استانا. 17 ناۋرىز. ەلباسى پاۆلودار وبلىسىنا جۇمىس ساپارى بارىسىندا رەسپۋبليكالىق ەڭبەك ۇجىمدارى فورۋمىنا قاتىستى. بۇل تۋرالى akorda.kz حابارلادى.
ءىس-شاراعا قازاقستاننىڭ 10 وبلىسىنىڭ 50 ەڭبەك ۇجىمىنان 4 مىڭنان اسا ادام قاتىستى.
نۇرسۇلتان نازارباەۆ ءوز سوزىندە جۇمىسشى ماماندىعىن يەلەنگەن ادامداردىڭ ەلدى دامىتۋداعى ەلەۋلى ءرولىن اتاپ ءوتتى.
«بۇگىن مۇندا ەلىمىزدىڭ جانە وبلىستاردىڭ ەڭ ۇزدىك ەڭبەك ۇجىمدارىنىڭ وكىلدەرى جينالدى. بۇلار – شاحتەرلار, مەتاللۋرگتەر, ماشينيستەر, تەمىرجولشىلار, مۇنايشىلار, جۇمىسشى ماماندىعىنىڭ بارلىق وكىلدەرى. سىزدەردىڭ ەڭبەكتەرىڭىز ارقىلى مەتاللۋرگيالىق بالقىتۋ پەشىندە, كەن ورىندارى مەن شاحتالاردا, زاۋىتتاردا, اۆتوكولىك جولدارى مەن تەمىرجولداردا وتاندىق ەكونوميكا دامىپ جاتىر. مەن جۇمىسشى ماماندىعىنىڭ قانداي ەكەنىن جاقسى بىلەمىن. ءبىز قازاقستاندا جالپىعا ورتاق ەڭبەك قوعامىن جاريالادىق, «ەڭبەك داڭقى» ارناۋلى وردەنىن تاعايىندادىق. ونىڭ العاشقى لاۋرەاتتارى وسى زالدا وتىر. ەڭ مىقتى ۆاليۋتا – ادام ەڭبەگى», – دەدى مەملەكەت باسشىسى.
قازاقستان پرەزيدەنتى الەمدىك ەكونوميكاداعى قيىن جاعدايعا قاراماستان, قازاقستان ەكونوميكا ءوسىمىنىڭ قارقىنىن ساقتاپ, ەل ازاماتتارىنا الەۋمەتتىك كەپىلدىكتەر ۇسىنىپ وتىرعانىنا نازار اۋداردى.
«قازىر الەمدىك نارىقتار قۇلدىراۋ ۇستىندە. كوپتەگەن الەمدىك كومپانيالار ءوندىرىستى, قىزمەتكەرلەردى قىسقارتۋعا ءماجبۇر, الەۋمەتتىك شىعىستار مەن الەۋمەتتىك كەپىلدىكتەر كولەمى ازايۋدا. جۇمىسسىزدىق ءوسىپ كەلەدى. وسىنىڭ ءبارى – جاھاندىق ەكونوميكالىق داعدارىستىڭ سالدارى. ءبىزدىڭ قازاقستان كاسىپورىندارى دا كۇردەلى جاعدايعا تاپ بولدى. قازاقستاندىق تاۋاردىڭ باسىم كوپشىلىگىنىڭ, سونىڭ ىشىندە شيكىزات, مۇناي, مەتالل جانە ونەركاسىپ ونىمدەرىنىڭ باعاسى تومەندەپ كەتتى. بۇگىندە يندۋستريالاندىرۋ جانە «نۇرلى جول» باعدارلامالارىن جۇزەگە اسىرۋ ارقىلى بالامالى ەكونوميكا قۇرۋدى باستاۋىمىزدىڭ ارقاسىندا بىزدە ونەركاسىپ ونىمدەرىنىڭ ناقتى كولەمى قىسقارعان جوق. الەۋمەتتىك مىندەتتەمەلەردى تولىق ورىنداپ وتىرمىز, ويتكەنى قازاقستان وسىنداي قيىندىقتاردى ەڭسەرۋ ءۇشىن بەرەكەلى جىلدارى قور جينادى», – دەدى ەلباسى.
قازاقستان پرەزيدەنتى كاسىپورىندار مەن وندىرىستەردە جۇمىس ورىندارىن ساقتاۋدىڭ ماڭىزدىلىعىن دا ايرىقشا اتاپ ءوتتى.
«سوندىقتان بارلىق وڭىردە اكىمدىكتەر مەن جەتەكشى كاسىپورىندار اراسىندا جۇمىس ورىندارىن ساقتاۋ, جۇمىس بەرۋشىلەردىڭ جەرگىلىكتى قايتا وقىتۋ باعدارلامالارىنا قاتىسۋى تۋرالى مەموراندۋمدارعا قول قويىلدى. وسىنداي كۇردەلى جاھاندىق داعدارىس احۋالىندا ءبىزدىڭ مەملەكەت جوعارى الەۋمەتتىك جاۋاپكەرشىلىكتىڭ, ەڭبەك ادامىنا دەگەن قامقورلىقتىڭ ۇلگىسىن كورسەتىپ وتىر. 1 قاڭتاردان باستاپ بىزدەر الەۋمەتتىك سالا قىزمەتكەرلەرىنىڭ ەڭبەكاقىلارىن, ستۋدەنتتەردىڭ ستيپەندياسىن, الەۋمەتتىك تولەمدەردى كوبەيتتىك. بۇگىندە بىردە-ءبىر ەل بۇلاي ىستەپ وتىرعان جوق. «100 ناقتى قادام» ۇلت جوسپارىندا الەۋمەتتىك كەپىلدىك شارالارى ۇسىنىلدى, جاڭا ەڭبەك كودەكسى قابىلداندى, كاسىپوداقتار ءرولى كۇشەيتىلدى. كەلەر جىلدان باستاپ بارشاعا ارنالعان تەگىن كاسىپتىك ءبىلىم بەرۋ جونىندەگى جاڭا جوبا ىسكە قوسىلادى. سونىڭ ارقاسىندا ميلليونداعان قاراپايىم قازاقستان ازاماتى ومىرگە ەڭبەك جولداماسىن الادى. بۇل – مەملەكەت تاراپىنان جاستارعا جاسالعان زور قولداۋ. قاراپايىم ادامداردىڭ كۇندەلىكتى قاجەتتىلىكتەرى, جاڭا جۇمىس ورىندارى, لايىقتى ەڭبەكاقى, قۇقىق ءتارتىبى مەن ەلدەگى تۇراقتىلىق – ءبىزدىڭ داعدارىسقا قارسى ساياساتىمىزدىڭ باستى نازارىندا», – دەدى نۇرسۇلتان نازارباەۆ.
مەملەكەت باسشىسى ەلدى ينفراقۇرىلىمدىق دامىتۋدىڭ الداعى جوسپارىنا توقتالدى.
«بيىل مەنىڭ تاپسىرمام بويىنشا «جۇمىسپەن قامتۋدىڭ جول كارتاسىن» جۇزەگە اسىرۋعا ايتارلىقتاي قاراجات ءبولىندى, بۇل شامامەن 60 مىڭ ادامدى جۇمىسپەن قامتاماسىز ەتەدى. سونداي-اق, 18 مىڭنان كەم ەمەس جۇمىس ورنى اشىلادى, 1 مىڭعا تارتا ينفراقۇرىلىمدىق جوبا ىسكە اسىرىلادى. ءبىز يندۋستريالىق دامۋ باعدارلاماسىن دا جالعاستىرامىز. ءتۇستى مەتاللۋرگيا, مۇناي-گاز, ەنەرگەتيكا سەكتورى, وڭدەۋشى ونەركاسىپ سياقتى نەگىزگى سالالار قۋاتتى سەرپىن الاتىن بولادى», – دەدى قازاقستان پرەزيدەنتى.
سونىمەن قاتار, نۇرسۇلتان نازارباەۆ قازاقستاننىڭ يندۋستريالىق دامۋىنداعى پاۆلودار وبلىسىنىڭ ءرولىن اتاپ ءوتتى.
«ءبىزدىڭ جوسپارلارىمىز ناقتى شىندىققا اينالىپ جاتقانىن وسى جەردەن كورۋگە بولادى. وبلىس سىرتقى ينۆەستيتسيالار كولەمىنەن العاشقى بەستىككە كىرەدى, مۇندا 182 ميلليارد تەڭگە ينۆەستيتسيا تارتىلعان. مەتاللۋرگيا, حيميا جانە جەڭىل ونەركاسىپتەگى ءوندىرىس كولەمى ءوسىپ كەلەدى, جەرگىلىكتى كاسىپورىندار جاڭا ءونىم ءتۇرىن شىعارۋدى يگەرۋدە. مىس كەنىن ءوندىرۋ باستالدى, بۇل تاۋ-كەن سالاسىنداعى ءوسىمدى ءۇش ەسە ارتتىردى. جالپى, ءونىم ەكسپورتىنىڭ كولەمى 100 ميلليارد تەڭگەدەن استى. يندۋستريالاندىرۋدىڭ وسى بەس جىلدىعىندا قازىردىڭ وزىندە 5 جاڭا ونەركاسىپتىك نىسان ىسكە قوسىلدى. يندۋستريالاندىرۋ كارتاسى بويىنشا ينۆەستيتسيالار كولەمى 800 ميلليارد تەڭگە بولاتىن 20-دان استام جوبا جۇزەگە اسىرىلۋدا. وسىنىڭ ءبارى – جاڭا جۇمىس ورىندارى, ەكونوميكا ءوسىمىن قامتاماسىز ەتەتىن جاڭا وندىرىستىك قۋاتتار», – دەدى مەملەكەت باسشىسى.
قازاقستان پرەزيدەنتى ءوڭىر حالقىن الەۋمەتتىك قولداۋ ماسەلەلەرىنە مەملەكەت زور كوڭىل ءبولىپ وتىرعانىنا نازار اۋداردى.
«وبلىس تۇرعىندارى ءۇشىن 20 الەۋمەتتىك سالا نىسانى سالىندى, پەريناتالدىق ورتالىقتىڭ جاڭا زاماناۋي كورپۋسى, 7 دارىگەرلىك امبۋلاتوريا اشىلدى, 5 مەكتەپ سالىندى, سونىڭ 4-ەۋى اۋىلدىق جەردە. سىزدەردىڭ وڭىرلەرىڭىز – بالالاردى مەكتەپكە دەيىنگى بىلىممەن 100 پروتسەنت قامتىپ وتىرعان بىردەن-ءبىر ايماق», – دەدى نۇرسۇلتان نازارباەۆ.
سوڭىندا مەملەكەت باسشىسى الدا كەلە جاتقان قازاقستان تاۋەلسىزدىگىنىڭ 25 جىلدىعىن مەرەكەلەۋ ماسەلەسىنە نازار اۋدارىپ, بارلىق وتانداستارعا تۇتاستىق پەن بىرلىك ءۇشىن ريزاشىلىق ءبىلدىردى.
«وتكەن شيرەك عاسىر قازاقستاننىڭ مەملەكەت رەتىندە قالىپتاسۋ كەزەڭى بولدى. ءبىز ەلىمىزدى تانىمال جانە بەدەلدى ەلگە اينالدىردىق. وسىنىڭ بارىنە ءبىز ءوزارا سەنىمىمىزدىڭ, تۇتاستىعىمىزدىڭ, باۋىرلاستىق پەن دوستىعىمىزدىڭ ارقاسىندا قول جەتكىزدىك. كوپتەگەن ەلدەردە قاسىرەتتى وقيعالار ورىن الىپ جاتقان كەزدە بۇل وتە ماڭىزدى. جەتەكشى مەملەكەتتەر اراسىنداعى تەكەتىرەس ءورشىپ تۇر, قاقتىعىستار باسىلار ەمەس, سوعىس ءجۇرىپ, ادامدار قازا بولىپ جاتىر. ءجۇز مىڭداعان بوسقىندار ءوز ۇيلەرىن, جيعان دۇنيە-مۇلكىن, وتانىن تاستاپ, باسپانا مەن كومەك سۇراۋعا ءماجبۇر بولۋدا. ال قازاقستاندا تاتۋلىق پەن كەلىسىم سالتانات قۇرىپ وتىر. سول ءۇشىن بارلىق بۋىننىڭ وكىلدەرىنە, بارلىق ۇلتتان شىققان ازاماتتارىمىزعا ايرىقشا العىس ايتامىن», – دەدى مەملەكەت باسشىسى.
سوڭىندا قازاقستان پرەزيدەنتى ەلدىڭ بارلىق ازاماتتارىنا دەنساۋلىق, تابىس جانە باق-بەرەكە تىلەدى.
فورۋم بارىسىندا پاۆلودار, شىعىس قازاقستان, قاراعاندى, قوستاناي, جامبىل وبلىستارىنىڭ ەڭبەك ۇجىمدارى وكىلدەرى ءسوز سويلەپ, نۇرسۇلتان نازارباەۆقا قاراپايىم ەڭبەككەرلەردىڭ مۇددەسىنە ۇدايى كوڭىل ءبولىپ وتىراتىنى ءۇشىن العىستارىن ءبىلدىردى.
ءىس-شارا سوڭى كونتسەرتتىك باعدارلاماعا ۇلاستى.
ەلامان قوڭىر.
دەرەك, سۋرەت: akorda.kz.