استانا. 17 ناۋرىز. اقش-تا كەشە ماتەماتيك, فيلوسوف, كسرو-داعى ديسسيدەنتتىك قوزعالىس پەن قۇقىق قورعاۋشىلىق ليدەرلەرىنىڭ ءبىر الەكساندر سەرگەەۆيچ ەسەنين-ۆولپين قايتىس بولدى. بۇل تۋرالى ras.kz اقپارىنا سىلتەمە جاساعان egemen.kz ءتىلشىسى حابارلادى.
1924 جىلعى 12 مامىردا لەنينگرادتا تۋعان الەكساندر ەسەنين ءبىر جاعى ءوزىنىڭ اتاقتى اكەسى سەرگەي ەسەنين سياقتى اقىن دا ەدى. ول 92 جاسىندا باقيلىق بولدى. بالانىڭ جاسى بىرگە جاڭا تولعان كەزدە اكەسى وزىنە ءوزى قول جۇمساپ, ومىردەن ءوتىپ كەتتى. بولاشاق ديسسيدەنتتىڭ اناسى نادەجدا ۆولپينا اۋدارماشى ءارى اقىن بولاتىن. ونىڭ اكەسى مەن اناسى ادەبيەت الەمىندە ءوزارا دوس-تىن, بىراق ءبىر-بىرلەرىمەن نەكەگە تۇرماعان. بالا كەيىن ەر جەتكەندە ولەڭ جازا باستايدى. بىراق ولاردى اناسىنىڭ فاميلياسىمەن جاريالايدى.
الەكساندر 1933 جىلى اناسىمەن بىرگە ماسكەۋگە قونىس اۋدارادى, ال 1946 جىلى مگۋ-ءدىڭ مەحانيكا-ماتەماتيكا فاكۋلتەتىن, تاعى ءبىر ءۇش جىلدان كەيىن ونىڭ اسپيرانتۋراسىن بىتىرەدى. 1949 جىلى «انتيكەڭەستىك پوەزياسى ءۇشىن» ءبىرىنشى رەت پسيحيكالىق اۋرۋحاناعا كۇشتەپ جاتقىزىلادى. ءبىر جىلدان كەيىن «الەۋمەتتىك جاعىنان قاۋىپتى ەلەمەنت» رەتىندە كالينينگراد وبلىسىنا بەس جىلعا جەر اۋدارىلادى. اقىننىڭ ۇلى 1953 جىلى راقىمشىلىق الادى. بىراق بۇل ۇزاققا سوزىلمايدى, بەس جىلدان كەيىن قايتادان جىندىحاناعا جاتقىزىلادى.
1965 جىلى الەكساندر ەسەنين-ۆولپين سوعىستان كەيىنگى كسرو-دا ءبىرىنشى بولىپ «جاريالىلىق شەرۋىن» ۇيىمداستىرادى. ال 1968 جىلى ءۇشىنشى رەت جىندىحانادا ەمدەلىپ شىققاننان كەيىن الەكساندر اقش-قا كەتىپ قالادى. ول امەريكادا الدىمەن بۋففالو, سوسىن بوستون ۋنيۆەرسيتەتتەرىندە جۇمىس جاسايدى. سوندا ءجۇرىپ ءوزىنىڭ اتى بەرىلەتىن دياديكالىق كەڭىستىك تەورەماسىن جاسايدى.
ۆولپين 1989 جىلدان بەرى وتانىندا بىرنەشە رەت بولىپ قايتتى.
الەكساندر 1992 جىلدان كەيىن سەرگەي ەسەنين ۇرپاقتارى اراسىنداعى جالعىز بالا بولىپ قالدى. 1937 جىلى ورىس اقىنىنىڭ باسپاحانا قىزمەتكەرى اننا يزريادنوۆادىن تۋعان تۇڭعىشى يۋري جالعان ايىپ بويىنشا اتىلىپ كەتتى. اكتريسا زينايدا رايحتان تۋعان جۋرناليست-جازۋشى تاتيانا (1918-1992) مەن ينجەنەر-قۇرىلىسشى كونستانتين (1920-1986) بۇدان كوپ بۇرىن قايتىس بولدى.
تالعات رايىمبەك.
دەرەك, سۋرەت: ras.kz.