استانا. 8 ءساۋىر. قازاقستان پرەزيدەنتى نۇرسۇلتان نازارباەۆ الداعى اپتادا بىرنەشە مەملەكەتكە جۇمىس ساپارىمەن بارادى. بۇل تۋرالى akorda.kz-كە سىلتەمە جاساعان egemen.kz حابارلادى.
مەملەكەت باسشىسى 11 – 12 ساۋىردە پرەزيدەنت حاسان ءرۋحانيدىڭ شاقىرۋىمەن يران يسلام رەسپۋبليكاسىنا بارادى. ەكى ەلدىڭ باسشىلارى حاسان ءرۋحانيدىڭ 2014 جىلى قىركۇيەكتە استاناعا مەملەكەتتىك ساپارى كەزىندە قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسىن تالقىلايدى دەپ جوسپارلانۋدا. سونىمەن قاتار, ساۋدا-ەكونوميكا, ينۆەستيتسيا, اۋىل شارۋاشىلىعى, كولىك-ترانزيت سالالارىنداعى ىنتىماقتاستىقتى نىعايتۋ جولدارى مەن حالىقارالىق جانە وڭىرلىك قاۋىپسىزدىك سالاسىنداعى ءوزارا ءىس-قيمىل جايى قاراستىرىلادى.
قازاقستان پرەزيدەنتى سونداي-اق, 13 – 14 ساۋىردە يسلام ىنتىماقتاستىعى ۇيىمىنىڭ XIII سامميتىنە قاتىسۋ ءۇشىن تۇركيا رەسپۋبليكاسىنا بارادى. ءسامميتتىڭ نەگىزگى تاقىرىبى – «بىرلىك پەن ىنتىماق ادىلدىك پەن بەيبىتشىلىك ءۇشىن». ساپار بارىسىندا مەملەكەت باسشىسىنىڭ تۇركيا پرەزيدەنتى رەدجەپ تايپ ەردوعانمەن كەزدەسۋى جوسپارلانعان. كەزدەسۋ اياسىندا استانا مەن انكارا ىنتىماقتاستىعىنىڭ نەگىزگى باعىتتارى تالقىلاناتىن بولادى. سونىمەن قاتار, سامميت اياسىندا دەلەگاتسيالار باسشىلارىمەن كەلىسسوزدەر وتكىزۋ, سونداي-اق, تۇركيانىڭ ىسكەر توپتار وكىلدەرىمەن كەزدەسۋ كوزدەلۋدە.
15 ساۋىردە نۇرسۇلتان نازارباەۆ وزبەكستان رەسپۋبليكاسىنا بارىپ, پرەزيدەنت يسلام كارىموۆپەن كەزدەسەدى. كەلىسسوزدەر اياسىندا مەملەكەتتەر باسشىلارى قازاقستان مەن وزبەكستاننىڭ ەكىجاقتى قارىم-قاتىناسىنىڭ نەگىزگى اسپەكتىلەرىن تالقىلايدى دەپ جوسپارلانعان.
تالعات رايىمبەك.
دەرەك, فوتو: akorda.kz.