اقتاۋدا قوعامدىق قاۋىپسىزدىكتى قامتاماسىز ەتۋگە باعىتتالعان جاڭا تەحنولوگيا ەنگىزىلمەك. ەندى قالاداعى قوعامدىق ورىنداردى روبوت-يتتەر پاترۋلدەپ, قۇقىق بۇزۋشىلىقتاردىڭ الدىن الۋعا كومەكتەسەدى, دەپ حابارلايدى Egemen.kz
اقتاۋ قالاسىندا قوعامدىق ورىنداردى پاترۋلدەۋ ءۇشىن روبوت-يتتەر پايدالانىلاتىن بولادى. بۇل تۋرالى قازاقستان رەسپۋبليكاسى ىشكى ىستەر مينيسترلىگىنىڭ ءباسپاسوز قىزمەتى حابارلادى.
زاماناۋي بەينەباقىلاۋ جۇيەلەرىمەن جابدىقتالعان روبوتتاندىرىلعان كەشەندەر قوعامدىق ءتارتىپتى باقىلاپ, جاعدايدى ونلاين رەجيمدە مونيتورينگتەن وتكىزەدى جانە قۇقىق بۇزۋشىلىقتاردىڭ الدىن الۋ جۇمىستارىنا قاتىسادى. جينالعان اقپارات ناقتى ۋاقىت رەجيمىندە جەدەل باسقارۋ ورتالىعىنا جىبەرىلىپ وتىرادى.
روبوت-يتتەر كۇماندى زاتتاردى انىقتاۋعا, سونداي-اق ءتۇتىن مەن ءورت بەلگىلەرىن تىركەۋگە قابىلەتتى. قاۋىپتى جاعداي انىقتالعان كەزدە جۇيە توتەنشە جاعدايلار قىزمەتتەرىنە اۆتوماتتى تۇردە حابارلاما جولدايدى.
بولاشاقتا بۇل تەحنولوگيانى ارنايى جانە تەرروريزمگە قارسى وپەراتسيالار كەزىندە پايدالانۋ مۇمكىندىگى قاراستىرىلۋدا. جاڭعىرتۋدان كەيىن روبوتتار قاۋىپتى نىسانداردى قاشىقتان تەكسەرىپ, كۇماندى زاتتاردى تاسىمالداۋ فۋنكتسياسىن دا اتقارا الادى.
ايتا كەتەيىك, مۇنداي روبوتتاندىرىلعان پلاتفورمالار بۇعان دەيىن استانا جانە الماتى قالالارىندا ەنگىزىلگەن بولاتىن.