قازاقستاندا مۇگەدەكتىگى بار جاندارعا ارنالعان اربالار, پروتەزدەر جانە وزگە دە تەحنيكالىق وڭالتۋ قۇرالدارىن قايتارىمدى نەگىزدە, ياعني جالداۋ ارقىلى بەرۋ جۇيەسى ەنگىزىلمەك. بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ مالىمدەدى, دەپ حابارلايدى Egemen.kz.
ءمينيستردىڭ ايتۋىنشا, قازىرگى قولدانىستاعى جۇيە قۇرالداردى قايتارىمسىز نەگىزدە بەرۋگە باعىتتالعان. الايدا بۇل ءتاسىل قۇرالداردىڭ ناقتى جاعدايىن, توزۋ دەڭگەيىن جانە جوندەۋ مۇمكىندىگىن تولىق ەسكەرمەيدى.
مۇگەدەكتىگى بار جانداردى جۇمىسقا ورنالاستىرۋ كۆوتاسى ەكى ەسە ارتادى
جاڭا ۇلگى بويىنشا تەحنيكالىق قۇرالدار پايدالانۋ مەرزىمى اياقتالعان سوڭ نەمەسە قاجەتتىلىك بولماعان جاعدايدا كەرى قايتارىلادى. ودان كەيىن مىناداي كەزەڭدەردەن وتەدى:
قايتارىلعان قۇرالداردىڭ جاعدايى تەكسەرىلەدى. قۇرالدار جوندەۋگە جىبەرىلەدى, اۋىستىرىلادى, قايتا پايدالانۋعا بەرىلەدى نەمەسە ەسەپتەن شىعارىلادى. جوندەلگەن قۇرالدار قايتادان مۇقتاج جاندارعا بەرىلەدى, بۇل كەزەك كۇتۋ مەرزىمىن ەداۋىر قىسقارتادى.«قايتارىمدى مودەل تەحنيكالىق وڭالتۋ قۇرالدارىمەن قامتاماسىز ەتۋ مەرزىمىن قىسقارتۋعا جانە ولاردىڭ جەرگىلىكتى جەرلەردەگى قولجەتىمدىلىگىن ارتتىرۋعا مۇمكىندىك بەرەدى», دەپ ءتۇسىندىردى اسقاربەك ەرتاەۆ.
جاڭا جوبا بيىلعى ماۋسىم ايىنان باستاپ اقتوبە, قاراعاندى جانە پاۆلودار وبلىسىندا سىناقتان وتكىزىلەدى.
سىناق ءساتتى وتكەن جاعدايدا, جىلدىڭ ەكىنشى جارتىجىلدىعىنان باستاپ جوبا بۇكىل رەسپۋبليكا بويىنشا قامتىلاتىن بولادى.