«اۋىل» حالىقتىق-دەموكراتيالىق پاتريوتتىق پارتياسىنىڭ سايلاۋ ناۋقانىنداعى ۇگىت-ناسيحات جۇمىستارى قىزىلجار وڭىرىندە دە جالعاسىپ, توپ مۇشەلەرى اتباسىن الدىمەن «التىن-ارمان» امبەباپ بازارىنا تىرەدى.
پارتيا تورعاسىنىڭ ءبىرىنشى ورىنباسارى, پارلامەنت ءماجىلىسى دەپۋتاتتىعىنان ۇمىتكەر تولىمبەك عابدىلاشىموۆ سايلاۋشىلارمەن كەزدەسۋدە ساياسي ۇيىمنىڭ سايلاۋالدى باعدارلاماسىنىڭ باسىم قاعيداتتارىن ءتۇسىندىرىپ بەردى. «اۋىل ءداستۇرىن جاڭعىرتامىز!» باعدارلاماسىندا ەلدى مەكەندە تۇراتىن ادامداردىڭ الەۋمەتتىك-ەكونوميكالىق جاعدايىن جاڭا ساپالىق دەڭگەيگە جەتكىزۋ, ۇلتتىق قۇندىلىقتار مەن داستۇرلەردى نىعايتۋ, جاس ۇرپاقتى اتالار داستۇرىمەن تاربيەلەۋ جولدارى جان-جاقتى قاراستىرىلعان. رەسپۋبليكا تۇرعىندارىنىڭ جارتىسىنا جۋىعى اۋىلداردا تۇراتىنىن ەسكەرسەك, جۇمىسسىزدىقتى ەڭسەرۋ, جاڭا جۇمىس ورىندارىن اشۋ, شاعىن جانە ورتا بيزنەستى قولداۋ, اگروونەركاسىپ كەشەنى سالاسىن وركەندەتۋ مۇمكىندىكتەرىن كەشەندى تۇردە دامىتۋدىڭ ماڭىزى زور, دەي كەلىپ, توپ جەتەكشىسى مال شارۋاشىلىعى ونىمدەرىن وڭدەۋ, ساپالى شىعارۋ, قايتا وڭدەۋ كاسىپورىندارىن كوبەيتۋ ارقىلى ەكسپورتتىق الەۋەتتى ارتتىرۋ جاعدايىنا پارتيا ەرەكشە ءمان بەرىپ وتىرعانىن اتاپ كورسەتتى.
«اۋىل» پارتياسى تاراپىنان اتقارىلىپ جاتقان تاعىلىمدى ىستەر از ەمەس. سولاردىڭ بىرىنە پارتيانىڭ ۇيىتقى بولۋىمەن «جارامدىلىق مەرزىمى وتكەن تاۋارلارعا جول جوق» اتتى اكتسيانى اتاۋعا بولادى. جەر-جەرلەردە كەڭىنەن قولداۋ تاۋىپ, وتكەن جىلدىڭ جەلتوقسان ايىنان بەرى جالعاسىپ كەلە جاتقان ءىس-شارا بارىسىندا ساياسي ۇيىمنىڭ جاستار قاناتى ايماقتارداعى قوعامدىق شتابتارمەن بىرلەسە وتىرىپ, وتاندىق ونىمدەردىڭ ساپاسى مەن باسەكەلەستىك قابىلەتىنە مونيتورينگ جۇرگىزگەن. ناتيجەسىندە ەسكىرگەن بالالار تاعامدارىنىڭ ساۋدا سورەلەرىنە قويىلعانى انىقتالعان. بۇل دەرەكتەر جيناقتالىپ, جەرگىلىكتى تۇتىنۋشىلار قۇقىعىن قورعاۋ دەپارتامەنتتەرىنە جونەلتىلگەن. دۇكەن يەلەرىنە ەسكەرتىلىپ, كەلەشەكتە قايتالانبايدى دەگەن ۋادەلەرىن العان. رەيد-تەكسەرۋلەر زاڭ اياسىندا اتقارىلىپ, تۇرعىنداردىڭ دەنساۋلىعىن قامتاماسىز ەتۋگە, ەكولوگيالىق تالاپتاردى ساقتاۋعا ايرىقشا باسىمدىق بەرىلگەن.
وزگە دە كاسىپورىنداردا وتكەن جۇزدەسۋلەردە ت.عابدىلاشىموۆ حالىق دەنساۋلىعى ۇلت بايلىعى بولىپ تابىلاتىنىن, سول سەبەپتى دەنساۋلىق ساقتاۋ, حالىققا مەديتسينالىق قىزمەت كورسەتۋ كورسەتكىشتەرىن ساپالىق دەڭگەيگە جەتكىزۋ كۇن تارتىبىنەن تۇسپەيتىنىن العا تارتسا, سايلاۋشىلار سايلاۋ ناۋقانىنداعى ۇگىت-ناسيحات توبى مۇشەلەرىنىڭ بايىپتى اڭگىمەلەرىن ۇلكەن ىجداعاتپەن تىڭداپ, «جارامدىلىق مەرزىمى وتكەن تاۋارلارعا جول جوق» رەسپۋبليكالىق اكتسياعا بەلسەنە قاتىساتىندارىن مالىمدەدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.