31 مامىر كۇنى تاڭەرتەڭ استاناداعى توتەنشە جاعدايلار قىزمەتىنە مايلين كوشەسىندەگى كوپقاباتتى تۇرعىن ءۇيدىڭ توعىزىنشى قاباتىنداعى پاتەر تەرەزەسىنىڭ الدىنا 16 جاستاعى قىزدىڭ شىعىپ العانى تۋرالى حابار ءتۇستى, دەپ حابارلايدى Egemen.kz.
وقيعا ورنىنا جەدەل جەتكەن قۇتقارۋشىلار قاۋىپسىزدىك شارالارىن قولعا الدى. تۇرعىن ءۇيدىڭ الدىنا بيىكتىكتەگى قۇتقارۋ جۇمىستارىنا ارنالعان ارنايى ء«ومىر كۋبى» ورناتىلدى.
قۇتقارۋشىلار پاتەردىڭ ەسىگىن اشىپ, ءجاسوسپىرىمدى قاۋىپتى جەردەن قاۋىپسىز ايماققا شىعاردى. جەدەل ءارى كاسىبي ارەكەتتەردىڭ ارقاسىندا قىزدىڭ ءومىرى ساقتالىپ قالدى.
توتەنشە جاعدايلار مينيسترلىگىنىڭ مالىمەتىنشە, قازىرگى ۋاقىتتا وقيعانىڭ ءمان-جايىن پوليتسيا قىزمەتكەرلەرى انىقتاپ جاتىر.
ايتا كەتەيىك, بۇعان دەيىن استانادا كوپقاباتتى ءۇيدىڭ شاتىرىنان سەكىرمەك بولعان ءجاسوسپىرىم قۇتقارىلدى.
وسكەمەندە قۇتقارۋشىلار كوپىردەن سەكىرمەك بولعان قىزدى امان الىپ قالدى.