وبلىس كولەمىندە ءوتىپ جاتقان «جانىڭدا ءجۇر جاقسى ادام» قايىرىمدىلىق اكتسياسىنا «تارلان» كوپ سالالى كوللەدجىنىڭ ستۋدەنتتەرى دە بەيجاي قاراي المادى. كوللەدجدىڭ كۇندىزگى وقۋ ءبولىمىنىڭ №201 توپ ستۋدەنتتەرى فيزيكا ءپانىنىڭ مۇعالىمى جانات قوجانوۆانىڭ باسشىلىعىمەن قايىرىمدىلىق اكتسياسى اياسىندا «العا» بالالار ۇيىنە باردى. ستۋدەنتتەر وزدەرى جيناعان قاراجاتتارىنا بالالار ءۇيىنىڭ ءوتىنىشى بويىنشا 10 دانا ۇتىكتى سىيعا تارتىپ, كونتسەرتتىك باعدارلاما ۇسىندى.
– جاقسىلىق جاساۋ ىزگى قاسيەت دەپ ەسەپتەيمىن. تاعدىر تالكەگىمەن بالالار ۇيىندە وسۋگە ءماجبۇر بولعان بۇلدىرشىندەردىڭ جابىرقاۋ كوڭىلدەرىنە ءبىر ساتكە بولسا دا قۋانىش سىيلايىقشى دەگەن ماقساتپەن سوندا باردىق. ستۋدەنتتەر وزدەرىنىڭ شاكىرتاقىسىنان ازىن-اۋلاق سىي-سياپات جاساۋدى دا ەستەن شىعارمادى. ارنايى كونتسەرتتىك باعدارلامامىزدى تارتۋ ەتتىك. بالالار ءۇيىنىڭ بۇگىنگى تىنىس-تىرشىلىگىمەن تانىستىق. ال, ستۋدەنتتەر ءۇشىن وسىنداي يگى ىستەردىڭ بەرەرى مول دەپ ەسەپتەيمىن, – دەيدى توپ كۋراتورى جانات قوجانوۆا.
«العا» بالالار ۇيىنە بارعان كوللەدج ستۋدەنتتەرى قايىرىمدىلىق پەن مەيىرىمدىلىكتىڭ, ادامگەرشىلىكتىڭ ومىردە قانشالىقتى قاجەت ەكەندىكتەرىن سەزىندى. ومىردە قاتەلەسۋ, شالىس باسۋ ءسابي جۇرەگىنە قانشالىقتى قيىندىق تۋدىراتىنىنا كوز جەتكىزگەندەي بولدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.