تاۋەلسىزدىك – ەڭ ۇلىق مەرەكە. مۇنىڭ قادىرىن جاس ۇرپاق جاقسى تۇسىنەدى. بوستاندىق كىلتى وزگە بىرەۋدىڭ قولىندا بولىپ, موينىڭنان بۇعاۋ, اياعىڭنان تۇساۋ كەتپەگەن جىلداردىڭ قاسىرەتىن اعا ۇرپاق ۇمىتقان جوق. جۇمابەك تاشەنوۆ سەكىلدى ەلىنىڭ باعىنا تۋعان تۇلعالار قازاقستاندى بودان مەملەكەت, قازاقتى بۇراتانا حالىق كورگەن كومپارتيانىڭ باسشىسى ن.س.حرۋششەۆقا قارسى شىعىپ, «قازاقتىڭ دالاسى قۇراق كورپە ەمەس, اركىمگە ۇلەستىرىپ بەرە بەرەتىن» دەپ ءور كەۋدەسىن كەرىپ, قاسقايىپ تۇردى. قىزمەتىنەن ايىرىلدى, بىراق ۇلت نامىسىن تاپتاتقان جوق. ۇلان-بايتاق بولشەكتەۋدەن ساقتاپ قالدى.
ساقالىنا شىركەي ۇيالاپ, اياۋلى اتامەكەنىمىزگە جات اياعىن باسقىزبايمىن دەپ ات ۇستىندە كەسكىلەسىپ وتكەن باتىر بابالاردىڭ ءبىر بارماعى ولە-ولگەنشە تىستەۋلى وتكەنى انىق.
ەلى ءۇشىن ايانباعان ەرلەردىڭ ەسكەرتكىشى جانىندا جەتكىنشەكتەرگە لەكتسيا وقىلىپ, وتانسۇيگىشتىككە تاربيەلەۋ قولعا الىنسا ەكەن دەپ ويلايمىز. مىڭ مارتە قۇرعاق ايتقاننان ءبىر رەت ءوز كوزىمەن كورىپ, جۇرەك ەلەگىنەن وتكىزگەن ارتىق قوي.
تۇركىستان قالاسىنداعى گۋمانيتارلىق كوللەدجدىڭ ستۋدەنتتەرى مەن وقىتۋشىلارىنىڭ باستاماسىمەن اتالمىش وقۋ ورنىنىڭ جانىنان «قازاقستان تاۋەلسىزدىگىنە – 25 جىل» اللەياسى اشىلعاندا دا وسىنى ويلادىق. بۇل جيىنعا مىڭعا تارتا ستۋدەنت جاستار قاتىستى.
«جاسىل ەل» باعدارلاماسى اياسىندا 25 ءتۇپ كوشەت ەككەن جاستار ەندى 25 ءتۇپ الما, 25 ءتۇپ شيە جانە 25 ءتۇپ قىلقان جاپىراقتى داراق وتىرعىزۋدى قولعا الىپ جاتىر. بوس جاتقان الاڭقايلارعا گۇلدەر ەگىلۋدە.قازاقستاننان ارتىق وتان جوق. الۋان ۇلتتىڭ بالاسى وسىلاي دەيدى.
باسقا وقۋ ورىندارى مەن مەكەمەلەر دە تاۋەلسىزدىك تويىنا وراي ءتۇرلى ءىس-شارالار وتكىزىپ, قۇرمەتىن بىلدىرۋدە.
ەر تۇرىكتىڭ بەسىگى تۇركىستاندا وسىنداي يگى ىستەر قولعا الىنىپ جاتىر.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.