇرەتىندىكتەن وڭتايلاندىرۋ ماسەلەسى ءبىرىنشى, قالا تۇرعىندارىمەن تالقىلانعان جوق. مارشرۋتتىق جۇيەنى وڭتايلاندىرۋ شارالارىن جۇرگىزىپ, جوباسىن جاساعاندارى ءۇشىن الماتىلىق عالىمدارعا 50-60 ميلليونداي قاراجات جۇمسالعان كورىنەدى. عالىمدار كەلىپ, الدىمەن قالا تۇرعىندارىمەن اقىلداسىپ بارىپ, قوعامدىق تىڭداۋلار جۇرگىزىلۋى قاجەت بولاتىن. پاۆلودار الماتى سياقتى ۇلكەن مەگاپوليس ەمەس. اۆتوبۋستارمەن, شاعىن اۆتوبۋستارمەن عانا جۇرەتىن قالا تۇرعىندارى قازىر ءارى-ءسارى كۇيدە. حالىق ابدەن ۇيرەنىپ قالعان, جولاۋشىلاردى تاسىمالدايتىن شاعىن اۆتوبۋستاردىڭ باعىتتارى وزگەردى. كۇن ايازدا ايالداما ماڭىندا جاڭا اۆتوبۋستاردى ساعاتتاپ كۇتۋگە ءماجبۇر بولدى. الماتىلىق كولىك جانە كوممۋنيكاتسيا عىلىمي-زەرتتەۋ ينستيتۋتىنىڭ ماماندارى اكىمدەر بەرگەن شۇعىل تاپسىرمانى شالا-شارپى ورىنداعاندارىنىڭ كەسىرى تۇرعىندارعا ءتيدى», دەپ جازدىق.
جازىلعان جايعا ورالساق, وبلىستىق اكىمدىك وبلىس ورتالىعىنداعى №1 اۆتوبۋس پاركى 1 ملرد. 179 ميلليون تەڭگەگە ساتىلدى, ياعني جەكەشەلەندىرىلدى دەپ حابارلاعان ەدى. ەندى اۆتوبۋس پاركى مەملەكەتتىڭ مەنشىگىنە كەرى قايتارىلادى. قازىر قالالىقتار اۆتوپاركتىڭ قايتا ورالاتىنىنا, بۇرىنعى باعىتتاردىڭ قالپىنا كەلەتىنىنە قۋانىشتى. پاركتىڭ جاڭا قوجايىنىنا – «قازاقستان قۇرىلىس كومپانياسى» جشس-عا نەگىزگى تالاپ – قۇرىلعانىنا 50 جىلدان اسا ۋاقىت بولعان بايىرعى كاسىپورىننىڭ باستى باعىتىن ساقتاپ قالۋ تاپسىرىلعان-دى. جاڭا اۆتوبۋستار ساتىپ الۋ كەرەك بولدى. ەكى ارادا قاراپايىم حالىق زيان شەكتى.
الايدا, اۆتوپاركتى ساتىپ العان قوجايىن قيىن جاعدايعا تاپ بولدى, دەدى وبلىس اكىمى بولات باقاۋوۆ جۋرناليستەرمەن بولعان بريفينگ بارىسىندا. سويتسەك, وبلىس اكىمىنىڭ ايتۋىنشا, الگى قوجايىن بانكتەردەن نەسيە الا الماپتى. كەلىسىمشارت وسىلاي بۇزىلعان كورىنەدى.
– وزگەرىستەر جولاۋشىلاردى ابىگەرگە ءتۇسىردى. جەرگىلىكتى تۇرعىندار قولايسىزدىق ءۇشىن قالا اكىمدىگىنە شاعىمدانا باستادى. وسى سەبەپتى بۇگىندە قالا اكىمدىگىنە پاركتى مەملەكەتتىڭ مەنشىگىنە قايتارۋ تۋرالى وتىنىشتەر تۇسۋدە. كەلىسىمشارت بۇزىلعان سوڭ, پارككە جاڭا باسشى تاعايىندالىپ, كاسىپورىن مەملەكەتتىك مەكەمە رەتىندە جۇمىسىن باستايدى, – دەيدى بولات باقاۋوۆ.
فاريدا بىقاي,
«ەگەمەن قازاقستان»
پاۆلودار