استانا. 17 ناۋرىز. ەندى پەدوفيلدەرگە حيميالىق كاستراتسيا جاسالاتىن بولادى. مۇنى پارلامەنتى سەناتىنىڭ جالپى وتىرىسىندا سەناتور بىرعانىم ءايتىموۆا مالىمدەدى. بۇل تۋرالى kazinform.kz-كە سىلتەمە جاساعان egemen.kz حابارلادى.
پارلامەنت سەناتىنىڭ وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى.
زاڭ جوباسىندا جەتىم جانە اتا-انا قامقورلىعىنسىز قالعان بالالاردىڭ رەسپۋبليكالىق دەرەكتەر بازاسىن جاساۋ قامتامسىز ەتىلەدى. سونداي-اق, بالالار ۇيىندە تاربيەلەنەتىن سابيلەر مەن جاسوسپىرىمدەر سانىن ازايتۋ ماقساتىندا «قوناق وتباسى» جوباسى ەنگىزىلمەك. وندا اۋىر قىلمىستار ءۇشىن سوتتالعاندارعا, وتەلمەگەن سوتتالعاندىعى بار ادامداردىڭ بالالاردى اسىراپ الۋىنا تىيىم سالىنادى.
جالپى وتىرىستا بىرعانىم ءايتىموۆا: «حيميالىق كاستراتسيا بۇل – ۋاقىتشا شارا, بۇل ءبىر رەتتىك ينەكتسيا بولادى. ياعني, ينەكتسيا جاسالعانان كەيىن ول ءومىر بويى وسىنداي بولىپ قالمايدى. ينەكتسيا سوت جانە مەديتسينالىق ۇيىم شەشىمى شىققاننان كەيىن جاسالادى. وسىلايشا, ءبىر بالانىڭ بولسا دا ءومىرىن قورعاپ قالساق, بۇل دۇرىس شەشىم دەپ ويلايمىن», – دەدى.
ايتا كەتەيىك, قابىلداعان زاڭ مەملەكەت باسشىسىنىڭ قول قويۋىنا جولدانادى.
تالعات رايىمبەك.
دەرەك: kazinform.kz.
سۋرەت: rifey.ru.