سەمەيلىك كاسىپكەر رافايل حازيپوۆ قىستىڭ ايازدى كۇندەرىنە قاراماستان جىلىجاي سالىپ, كاسىبىن دوڭگەلەتۋدە. كاسىپكەر اۋماعى 400 شارشى مەتردەن اساتىن جىلىجايدا, كوكونىس پەن گۇل وسىرۋدە. جانە جۇمىسقا بىرنەشە مۇگەدەك, كەمباعال ادامداردى دا الىپ, ولاردىڭ ۋاقىتى ءتيىمدى ءارى پايدالى ءوتۋىن قامتاماسىز ەتىپ وتىر ەكەن. بۇرىندارى قالاداعى گۇل دۇكەندەرىنە گۇلدەر شەتتەن نەمەسە ءوڭتۇستىك وبلىستاردان تاسىمالداناتىن. ەندى, مىنە, كاسىپكەر رافايل حازيپوۆ تۇرعىنداردى ارزان ونىممەن, ال قالانى كوگالداندىرۋشى مەكەمەلەردى قاجەتتى كوشەتتەرمەن, نەبىر ادەمى گۇلدەرمەن قامتاماسىز ەتۋدى جولعا قويماق. قازىردىڭ ءوزىندە جىلىجايدا قىزعالداق پەن سارعالداق سياقتى گۇلدەر العاش ءبۇر جارا باستادى.
– گياتسينت دەگەن گۇلدى دە ءوسىرىپ جاتىرمىز. جىلىجايدىڭ ىڭعايلى بولۋىنىڭ ارقاسىندا ءدال قازىر دالادا سالقىن ەكەنىن گۇلدەر مۇلدە سەزبەيدى, – دەيدى وسىنداعى اگرونوم راۋيا دانياروۆا. – مىنا كورىپ تۇرعان قاتارلارىڭىز ءۇش, ءتورت قاتارعا دەيىن كوبەيەدى. شارۋاشىلىقتىڭ بولاشاعى بار. زەرتتەۋلەر بويىنشا گۇلدەردىڭ جىلىجايداعىلارى دا, بولمەدەگى ءوسىمدىكتەرى دە ادامعا يگى اسەر ەتەدى. ونىڭ ىشىندە لالاگ ۇلى, قازتابان گ ۇلى اۋانى لاستانۋدىڭ بىرنەشە تۇرىنەن, سونىڭ ىشىندە فورمالدەگيدتەن تازارتادى. ال بەگونيا مەن فيكۋس گۇلدەرى ۇيىڭىزگە كەلگەن ادامداردىڭ جاعىمسىز پيعىلدارىن ءوز بويلارىنا ءسىڭىرىپ, سىزدەرگە تەك وڭ ەنەرگيا جىبەرەدى دەيدى زەرتتەۋشىلەر. تەلەديدار, كومپيۋتەر, تولقىندى پەشتەردىڭ ساۋلەلەرىنەن ساقتانۋعا سىزدەرگە راۋشان گۇلدەر, ورحيدەيا, ورمەلەگىش (ليانا) ءوسىمدىكتەر كومەكتەسەدى. بالالار ءبولمەسىنە شەگىرگۇلدەردى (فيالكا) ورنالاستىرساڭىز, ولاردىڭ جەتكىنشەكتىڭ ءوسىپ-جەتىلۋ ۋاقىتىنداعى كوڭىل-كۇيىن ءبىرقالىپتىلىققا بەيىمدەيدى ەكەن. قازتاماق گ ۇلىنىڭ قاسىندا 15 مينۋتتاي وتىرساڭىز دا جەتكىلىكتى. ءسىز ءوزىڭىزدىڭ جاڭا كۇش جيناپ, دەمالعانىڭىزدى سەزەسىز. ويتكەنى, بۇل وسىمدىك ەفير مايلارىن ءبولىپ شىعارادى. ءسىزدىڭ اعزاڭىزداعى زات الماسۋ پروتسەسى ۇلعايا تۇسەدى. ۇساق جاپىراقتى بۇرىشتار مەن ريزانتەمالار وتباسىنداعى, جۇمىس ورنىنداعى ادامداردىڭ ءبىر-بىرىنە دەگەن جاقسى قارىم-قاتىناستىڭ قالىپتاسۋىنا اسەر ەتەدى.
رافايل حازيپوۆتىڭ ايتۋىنشا, قالا اكىمدىگى مەن كوپتەگەن مەكەمەلەردەن گۇل كوشەتتەرىنە تاپسىرىس قازىردەن باستاپ ءتۇسىپ جاتىر. جەرگىلىكتى جىلىجايدا وسىرىلگەن گۇلدەر بيىل 2 مىڭ شارشى مەتر اۋماققا ەگىلمەك. بۇل وزگە وڭىرلەردەن ساتىپ العاننان الدەقايدا پايدالى. جىلىجايدا جيىرماعا جۋىق ادام جۇمىس ىستەيدى دەسەك, باسىم كوپشىلىگى دەنى مۇمكىندىگى شەكتەۋلى جاندار. تۇراقتى جالاقىمەن قامتىلىپ, تاجىريبەسى جوقتارى باعباندىققا ۇيرەنىپ جاتىر.
– قاراشا ايىنان باستاپ, وسى جەردە ەڭبەك ەتىپ جاتىرمىن, – دەيدى ءىىى توپتاعى مۇگەدەك جان تاتيانا سۆيستۋنوۆا. – قۇلاعى ناشار ەستيتىن بىرنەشە ادامدى جۇمىسقا الدى. قازىردە گۇل باپتاۋدىڭ قىر-سىرىن مەڭگەرىپ قالدىم.
رافايل حازيپوۆ جىلىجاي قۇرۋدى كوپ جىلدان بەرى جوسپارلاپ كەلگەن ەكەن. قازىر جاڭا شارۋاشىلىعىنىڭ اياق الىسى جامان ەمەس. گۇلدەن باسقا جىلىجايدا كوكونىستىڭ ءتۇر-ءتۇرى ەگىلگەن. سەبەبى, سىرتتان تاسىمالداناتىن قىمبات كوكونىستەن گورى ءدام-ساپاسى كەلىستى وتاندىق, ارزان ونىممەن تۇتىنۋشىلاردى قامتىعان اسا پايدالى, دەيدى ول. قازىر ول جوسپارى بىرتىندەپ ىسكە اسۋدا. بۇگىنگى كۇندە گۇلدەرمەن قاتار مۇندا قىزاناق, قيار, پياز بەن اسكوك تە ءوسىپ جاتىر.
راۋشان نۇعمانبەكوۆا
سەمەي