ءبىلىم بەرۋ سالاسىنا جاساندى ينتەللەكتىنى (جي) ەنگىزۋ – زاماناۋي وقۋ پروتسەسىنىڭ اجىراماس بولىگىنە اينالدى. جي وقىتۋدى دەربەستەندىرۋ, اكىمشىلىك مىندەتتەردى اۆتوماتتاندىرۋ جانە ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن جاڭا كوكجيەكتەر اشادى. الماتىداعى Freedom Talk EdTech الاڭىندا ءبىلىم بەرۋ جانە تەحنولوگيا سالاسىنىڭ ساراپشىلارى جاساندى ينتەللەكتىنىڭ وقىتۋ جۇيەسىن قالاي وزگەرتەتىنىن, قانداي مىندەتتەردى شەشە الاتىنىن جانە تەحنولوگيا مەن مەكتەپتەگى ادامنىڭ ءرولى اراسىنداعى شەكارا قايدا وتەتىنىن تالقىلادى, دەپ جازادى Egemen.kz.
پىكىرتالاسقا Bilim Group نەگىزىن قالاۋشى جانە كومپانيانىڭ باقىلاۋ كەڭەسىنىڭ توراعاسى راۋان كەنجەحان ۇلى, Freedom Holding باس تەحنيكالىق ديرەكتورى رەنات تۇكانوۆ پەن Bilim Group باس ديرەكتورى جانە تەڭ نەگىزىن قالاۋشى الەكساندر ساۆچەنكو قاتىستى.
راۋان كەنجەحان ۇلىنىڭ پىكىرىنشە, بۇگىنگى ءبىلىم بەرۋ سالاسىنداعى باستى سىن-قاتەر – وقىتۋدىڭ كلاسسيكالىق مودەلىنىڭ زامان تالابىنا ساي كەلمەۋى. ساراپشى ءبىلىم جۇيەسىنىڭ ءالى دە عاسىرلار بويى وزگەرمەگەن ەسكى قاعيداتتارعا سۇيەنەتىنىن اتاپ ءوتتى. ونىڭ ايتۋىنشا, جۇيە ءالى كۇنگە دەيىن عاسىرلار بويى وزگەرمەگەن قاعيدات بويىنشا قۇرىلعان. بىراق تەحنلوگيانىڭ دامۋى مۇنى وزگەرتۋگە مۇمكىندىك بەرەدى. ءداستۇرلى ءبىلىم بەرۋدىڭ نەگىزگى تۇيتكىلى – ونىڭ 200 جىل بۇرىنعى قالىپتان شىعا الماۋىندا. سىنىپتاعى وتىز وقۋشى جانە ارقايسىسىنا كوڭىل بولۋگە فيزيكالىق تۇرعىدان ۇلگەرمەيتىن جالعىز مۇعالىم – بۇگىندە ۇيرەنشىكتى, بىراق ءتيىمسىز كورىنىسكە اينالعان. قازىرگى تاڭدا تەحنولوگيانىڭ مۇمكىندىگىن ەركىن مەڭگەرگەن, ءتىپتى جاساندى ينتەللەكتىنى (جي) پايدالانا الاتىن وقۋشىلار ءوسىپ كەلەدى. الايدا مۇعالىمدەردە ءار بالاعا ارنالعان جەكە وقۋ تراەكتورياسىن قۇرۋعا مۇمكىندىك پەن ۋاقىت تاپشى.جاساندى ينتەللەكتىنى ستۋدەنتتەر قالاي قولدانىپ ءجۇر؟
قوعامدا «جاساندى ينتەللەكتى مۇعالىمدەردى الماستىرا الادى» دەگەن پىكىر قالىپتاسقان. بىراق مۇعالىمدەر مۇنىمەن كەلىسپەيدى. جاساندى ينتەللەكت مۇعالىمنىڭ ورنىن باسۋى ءۇشىن نەيروجەلى كەلەسى كۇردەلى داعدىلاردى مەڭگەرۋى ءتيىس:
ەموتسيانى, ىم-يشارا مەن ميميكانى تانۋ جانە ولاردىڭ ءمانىن ءتۇسىنۋ; وقۋشىنىڭ حابارلامالارىن كوپ دەڭگەيلى تەرەڭ تالداۋدان وتكىزۋ; ماتىندىك جانە داۋىستىق اقپاراتقا سايكەس رەاكتسيا ءبىلدىرۋ. تەحنولوگيالار دامۋىنىڭ قازىرگى دەڭگەيىنە سۇيەنسەك, جي-ءدى مۇنداي «ادامي» قاسيەتتەرگە باۋلۋ ءالى دە مۇمكىن ەمەس. ەگەر جاقىن ارادا وقىتۋدىڭ مۇلدەم جاڭا ادىستەمەسى پايدا بولماسا, جاساندى ينتەللەكت ادام بالاسىنا ءتان ەمپاتيا مەن سەزىمدى الماستىرا المايدى.Bilim Group باس ديرەكتورى الەكساندر ساۆچەنكو ءوز سوزىندە مەكتەپتە تەحنولوگيالاردى تاجىريبەدە قولدانۋعا جانە پەداگوگتىڭ ءرولىن وزگەرتۋگە باسا نازار اۋداردى. ونىڭ ايتۋىنشا, جي نەگىزگى اسەرى – ادامدى الماستىرۋدا ەمەس, ءبىلىم بەرۋ ۇدەرىسى ىشىندەگى فۋنكتسيالاردى قايتا بولۋىندە.
ء«بىز جاساندى ينتەللەكت مۇعالىمدى الماستىرادى دەگەن ستسەناريدى كورىپ وتىرعان جوقپىز. الايدا ول كۇندەلىكتى اتقارىلاتىن جۇمىستاردىڭ ەداۋىر بولىگىن – وقۋ ماتەريالدارىن دايىنداۋدى, تاپسىرمالاردى تەكسەرۋ مەن ەسەپ بەرۋدى ءوز موينىنا الا الادى. بۇل پەداگوگتىڭ ەڭ ماڭىزدى مىندەتى – شاكىرتكە تالىمگەر بولۋ, وعان قولداۋ كورسەتۋ جانە تىكەلەي قارىم-قاتىناس ورناتۋ ءۇشىن ۋاقىتىن بوساتادى», دەدى ساراپشى. ساراپشى ساۆچەنكو وقىتۋدى دەربەستەندىرۋ تەك تاپسىرمانى كۇردەلەندىرۋ ەمەس, بالانىڭ جەكە مۇددەسى مەن ومىرلىك جاعدايىن ەسكەرۋ ەكەنىن اتاپ ءوتتى. ول ءبىلىم بەرۋ پلاتفورمالارى جينايتىن مالىمەتتەردىڭ ماڭىزى مەن ولاردى تالداۋ مۇمكىندىكتەرىنە جەكە توقتالدى. «جاساندى ينتەللەكت جاڭا يندۋسترياعا – وقۋشى تۋرالى دەرەكتەردى تالداۋ مەن تۇسىندىرۋگە جول اشادى. ءبىز تەك اقپارات جيناپ قانا قويماي, ونى اتا-انالار مەن پەداگوگتار ءۇشىن ۇعىنىقتى قورىتىندىعا اينالدىرا الامىز», دەپ ءتۇسىندىردى ساۆچەنكو. ساراپشىنىڭ پايىمداۋىنشا, كەز كەلگەن ءبىلىم بەرۋ پروتسەسى – بۇل ەڭ الدىمەن كوممۋنيكاتسيا. مۇعالىم تەك ءبىلىم كوزى عانا ەمەس, ول – بالانىڭ مىنەز-قۇلقى مەن ويلاۋ جۇيەسىن قالىپتاستىراتىن تۇلعا, ناعىز رولدىك مودەل. تەحنولوگيا ۇستازدىڭ جۇگىن جەڭىلدەتىپ, ءار وقۋشىعا كوڭىل بولۋىنە ۋاقىت تاۋىپ بەرۋى ءتيىس, بىراق ول ادامدى ەشقاشان الماستىرا المايدى.جاساندى ينتەللەكت جاڭىلسا, كىم جاۋاپتى؟
Freedom Holding Corp كومپانياسىنىڭ باس تەحنيكالىق ديرەكتورى رەنات تۇقانوۆتىڭ ايتۋىنشا, قازىرگى زامانعى جۇيەلەر, ادامدىق ويلاۋ تۇرىنە يە ەمەس. «قازىرگى زامانعى جاساندى ينتەللەكت جۇيەسى وتە ناقتى مىندەتتەردى شەشەدى. ەگەر تىم جەڭىلدەتسەڭىز, ولار كەلەسى ارەكەتتى نەمەسە ءسوزدى جاقسى بولجايدى, بىراق ادام سياقتى ويلانبايدى جانە الاڭدامايدى. ولاردىڭ تاجىريبەسى, ەموتسياسى جانە فيزيكالىق الەمى جوق», دەپ اتاپ ءوتتى ول.ونىڭ ايتۋىنشا, تولىق اۆتوماتتاندىرۋ تۋرالى اڭگىمەلەر كوبىنەسە اسىرا ايتىلعان. ءتىپتى تەحنولوگيالاردى بەلسەندى ەنگىزگەن كەزدە دە مىندەتتەردىڭ ەداۋىر بولىگى ادامدا قالادى.
«زەرتتەۋشىلەردىڭ باعالاۋىنشا, ەكونوميكاداعى مىندەتتەردىڭ تورتتەن ءبىر بولىگىن اۆتوماتتاندىرۋعا بولادى جانە ولاردىڭ از عانا بولىگى ەكونوميكالىق تۇرعىدان اقتالادى. سوندىقتان جي مۇمكىندىكتەرىنە بايىپپەن قاراۋ ماڭىزدى – بۇل كۇشتى قۇرال, بىراق ادامدى امبەباپ الماستىرۋ ەمەس», دەپ اتاپ ءوتتى تۇقانوۆ.
ول سونداي-اق قازاقستان ءۇشىن جاساندى ينتەللەكتىنى دامىتۋدىڭ ەكونوميكالىق ءوسىمنىڭ ماڭىزدى باعىتى بولۋى مۇمكىن ەكەنىن, بىراق جۇيەلى جوبالار مەن ۇزاق مەرزىمدى ءتاسىلدى تالاپ ەتەتىنىن اتاپ ءوتتى.
جاساندى ينتەللەكت مۇعالىمنىڭ جۇمىسىن قالاي جەڭىلدەتەدى؟
جالپى, پىكىرتالاسقا قاتىسۋشىلار قازاقستانداعى EdTech-يندۋسترياسى تاجىريبە ساتىسىنان شىعىپ, ءبىلىم بەرۋ ساياساتىنىڭ جۇيەلىك ەلەمەنتىنە اينالىپ وتىر دەپ تۇجىرىمدادى. تەحنولوگيالار وقىتۋدىڭ قولجەتىمدىلىگى مەن ساپاسىن ارتتىرۋعا مۇمكىندىك بەرەدى, الايدا تسيفرلىق قۇرالدار مەن ادامي ءوزارا ءىس-قيمىل اراسىنداعى تەڭگەرىم نەگىزگى فاكتور بولىپ قالا بەرەدى.
Freedom Talk EdTech الاڭىنداعى پىكىرتالاس بۇگىنگى كۇننىڭ باستى ماسەلەسى تەحنولوگيانىڭ مەكتەپكە كەلۋى ەمەس, ءبىلىم بەرۋدىڭ جاڭا ۇلگىسىن قالىپتاستىرۋ ەكەنىن ايقىنداپ بەردى. جاساندى ينتەللەكت مۇعالىمنىڭ ورنىن باسپايدى, كەرىسىنشە, ونىڭ مۇمكىندىكتەرىن ەسەلەپ ارتتىراتىن تاپتىرماس قۇرالعا اينالادى.