كەشە پرەمەر-ءمينيستردىڭ ورىنباسارى داريعا نازارباەۆا استانا قالاسىنىڭ ءبىرقاتار الەۋمەتتىك نىساندارىن ارالادى. باعدارلاما بويىنشا, الدىمەن №10 قالالىق ەمحانانىڭ, ەلوردالىق دەنساۋلىق ساقتاۋ باسقارماسىنىڭ Call-ورتالىعى جانە ەمحانالارعا كەلۋشىلەردى دەنساۋلىق جاعدايىنىڭ دارەجەسىنە قاراي قابىلداۋدى قامتاماسىز ەتەتىن TRIAGE-جۇيەسىنىڭ جۇمىستارىمەن تانىستى.
ۇكىمەت باسشىسىنىڭ ورىنباسارى ەمحانانى ارالاپ, دارىگەرلەردىڭ مەديتسينالىق جاڭا قۇرال-جابدىقتارىمەن جۇمىس ىستەۋ بارىسىمەن تانىستى. ايتا كەتەتىن بولساق, ەلورداداعى №10 قالالىق ەمحانا «100 مەكتەپ – 100 اۋرۋحانا» مەملەكەتتىك باعدارلاماسىنىڭ اياسىندا سالىنىپ, 2014 جىلدىڭ اقپان ايىندا اشىلعان بولاتىن. ەمحانا ءبىر اۋىسىمدا 500 ادام قابىلدايدى, ونىڭ 350-ءى ەرەسەك تۇرعىندار بولسا, 150-ءى بالالار. مەديتسينالىق مەكەمەدە وزىق تەحنولوگيا نەگىزىندەگى قۇرالدارمەن جابدىقتالعان وتا جاساۋ كابينەتى بار.
سودان كەيىن داريعا نازارباەۆا №10 قالالىق ەمحانادا استانا قالاسىنىڭ مەديتسينالىق قىزمەتكەرلەرىمەن كەزدەستى. ساليقالى اڭگىمە بارىسىندا بۇگىندە ەلوردانىڭ مەديتسينالىق سالاسىندا ورىن العان پروبلەمالار مەن قول جەتكىزگەن جەتىستىكتەر جان-جاقتى تىلگە تيەك ەتىلدى. بۇگىندە ەمحاناداعى دارىگەرلەردىڭ سىرقاتتاردى قابىلداۋعا بولىنگەن ۋاقىتىنىڭ 40 پايىزى قاعاز تولتىرۋمەن وتەدى ەكەن. وسىعان بايلانىستى ۇكىمەت باسشىسىنىڭ ورىنباسارى قالالىق دەنساۋلىق ساقتاۋ دەپارتامەنتىنىڭ باسشىسى ەرىك بايجۇنىسوۆتەن قاعازباستىلىقپەن كۇرەس بارىسى قالاي جۇزەگە اسىرىلىپ جاتقانىن سۇرادى. «قاعازباستىلىقپەن كۇرەس پارمەندى جۇرگىزىلۋدە. الايدا, قازىرگى كۇندە قولدانىستاعى باعدارلامالاردىڭ ءوزى 14-كە جۋىق. ولاردىڭ بارىنە جاۋاپ بەرۋ كەرەك. ءبىز قاعازباستىلىقتى ازايتۋ ماقساتىندا وسى ءساۋىر ايىنان باستاپ سمارت-مەديتسينا باعدارلاماسىن ەنگىزە باستايمىز. بۇل وزىق ءادىس قاعازباستىلىقتى بارىنشا ازايتۋعا ءتيىس», دەدى دەپارتامەنت باسشىسى. پرەمەر-ءمينيستردىڭ ورىنباسارى قالالىق مەديتسينا سالاسىندا بىرىڭعاي دەرەك بازاسىن قۇرىپ, بۇل ماسەلەنى تولىق اۆتوماتتاندىرۋدى ۇسىندى. سونىمەن بىرگە, دارىگەرلەر قاۋىمىمەن كەزدەسۋ بارىسىندا قالا مەكتەپتەرىندەگى بالالاردى تاماقتاندىرۋدىڭ ساپاسى مەن قاۋىپسىزدىگىن ارتتىرۋ, ەمحانالارداعى كەزەكتى ازايتۋ جانە باسقا وزەكتى ماسەلەلەر تىلگە تيەك ەتىلدى.
ۇكىمەت باسشىسىنىڭ ورىنباسارى استانا قالاسى اكىمدىگىنە قاراستى كاسىپتىك-تەحنيكالىق كوللەدجدە بولدى. مۇندا جەتىم جانە اتا-اناسىنىڭ قامقورلىعىنان تىس قالعان بالالار مەملەكەتتىك تاپسىرىس بويىنشا ءبىلىم الادى. كوللەدج بۇگىنگى زاماننىڭ وزىق وقۋ-وندىرىستىك شەبەرحاناسىمەن, سپورت جانە اكت زالدارىمەن, مەديتسينالىق ورتالىق كىتاپحانا جانە جايلى جاتاقحانالارمەن جابدىقتالعان. استانا اكىمدىگىنىڭ كاسىپتىك-تەحنيكالىق كوللەدجىنىڭ ۇجىمىمەن جانە وقۋشىلارىمەن وتكەن كەزدەسۋ بارىسىندا پرەمەر-ءمينيستردىڭ ورىنباسارى قازاقستاننىڭ ەڭبەك نارىعىندا ءىت سالاسىنىڭ ماماندارىنا دەگەن سۇرانىستىڭ ارتاتىندىعىن مالىمدەدى. «الداعى ۋاقىتتا ءىت ماماندارىنا دەگەن سۇرانىس ەلەۋلى تۇردە ارتادى. ءبىز قازىرگى كەزدە ساندىق قازاقستان باعدارلاماسىمەن جۇمىس ىستەۋدەمىز. ينۆەستيتسيالار جانە دامۋ مينيسترلىگىنىڭ مالىمەتىنشە, الداعى ءۇش جىلدا ەلىمىزگە 65 مىڭ ءىت ماماندارى كەرەك بولادى. ياعني, وسى مەرزىمدە جىل سايىن ءبىزدىڭ كوللەدجدەر مەن ينستيتۋتتار شامامەن 20 مىڭ مامان دايارلاۋى كەرەك», دەدى داريعا نازارباەۆا. وسى ماسەلە توڭىرەگىندە ءبىلىم جانە عىلىم ءمينيسترى ەرلان ساعاديەۆ 2016 جىلدىڭ 1 قاڭتارىنان باستاپ مەكتەپتەردە, كوللەدجدەردە ينفورماتيكا جانە اقپاراتتىق تەحنولوگيالار پاندەرى اعىلشىن تىلىندە جۇرگىزىلەتىندىگىن ايتىپ ءوتتى.
ۇكىمەت باسشىسىنىڭ ورىنباسارى بۇدان كەيىن №81 «Astana English Shool» اتتى دارىندى بالالار گيمنازياسىنىڭ وقۋ ۇدەرىسىمەن تانىستى. گيمنازيا قابىرعاسىندا بولعان اڭگىمە بارىسىندا مەكتەپتەردە اعىلشىن ءتىلىن تەرەڭدەتىپ وقىتۋ ماسەلەسى تىلگە تيەك ەتىلدى. سونىمەن بىرگە, پەداگوگتار ۇجىمى وكىلدەرىمەن ءۇش ءتىلدى جانە بەس كۇندىك وقىتۋ جۇيەسىن ەنگىزۋ ماسەلەلەرى ءسوز بولدى. «جاستار» تەاترىندا بولعان كەزىندە ۇكىمەت باسشىسىنىڭ ورىنباسارى تەاتر ونەرى وكىلدەرىمەن مادەنيەت جانە ونەر سالاسىن دامىتۋ ماسەلەلەرىن ءسوز ەتتى. سەنبى كۇنى پرەمەر-ءمينيستردىڭ ورىنباسارى داريعا نازارباەۆانىڭ ەلورداداعى الەۋمەتتىك نىسانداردىڭ جۇمىسىمەن تانىسۋ ساپارى جالعاساتىن بولادى.
«ەگەمەن-اقپارات».