مانەرلەپ سىرعاناۋ قازاق پەرزەنتى ءۇشىن سپورتتىڭ ءاۋ باستان كەنجەلەپ قالعان ءبىر ءتۇرى ەدى. ءبىزدىڭ بىلۋىمىزدە, سايىستىڭ بۇل سالاسىندا بۇدان ءبىراز جىلدار بۇرىن ايگۇل قۋانىشەۆا, قۇرالاي تىلەبالدينوۆا دەگەن قىزدارىمىز بولدى. بىراق ولار سپورت شەبەرى دارەجەسىنە جەتىپ, بىرنەشە رەت رەسپۋبليكا چەمپيونى اتانعاننان ارىگە اسا المادى. بۇل قاتىپ تۇرعان سەڭنىڭ كوبەسىن العاش دەنيس تەن بۇزدى. 2013 جىلى العاش رەت الەم چەمپيوناتىندا كۇمىس مەدالعا قول جەتكىزگەن ول 2014 جىلى سوچي وليمپياداسىندا جانە 2015 جىلى جاھان جارىسىندا قولا مەدالدىڭ يەگەرى اتاندى. مىنە, تاپ وسى شامادا قازاق قىزى ەليزابەت تۇرسىنباەۆا دا مانەرلەپ سىرعاناۋشى جاسوسپىرىمدەردىڭ الامان بايگەلەرىنەن جارقىراپ كورىنە باستادى.
بۇعان دەيىن وتباسى بولىپ ماسكەۋدە تۇرىپ, جاتتىعىپ كەلگەن ليزا تاپ وسى 2013 جىلى ۇستازدارىن الماستىرىپ, اتا-اناسىمەن بىرگە كاناداعا قونىس اۋداردى. وسىدان باستاپ جەرگىلىكتى باپكەر برايان ورسەردىڭ قاراۋىندا جاتتىعۋعا كىرىستى. ال جاس قىزدىڭ بۇلايشا اياق استىنان ءتۇپ كوتەرىلىپ, اكە-شەشەسىن سوڭىنا ەرتىپ, مۇحيت اسىپ كەتۋىنە نەگىزگى سەبەپ بولعان ونىڭ تۋعان ەلى – قازاقستاننىڭ نامىسىن قورعاۋ نيەتىنەن قايتپاۋى ەدى. راس, ليزا ماسكەۋدە دۇنيەگە كەلىپ, بالا جاسىنان سوندا وسكەن. مانەرلەپ سىرعاناۋدىڭ دا العاشقى الىپپەسىن وسى قالادا العان. وسىندا الەكساندر شۋبيننەن قانات قاققان ول كەيىن تاعى ءۇش جاتتىقتىرۋشىنىڭ مەكتەبىنەن ءوتىپ, ۇلكەن ءۇمىت كۇتتىرەتىن جاس بۋىننىڭ قاتارىنان ورىن العان.
ءبىر تاڭ قالاتىنىڭ, قىزدارىنىڭ وسى سالاعا ءبىرجولا تۇسكەنىنە كوزدەرى جەتكەننەن كەيىن ونىڭ اكەسى بايتاق پەن اناسى پاديشاحان وزدەرىنىڭ بارلىق تىرشىلىكتەرىن سونىڭ جولىنا ارنايدى. قىزىلوردا وبلىسىنىڭ ارال قالاسىندا تۋىپ-وسكەن بايتاق 1992 جىلى قارمۋ-ءدى بىتىرگەننەن كەيىن ماسكەۋ قالاسىنا ىسساپارمەن كەلىپ, سوڭىنان كاسىپكەرلىك سالاعا بەت بۇرىپ, وسىندا ءبىرجولا قالىپ قويادى. بۇل كەزدە سول بيزنەسى جاپ-جاقسى تابىس بەرىپ تۇرعان ءىس ادامى تاپقان-تايانعاندارىنىڭ ءبىراز بولىگىن قىزىنىڭ سپورتپەن الاڭسىز اينالىسۋىنا, جاقسى ءجۇرىپ-تۇرۋىنا جۇمساۋعا كوشەدى.
ەليزابەت باسىرەلى باسەكەلەرگە ۇيەڭكى جاپىراعى ەلىنە كەلگەننەن كەيىن عانا قوسىلا باستادى. ول 2014 جىلى العاش رەت جاسوسپىرىمدەر اراسىنداعى الەم چەمپيوناتىنا قاتىسىپ, قورىتىندى ەسەپتە 11-ورىنعا تابان تىرەدى. وسى جىلى جاس سپورتشى سوچي وليمپيالىق ويىندارىنىڭ كورسەتىلىم سىناعىنا قاتىسۋ باقىتىنا دا يە بولدى. ال 2015 جىلى تالليندە وتكەن كەلەسى الەمدىك جارىستا جۇلدەلى ورىندارعا قارىس قادام عانا جەتپەي, 4-ورىنعا تۇياق ىلىكتىردى.
بيىلعى جىل دا ەليزابەت ءۇشىن جاقسى باستالىپ وتىر. ول اقپان ايىنىڭ باسىندا نورۆەگيادا جالاۋ جەلبىرەتكەن جاسوسپىرىمدەردىڭ وليمپيالىق ويىندارىندا باعىن سىنادى. قىسقا باعدارلاما بويىنشا ەكىنشى ورىنعا اياق ارتقان مانەرلەپ سىرعاناۋشى ەركىن باعدارلامانىڭ ناتيجەسى نەگىزىندە قولا مەدالمەن ءتۋرنيردى اياقتادى. بيىلعى جىلعى 14 اقپان كۇنى جاسى 16-عا تولعان ەليزابەتتىڭ ۇلكەن سپورتتاعى جەتەر جەتىستىكتەرى مەن الار اسۋلارى الدا. قازاق مانەرلەپ سىرعاناۋ سپورتىنىڭ بەلەڭگە بىتكەن بايشەشەگى ىسپەتتەس تالانتتى قىزدىڭ بولاشاعىنان ءبارىمىز دە ۇلكەن ءۇمىت كۇتەمىز.
رۋسلان يگىلىك.