ەۋروپالىق وداق بۇۇ قاۋىپسىزدىك كەڭەسىنىڭ 2016 جىلدىڭ 2 ناۋرىزىندا قابىلداعان قارارىنا سايكەس, سولتۇستىك كورەياعا قاتىستى سانكتسيالار اۋقىمىن كوبەيتتى. بۇل جونىندە ەۋرووداق تاراتقان كومميۋنيكەدە ايتىلعان.
ەۋروپالىق وداقتىڭ حابارلاماسىندا وسىعان بايلانىستى: «2016 جىلدىڭ 31 ناۋرىزىندا ەۋرووداق بۇۇ قاۋىپسىزدىك كەڭەسىنىڭ 2016 جىلدىڭ 2 ناۋرىزىندا قابىلداعان №2270 قارارىنا سايكەس, كحدر-عا قارسى شەكتەۋ شارالارىن كەڭەيتتى», – دەلىنگەن. سانكتسيا سولتۇستىك كورەيانىڭ قارۋلى كۇشتەرىنىڭ جاۋىنگەرلىك مۇمكىندىكتەرىن دامىتۋعا ۇلەس قوسا الاتىن كەز كەلگەن زاتتاردىڭ (ازىق-ت ۇلىك پەن ءدارى-دارمەكتەن باسقا) ەكسپورتى مەن يمپورتىنا تىيىم سالۋدى كوزدەيدى. وسى قۇجات ەۋرووداققا مۇشە ەلدەردى سولتۇستىك كورەياعا جەتكىزىلەتىن بارلىق جۇكتەردە تىيىم سالىنعان تاۋارلار مەن تەحنولوگيالاردىڭ بولماۋىن تەكسەرۋگە, سونداي-اق, اۋە جانە تەڭىز كەمەلەرىنىڭ جۇكتەرىنە تىيىم سالۋعا, ولاردى تىركەمەۋگە مىندەتتەيدى.
جىلدىق پايداسى – 30 ميلليارد دوللار
الەمدىك اقپارات اگەنتتىكتەرىنىڭ حابارلاۋىنا قاراعاندا, كوكايندى ەۋروپاعا استىرتىن جەتكىزۋمەن اينالىساتىن يتاليالىق «لاندرانگەتا» دەپ اتالاتىن قىلمىستىق توبى جىلىنا 30 ميلليارد دوللار پايدا تابادى. بۇل الەمدىك ەسىرتكى بيزنەسىنىڭ التىدان ءبىر بولىگى ەكەن.
باسەكەلەستەرىنەن وزىپ تۇرعان بۇل قىلمىستىق توپتىڭ مۇشەلەرى مەكسيكالىق جانە كولۋمبيالىق ەسىرتكى ساتۋشىلاردىڭ سەنىمىنە كىرگەن كورىنەدى. اگەنتتىكتەردىڭ اقپاراتتارى بويىنشا, يتاليانىڭ ەڭ ءىرى دجونا تاۋرو پورتىنا تاۋلىگىنە شامامەن 8 مىڭداي جۇك كونتەينەرى كەلەدى. ءتارتىپ ساقشىلارى وسىنشاما كونتەينەردىڭ ءاربىرىن تەكسەرىپ شىعۋ مۇمكىن ەمەس ەكەندىگىن ايتادى. ال يتاليا بيلىگى ەسىرتكى بيزنەسىمەن كۇرەسۋ ءۇشىن جىل سايىن 2,5 ميلليارد ەۋرو جۇمسايدى ەكەن.
باستى كۇدىكتى فرانتسياعا ەكستراديتسيالانادى
بەلگيانىڭ بيلىگى وتكەن جىلدىڭ 13 قاراشاسىندا پاريجدە بولعان تەررورلىق اكتىلەرگە باستى كۇدىكتى رەتىندە ۇستالعان سالاح ابدەسلامدى فرانتسياعا ەكستراديتسيالاۋعا شەشىم قابىلدادى.
بەلگيا مەملەكەتتىك پروكۋرورىنىڭ حاباردار ەتۋىنشە, س.ابدەسلامدى فرانتسيا ەلىنە تاپسىرۋعا رۇقسات ەتىلگەن. ءتورت ايعا جۋىق بوي تاسالاپ جۇرگەن تەررورشى 18 ناۋرىز كۇنى بريۋسسەلدە ۇستالعان ەدى. وعان پاريجدە 130 ادامنىڭ ءومىرىن جالماعان تەررورلىق شابۋىلداردى جوسپارلاپ, ونى جۇزەگە اسىرۋعا ىقپال ەتتى دەگەن ايىپ تاعىلىپ وتىر. تەراكتىلەرگە جاۋاپكەرشىلىكتى «يسلام مەملەكەتى» ەكسترەميستىك ۇيىمى موينىنا العان بولاتىن. ال ابدەسلامنىڭ ادۆوكاتى سەدريك مويس كۇدىكتىنىڭ فرانتسيا بيلىگىمەن «ىنتىماقتاسقىسى» كەلەتىنىن مالىمدەدى. فرانتسيانىڭ ادىلەت ءمينيسترى جان-جاك ۋرۆوانىڭ مالىمدەۋىنشە, باسقاداي ءبىر «توتەنشە وقيعا» بولا قالماسا, س.ابدەسلام الداعى 10 كۇن ىشىندە ەكستراديتسيالانادى.
قىسقا قايىرىپ ايتقاندا:
سوڭعى 40 جىلدا الەمدە ارتىق سالماعى بار ەرەسەك ادامداردىڭ سانى 105 ميلليوننان 641 ميلليونعا دەيىن وسكەن. ەگەر جاعداي ءارى قاراي جالعاسا بەرسە, 2025 جىلعا قاراي سالماعى ارتىق ەر ادامداردىڭ ۇلەسى 18 پايىزدى, ال ايەلدەردىڭ ۇلەسى 21 پايىزدى قۇرايدى ەكەن. ارتىق سالماقتىلاردىڭ «كوشىن» قىتاي مەن اقش باستاپ تۇر.
ۆەتنامنىڭ ۇلتتىق جينالىسىندا داۋىس بەرۋ ناتيجەسى بويىنشا ەل پرەزيدەنتى چىونگ تان شانگ قىزمەتىنەن بوساتىلدى. جينالىسقا قاتىسقان 473 دەپۋتاتتىڭ 447-ءسى وعان قارسى داۋىس بەرگەن.
ليۆان قاۋىپسىزدىك كۇشتەرىنىڭ قىزمەتكەرلەرى ەلدە ادام ساۋداسىمەن اينالىساتىن ءىرى قىلمىستىق توپتى تالقاندادى جانە كامەلەتتىك جاسقا تولماعان 75 قىز بالانى قۇلدىق زورلىق-زومبىلىقتان بوساتتى.
اقش-تىڭ ميسسيسيپي شتاتىندا «قىدىرۋعا» جىبەرىلگەن يت ءوزىنىڭ يەسىنە ىشىندە جارتى كيلو ەسىرتكى بار پاكەت اكەلگەن. ءيتتىڭ يەسى ونى جەرگىلىكتى پوليتسيا بولىمشەسىنە اپارىپ بەرگەن, ولار وسى وقيعاعا بايلانىستى تەكسەرۋ جۇرگىزىپ جاتىر.
ەكسترەميستەرمەن كۇرەس ماسەلەسىن تالقىلادى
«رەيتەر» اقپارات اگەنتتىگىنىڭ حابارلاۋىنشا, اقش پرەزيدەنتى باراك وباما ۆاشينگتوندا يادرولىق قاۋىپسىزدىك جونىندەگى سامميت كەزىندە تۇركيا پرەزيدەنتى رەجەپ تايىپ ەردوعانمەن كەزدەسكەن.
كەزدەسۋدە تاراپتار «يسلام مەملەكەتى» ەكسترەميستىك توپتارىمەن كۇرەستى كۇشەيتۋگە قاتىستى ماسەلەلەردى تالقىلاعان. سونداي-اق, باراك وباما تۇركيا باسشىسىنا ونداعان ادام ءومىرىن قيعان ديارباقىردا ورىن العان تەررورلىق اكتىلەرگە بايلانىستى كوڭىل ايتقان جانە اقش تۇركيانىڭ قاۋىپسىزدىگىنە قولداۋ بىلدىرەتىنىن اتاپ وتكەن. ايتا كەتەيىك, سوڭعى كەزدە اقش پەن تۇركيا اراسىندا كەيبىر ماسەلەلەرگە بايلانىستى ءوزارا تۇسىنىسپەۋشىلىك كورىنىس بەردى. نەگىزىنەن ول ۆاشينگتوننىڭ سيريادا ەكسترەميستەرمەن كۇرەسىپ جۇرگەن كۇرد جاساقتارىنا قولداۋ كورسەتۋىنە قاتىستى. بۇعان انكارا بۇرىننان-اق قارسى.
سايلاۋ وتكىزۋگە كەلىسەتىن سىڭايلى
سيريا پرەزيدەنتى باشار اساد, ەگەر سيريا حالقى مەرزىمىنەن بۇرىن سايلاۋ وتكىزۋدى قالايتىن بولسا, وندا بۇعان ءوزىنىڭ كەلىسىم بەرەتىنىن مالىمدەدى. بۇل مالىمدەمەنى ول «نوۆوستي» اقپارات اگەنتتىگىنە بەرگەن سۇحباتى بارىسىندا جاساعان.
«بىرقاتار وپپوزيتسيالىق كۇشتەر ەمەس, حالىق ءوز ەركىمەن سايلاۋ وتكىزۋدى قالايتىن بولسا, ول مەن ءۇشىن پروبلەما ەمەس, – دەپتى پرەزيدەنت وسى ماسەلە جونىندە. – مۇنداي قادامعا بارۋ ءۇشىن بىزگە پرەزيدەنتتىڭ نەمەسە ۇكىمەتتىڭ پىكىرى ەمەس, سيرياداعى قوعامنىڭ پىكىرى قاجەت». سيريا باسشىسىنىڭ پىكىرىنشە, مەملەكەت باسشىسى ازاماتتاردىڭ تىكەلەي داۋىس بەرۋى ارقىلى سايلانۋى ءتيىس. سۇحبات بارىسىندا باشار اساد ۋاقىتشا بەيبىت كەلىسىمگە دە توقتالىپ وتكەن. ونىڭ سوزىنە قاراعاندا, ۋاقىتشا كەلىسىمگە كەلۋدى قول جەتكىزىلگەن تابىس دەپ باعالاۋعا بولادى.
ۇشقىشتى ءولتىردى دەگەن كۇدىكتى ۇستالدى
تۇركيانىڭ پوليتسياسى يزميردە رەسەيدىڭ سۋ-24 ۇشاعىنىڭ ۇشقىشى ولەگ پەشكوۆتىڭ ولىمىنە سەبەپشى دەپ تانىلعان الپارسلان چەليكتىڭ ۇستالعانى تۋرالى اقپاراتتى راستادى.
«نوۆوستي» اگەنتتىگى تاراتقان اقپاراتقا قاراعاندا پوليتسيا وكىلى ا.چەليكتىڭ قازىرگى كەزدە قاماۋدا وتىرعانىن عانا ايتقان. كەيبىر مالىمەتتەر ونىڭ 31 ناۋرىز كۇنى تۇتقىنعا الىنعانىن, ال وپەراتسيا 30 ناۋرىزدا كەشكىسىن يزمير قالاسىنداعى ءبىر مەيرامحانادا جۇزەگە اسىرىلعانىن كورسەتەدى. چەليكپەن بىرگە 15 ادام ۇستالعان. كۇدىكتىلەردەن كالاشنيكوۆ اۆتوماتى, ەكى تاپانشا جانە وقتار الىنعان.
ينتەرنەت ماتەريالدارى نەگىزىندە ازىرلەندى.