جالپىۇلتتىق سوتسيال-دەموكراتيالىق پارتيانىڭ الماتىداعى شتابىندا پارتيانىڭ بەلسەندىلەرى سايلاۋشىلارمەن كەزدەستى. الدىمەن ءسوز العان پارتيا جەتەكشىسى جارماحان تۇياقباي پارتيانىڭ سايلاۋالدى باعدارلاماسىنا توقتالىپ, ناۋقاندى جۇمىستىڭ وسى باعدارلاما تالاپتارى اياسىندا قىزۋ ءجۇرىپ جاتقانىن ايتىپ ءوتتى.
ەلىمىز ءۇشىن ءوندىرىس الەۋەتىن ىشكى دامۋ ماقساتتارىنا قاراي بۇرۋ, يننوۆاتسيالىق ەكونوميكاعا جول اشۋ كەرەك دەگەن پارتيا جەتەكشىسى بۇل ورايداعى وي-تۇجىرىمىن تومەندەگىشە جەتكىزدى. «بۇكىل ىشكى ەكونوميكالىق جانە ادام رەسۋرستارىنىڭ مۇمكىندىگىن پايدالانىپ, دامۋعا سونى سەرپىن بەرۋ كەرەك. قازاقستان – باي مەملەكەت. ەڭ باستىسى, سول بايلىقتىڭ تالان-تاراجعا سالىنۋىنا جول بەرمەۋى ءتيىس. جەمقورلىققا توسقاۋىل قويىلىپ, ەلدە بار باسقا دا رەزەرۆتەردى دۇرىس پايدالانۋ قاجەت. ول ءۇشىن قازاقستاندا مۇمكىنشىلىك زور».
گازەت ءتىلشىسىنىڭ پارتيا باعدارلاماسىنداعى تابىستىڭ بەلگىلى ءبىر بولىگىن قازىناعا قۇيۋ تۋرالى قاعيداتتى شارالارعا وراي قويىلعان ساۋالىنا پارتيا جەتەكشىسى بىلاي دەپ جاۋاپ قايتاردى.
– بۇل – بيزنەسمەندەرگە سالىناتىن سالىق ەمەس, اسىپ-تاسقان بايلارعا سالىناتىن سالىق تەڭگەرمەلى تۇردە كوبەيۋى كەرەك دەگەن ءسوز. ونداي تاجىريبە دۇنيەجۇزىنىڭ بارلىق وركەنيەتتى مەملەكەتتەرىندە بار. تابىس نەعۇرلىم كوپ بولسا, ەلگە, حالىققا سوعۇرلىم پايداسىن تيگىزەدى.
– وسى تالاپتارعا قاتىستى بۇگىنگە دەيىن ءۇن قاتقاندار بار ما؟
– مەنىڭشە, وعان قارسى كەلەتىن ەشكىم جوق دەپ ويلايمىن.
بيزنەسمەن راحىم ايىپ ۇلى 2007 جىلدان بەرى جسدپ-نىڭ مۇشەسى بولىپ تابىلادى. قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديدات ءبىزدىڭ ساۋالىمىزعا ىنتاسىمەن جاۋاپ بەردى.
– بۇل پارتيانىڭ قاتارىنداعى ازاماتتار دا وزدەرىن ەلىمىزدىڭ پاتريوتى سانايدى. ولاردىڭ قاتارىندا ءوزىم دە بارمىن... ءوز باسىم سىرتتا جۇرگەن قانداستارىمىزدىڭ ەلىمىزگە باعىتتالعان كوشىنىڭ توقتاماعانىن قالايمىن. سايلاۋ دوداسىنا ءتۇسىپ جاتقان التى پارتيانىڭ ىشىندە سىرتتان كەلگەن قانداستارىمىزدان قانشا ۇمىتكەر بار ەكەنى تۋرالى مەن ايتا المايمىن. دەگەنمەن, ۇلى كوشتى ءوز باسىنان وتكىزگەن ازاماتتاردىڭ پارلامەنت مۇشەسى بولعانى دۇرىس دەپ سانايمىن. ءسوز رەتى كەلىپ تۇرعاندا ءوزىمنىڭ الىستان كەلگەن اعايىننىڭ ءبىرى ەكەنىمدى ايتا كەتەيىن.
توراعا مەن ونىڭ ارىپتەستەرى ايدار الىباەۆ, تازابەك سامبەتباي سايلاۋشىلاردىڭ باسقا دا ساۋالدارىنا جاۋاپ قايتاردى.
تالعات ءسۇيىنباي,
«ەگەمەن قازاقستان».
الماتى.